ପୁରୀ ଅଫିସ,୯।୫: ଶ୍ରୀମନ୍ଦିର ଐତିହ୍ୟ କରିଡର ପ୍ରକଳ୍ପ ଅଧୀନରେ ମେଘନାଦ ପାଚେରି ଚୌହଦୀରେ ହେଉଥିବା ଖନନ ଓ ନିର୍ମାଣ କାର୍ଯ୍ୟକୁ ବିରୋଧ କରି ହାଇକୋର୍ଟରେ ହୋଇଥିବା ମାମଲା ଏବେ ବିଚାରାଧୀନ ଅଛି। ସୋମବାର ଏନେଇ ଶୁଣାଣି ହେବ। ହାଇକୋର୍ଟ ମେ ୭ତାରିଖ ସୁଦ୍ଧା ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ ସଂସ୍ଥା (ଏଏସ୍ଆଇ)କୁ ଏ ସମ୍ପର୍କିତ ସତ୍ୟପାଠ ଦାଖଲ କରିବା ପାଇଁ ନିର୍ଦ୍ଦେଶ ଦେଇଥିଲେ। ମାତ୍ର ଏଏସ୍ଆଇ ସତ୍ୟପାଠ ଦାଖଲ କରିବାରେ ଅସମର୍ଥ ହୋଇଛି। ଗତ ମେ ୧ ତାରିଖରେ ଏଏସ୍ଆଇର ତିନିଜଣିଆ ଟିମ୍ ଶ୍ରୀମନ୍ଦିର ପରିକ୍ରମା ପ୍ରକଳ୍ପର ନିର୍ମାଣ କାର୍ଯ୍ୟ ଓ ଖନନର ସରଜମିନ ସ୍ଥିତି ଯାଞ୍ଚ କରିଥିଲେ। ସଂପୃକ୍ତ ଟିମ୍ରେ ଏଏସ୍ଆଇର ଆଞ୍ଚଳିକ ନିର୍ଦ୍ଦେଶକ ଦିଲୀପ ଖମାରି, ସୁପରିଣ୍ଟେଣ୍ଡେଣ୍ଟ ଅରୁଣ ମଲ୍ଲିକ, ଆସିଷ୍ଟାଣ୍ଟ ସୁପରିଣ୍ଟେଣ୍ଡେଣ୍ଟ ଚିତ୍ତରଞ୍ଜନ ଦାଶ ପ୍ରମୁଖ ସାମିଲ ଥିଲେ। ଠିକା ସଂସ୍ଥା ଟାଟା ପ୍ରାଇଭେଟ୍ ଲିମିଟେଡ୍ ଏବଂ ଓଡ଼ିଶା ବ୍ରିଜ୍ ଆଣ୍ଡ କନଷ୍ଟ୍ରକଶନ କର୍ପୋରେଶନ ଲିମଟେଡ୍ (ଓବିସିସି) ସହ ପ୍ରକଳ୍ପ କାର୍ଯ୍ୟ ସମ୍ପର୍କରେ ମଧ୍ୟ ଆଲୋଚନା କରିଥିଲେ। ଆମସାର୍ ଆକ୍ଟ-୧୯୫୮ ନିୟମ ମୁତାବକ କାର୍ଯ୍ୟ ହେଉଛି କି ନାହିଁ ସେନେଇ ଏଏସ୍ଆଇ ତର୍ଜମା କରିଥିଲା। ସ୍ଥିତି ଅନୁଧ୍ୟାନ ପରେ ଏହାକୁ ରେକର୍ଡଭୁକ୍ତ କରାଯିବା ସହ ହାଇକୋର୍ଟରେ ସତ୍ୟପାଠ ଦାଖଲ କରାଯିବ ବୋଲି ଏଏସ୍ଆଇ କର୍ତ୍ତୃପକ୍ଷ କହିଥିଲେ। ମାତ୍ର ଏବେ ସତ୍ୟପାଠ ଦାଖଲ ନ ହେବା ପଛର କାରଣକୁ ନେଇ ଚର୍ଚ୍ଚା ଜୋର ଧରିଛି। ଉଲ୍ଲେଖଯୋଗ୍ୟ, ଏପ୍ରିଲ ୮ରେ ପ୍ରଥମ ଶୁଣାଣି ହେବା ପରେ ପରବର୍ତ୍ତୀ ଶୁଣାଣି ଏପ୍ରିଲ ୨୧ ତାରିଖରେ ହୋଇଥିଲା। ସେହିଦିନ ଏଏସ୍ଆଇ କୋର୍ଟକୁ ସତ୍ୟପାଠ ଦାଖଲ ପାଇଁ ୨ ସପ୍ତାହ ସମୟସୀମା ମାଗିଥିଲା। ହାଇକୋର୍ଟ ୨ ସପ୍ତାହ ସମୟ ଦେବା ସହ ପରବର୍ତ୍ତୀ ଶୁଣାଣି ମେ ୧୬ରେ ହେବ ବୋଲି କହିଥିଲେ। ମାତ୍ର ଏହାପରେ ଏକ ଅନ୍ତରୀଣ ଆବେଦନକୁ ଗ୍ରହଣ କରି ହାଇକୋର୍ଟ ମେ ୯ରେ ଶୁଣାଣି ହେବ ବୋଲି ନିର୍ଦ୍ଦେଶ ଦେଇଥିଲେ।
