ଭୁବନେଶ୍ୱର,୫।୭(ସତ୍ୟଜିତ୍ ରାଉତ): ବିଜେଡି ନେତ୍ରୀ ସଞ୍ଜୁକ୍ତା ମହଲା ମଙ୍ଗଳବାର ବିସ୍ଫୋରକ ବୟାନ ଦେଇଛନ୍ତି। ପୂର୍ବତନ ଶ୍ରମମନ୍ତ୍ରୀ ତଥା ପୋଲସରା ବିଧାୟକ ଶ୍ରୀକାନ୍ତ ସାହୁ ତାଙ୍କ ସହ ଶାରୀରିକ ସମ୍ପର୍କ ରଖି ନିର୍ଯାତନା ଦେଉଥିଲେ ବୋଲି ସଞ୍ଜୁକ୍ତା ଗଣମାଧ୍ୟମରେ କହିଛନ୍ତି। ତେବେ ସଞ୍ଜୁକ୍ତାଙ୍କ ଏଭଳି ବୟାନ ପରେ ରାଜନୈତିକ ମହଲରେ ଏହାକୁ ନେଇ ଚର୍ଚ୍ଚା ବଢ଼ିବାରେ ଲାଗିଛି। ଗଣମାଧ୍ୟମ ଜରିଆରେ ସଞ୍ଜୁକ୍ତା ଦେଇଥିବା ବୟାନ ଅନୁଯାୟୀ, ଶ୍ରୀକାନ୍ତ ୨୦୧୫ରୁ ୨୦୨୨ ଡିସେମ୍ବର ପର୍ଯ୍ୟନ୍ତ ବିଭିନ୍ନ ପ୍ରକାର ଆଳ ଦେଖାଇ ତାଙ୍କୁ ନିର୍ଯାତନା ଦେବା ସହ ଶାରୀରିକ ସମ୍ପର୍କ ରଖୁଥିଲେ। ସ୍ତ୍ରୀ ଭଳି ସେ ତାଙ୍କୁ ରଖୁଥିବାବେଳେ ଘରକୁ ମଧ୍ୟ ଆସୁଥିଲେ। ସଞ୍ଜୁ୍କ୍ତା ମଧ୍ୟ ଶ୍ରୀକାନ୍ତଙ୍କ ଅଞ୍ଚଳକୁ ଯାଆନ୍ତି। ହେଲେ ମନ୍ତ୍ରୀ ପଦ ପାଇଲା ପରେ ଶ୍ରୀକାନ୍ତ ତାଙ୍କୁ ଆଉଟ୍ କରିବାକୁ ବସିଲେ। ସେତେବେଳକୁ ୩୦ ବର୍ଷର ସମ୍ପର୍କରେ ଥିବା ସ୍ବାମୀଙ୍କ ସହ ଛାଡ଼ପତ୍ର ମଧ୍ୟ କରିସାରିଥିଲେ। ତେବେ ଏନେଇ ସେ ଥାନାରେ ଏଫ୍ଆଇଆର୍ ଦେଇଥିଲେ। ହେଲେ ଚାପରେ ପଡ଼ି ପୋଲିସ କେସ୍ କଲା ନାହିଁ। ମୁଖ୍ୟମନ୍ତ୍ରୀ ତାଙ୍କୁ ନ୍ୟାୟ ଦେବେ ବୋଲି ପୂରା ଭରସା ଥିଲା। ଶ୍ରୀକାନ୍ତଙ୍କ ମନ୍ତ୍ରୀ ପଦ ଗଲା। କିନ୍ତୁ ମୋତେ ପ୍ରକୃତ ନ୍ୟାୟ ମିଳିଲା ନାହିଁ। ଏଥିସହ ସଞ୍ଜୁକ୍ତା ଆହୁରି କହିଛନ୍ତି ଯେ, ସେ ସବୁଆଡ଼େ ଶୁଣିବାକୁ ପାଇଲେ ତାଙ୍କୁ କୁଆଡ଼େ ପଇସା ଦିଆଯାଇଛି, କୋଟିଏ ଟଙ୍କା ଦିଆଯାଇଛି, ଗୋଟିଏ ଆପାର୍ଟମେଣ୍ଟ ଦିଆଯାଇଛି। ତାହାଛଡ଼ା ଦଳରେ ଗୋଟିଏ ପଦବୀ ମଧ୍ୟ ଦିଆଯାଇଛି। ହେଲେ ମୋତେ କୌଣସି ଜିନିଷ ଦିଆଯାଇନାହିଁ ବୋଲି ଆପଣମାନେ ଜାଣିରଖନ୍ତୁ ବୋଲି ସଞ୍ଜୁକ୍ତା ଗଣମାଧ୍ୟମ ପ୍ରତିନିଧିଙ୍କୁ କହିଛନ୍ତି। ଅନ୍ୟପକ୍ଷରେ ସୋମବାର ପରିବାର ଲୋକେ ପୋଲିସ କମିଶନରଙ୍କ ଦ୍ୱାରସ୍ଥ ହୋଇ ସଂଯୁକ୍ତାଙ୍କ ନାଁରେ ନିର୍ଯାତନା ଅଭିଯୋଗ ଆଣିଥିଲେ। ଏ ସଂକ୍ରାନ୍ତରେ ମଧ୍ୟ ସଞ୍ଜୁକ୍ତା ମୁହଁ ଖୋଲିଛନ୍ତି। ସେ କହିଛନ୍ତି, ତାଙ୍କ ବିରୋଧରେ ଆସିଥିବା ସବୁ ଅଭିଯୋଗ ଭିତ୍ତିହୀନ। ଏସବୁ ଘଟଣାରେ ମୁଖ୍ୟ ପୁରୋଧା ଶ୍ରୀକାନ୍ତ ସାହୁ ବୋଲି ସଞ୍ଜୁକ୍ତା କହିଛନ୍ତି। ଏସବୁର ଅନ୍ତ ହେବ। ଏଫ୍ଆଇଆର୍ କପି ପ୍ରସ୍ତୁତ କଲିଣି। ଏଥିରେ ଯଦି ନ୍ୟାୟ ନ ମିଳିବ, ତେବେ ଆଗାମୀ ଦିନରେ ତାଙ୍କ ଦୁଆର ମୁହଁରେ ବସିବେ ବୋଲି ସଞ୍ଜୁକ୍ତା ଚେତାବନୀ ଦେଇଛନ୍ତି। ଏ ସମ୍ପର୍କରେ ପୂର୍ବତନ ମନ୍ତ୍ରୀ ଶ୍ରୀକାନ୍ତଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସେ କଲ୍ ରିସିଭ୍ କରି ନ ଥିଲେ।