ବାରିପଦା ଅଫିସ,୭ା୨: ମୟୂରଭଞ୍ଜର ପ୍ରଜାବତ୍ସଳ ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓଙ୍କ ନାମରେ ନାମିତ ଶ୍ରୀରାମଚନ୍ଦ୍ର ପାଠଗାର ଶ୍ରୀହୀନ ହେବାକୁ ବସିଛି। ୨ବର୍ଷ ପୂର୍ବେ ରାଜ୍ୟ ସରକାର ଏହାର ପୁନରୁଦ୍ଧାର କାର୍ଯ୍ୟ ହାତକୁ ନେଇଥିଲେ। ସମଗ୍ର ଦେଶରେ ଏହି ପାଠାଗାର ଏକ ଉଦାହରଣ ପାଲଟିବ ବୋଲି ସରକାରୀ ଦଳର ମୁଖପାତ୍ର ସସ୍ମିତ ପାତ୍ର ପ୍ରତିଶ୍ରୁତି ଦେଇଥିଲେ। ମାତ୍ର ଅଦ୍ୟାବଧି ମୁଠାଏ ମାଟି ପଡ଼ି ନ ଥିବାରୁ ଏହାର ଭବିଷ୍ୟତକୁ ନେଇ ପାଠକମାନେ ଅନ୍ଧାରରେ ରହିଛନ୍ତି ା
ଜ୍ଞାନର ବିକାଶ ନିମନ୍ତେ ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବାରିପଦା ସହରରେ ଏକ ପାଠଗାର ପ୍ରତିଷ୍ଠା କରିଥିଲେ। ମହାରାଣୀ ଭିକ୍ଟୋରିଆଙ୍କ ଯୁଗର ସ୍ଥାପତ୍ୟ କୌଶଳରେ ଗୃହ ନିର୍ମାଣ କରାଯାଇ ପାଠାଗାରକୁ ଭିକ୍ଟୋରିଆ ଜୁବୁଲି ଲାଇବ୍ରେରୀ ନାମରେ ଅଭିହିତ କରାଇଥିଲେ। ଏହି ପାଠାଗାର ଓଡ଼ିଶାର ପ୍ରଥମ ଏବଂ ପୁରୁଣା ବେସରକାରୀ ପାଠାଗାର ଭାବେ ୨୨ଜୁନ ୧୮୯୮ ମସିହାରେ କାର୍ଯ୍ୟକାରୀ ହୋଇଥିଲା। ସେହିଦିନଠାରୁ ଅଦ୍ୟାବଧି ପାଠକମାନଙ୍କୁ ସେବା ଯୋଗାଇ ଚାଲିଛି। ୧୨୫ବର୍ଷରେ ପଦାର୍ପଣ କରିଥିବା ପାଠାଗାରଟି ଜରାଜୀର୍ଣ୍ଣ ଅବସ୍ଥାରେ ପଡ଼ିରହିଛି। ଛାତରୁ ପାଣି ଗଳୁଥିବା ବେଳେ କାନ୍ଥ ଫାଟି ଅଁା କରିଛି॥ ବିପଦ ସଙ୍କୁଳ ପାଠଗାରକୁ ଜ୍ଞାନ ଅର୍ଜନ କରିବା ପାଇଁ ଯିବାକୁ ଯୁବପୀଢିମାନେ ଅମଙ୍ଗ ହେଉଛନ୍ତି। ବରିଷ୍ଠ ନାଗରିକମାନେ ସନ୍ଧ୍ୟାରେ ବସି ପୁସ୍ତକ ପଢୁଥିବା ବେଳେ ନିଜକୁ ଅସୁରକ୍ଷିତ ମଣୁଛନ୍ତି। ମରାମତି ଅଭାବରୁ ପୁସ୍ତକଗୁଡ଼ିକ ନଷ୍ଟ ହେବାକୁ ବସିଛି ବୋଲି ପାଠାଗାରର ସମ୍ପାଦକ ରତନମୟ ବେହେରା ପ୍ରକାଶ କରିଛନ୍ତି। ଏହାକୁ ନେଇ ୨୦୨୦ରେ ବିଜୁ ଜନତା ଦଳ ପକ୍ଷରୁ ଦିଆଯାଇଥିବା ୩ଟିି ପ୍ରସ୍ତାବ ମଧ୍ୟରୁ ଦୁଇଟି ପ୍ରସ୍ତାବକୁ ମୁଖ୍ୟମନ୍ତ୍ରୀ ନୀବନ ପଟ୍ଟନାୟକ ଅନୁମୋଦନ କରିଥିଲେ। ଉତ୍ତର ଓଡ଼ିିଶା ବିଶ୍ୱ ବିଦ୍ୟାଳୟର ନାମ ପରିବର୍ତ୍ତନ କରାଯାଇ ମହାରାଜା ଶ୍ରୀରାମ ଚନ୍ଦ୍ର ଭଞ୍ଜଦେଓଙ୍କ ନାମରେ ନାମିତ କରିବା ସହିତ ଶ୍ରୀରାମଚନ୍ଦ୍ର ପାଠଗାର(ଜୁବୁଲି ଲାଇବ୍ରେରୀ)ର ପୁନରୁଦ୍ଧାର ପୂର୍ବକ ସମ୍ପୂର୍ଣ୍ଣ କରାଯିବା ପାଇଁ ରାଜ୍ୟ ସରକାରଙ୍କ ନିଜ ହାତକୁ ନେଇଥିଲେ। ପତ୍ର ସଂଖ୍ୟା ୭୧୩୮/୨୨ା୧୨ା୨୦୨୦ ଅନୁଯାୟୀ ଏହା ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଅଧୀନକୁ ଆସିଥିବା ନେଇ ୨୦୨୦ ଡିସେମ୍ବର ୨୩ରେ ବିଜେଡି କାର୍ଯ୍ୟାଳୟ ପରିସରରେ ଖବରଦାତା ସମ୍ମିଳନୀରେ ଦଳର ମୁଖପାତ୍ର ତଥା ସଦସ୍ୟ ସସ୍ମିତ ପାତ୍ର ପ୍ରକାଶ କରିଥିଲେ। ତେବେ ଦୀର୍ଘ ଦିନ ବିତିବା ପରେ ମଧ୍ୟ ରାଜ୍ୟ ସରକାରଙ୍କ ପ୍ରତିଶ୍ରୁତି କାର୍ଯ୍ୟକାରୀ ହେଉ ନ ଥିବାରୁ ଜିଲାବାସୀ ଅନ୍ଧାରରେ ରହିଛନ୍ତି। ବୁଢ଼ାବଳଙ୍ଗ ନଦୀରେ ଆଡିବନ୍ଧ, ରିଂ-ରୋଡ ଯୋଜନା, ଆର୍ୟୁବେଦିକ ଓ ହୋମିଓପ୍ୟାଥି କଲେଜର ପୁନରୁଦ୍ଧାର, ବାରିପଦା ଷ୍ଟାଡିୟମର ଆଲୋକୀକରଣ ବ୍ୟବସ୍ଥା କେବଳ ଧୂଅଁାବାଣ ବୋଲି କଂଗ୍ରେସର ଯୁବନେତା ଅଂଶୁମାନ ଦାସ ପ୍ରକାଶ କରିଛନ୍ତି। ମିଥ୍ୟା ପ୍ରତିଶ୍ରୁତି ଦେଇ ଲୋକଙ୍କୁ ଠକୁଥିବା ସରକାରକୁ ଉଚିତ ଜବାବ ମିଳିବ ବୋଲି ସେ କହିଛନ୍ତି। ତେବେ ପ୍ରଜାଙ୍କ ହିତ ନିମନ୍ତେ ମହାରାଜା ଶ୍ରୀରାମଚନ୍ଦ୍ର ଛାଡ଼ି ଯାଇଥିବା ଅନୁଷ୍ଠାନଗୁଡ଼ିକର ରକ୍ଷଣାବେକ୍ଷଣ କରାଗଲେ ତାହା ପର୍ଯ୍ୟଟନସ୍ଥଳୀ ଭାବେ ପରିଣତ ହୋଇପାରନ୍ତା ବୋଲି ଜିଲାବାସୀ ଦାବି କରିଛନ୍ତି।