ଭଦ୍ରକ ଅଫିସ,୨୨।୪- କରୋନା ମହାମାରୀ ଯୋଗୁ ଚଳିତବର୍ଷ ମଧ୍ୟ ଭଦ୍ରକର ପ୍ରସିଦ୍ଧ ଶ୍ରୀରାମ ନବମୀ ମହୋତ୍ସବ ଫିକା ପଡ଼ିଛି। ୩ ଦିନର ହୋମଯଜ୍ଞ, ହନୁମାନ ଚାଳିଶା ପାଠ, ଶ୍ରୀରାମ ମହାନବମୀ ଯଜ୍ଞ ଆଦି କଟକଣା ମଧ୍ୟରେ ସମ୍ପନ୍ନ ହୋଇଛି। ବୁଧବାର ଏହି ମହୋତ୍ସବ ନିରାଡ଼ମ୍ବରରେ ଉଦ୍ଯାପିତ ହୋଇଯାଇଛି। ଭଦ୍ରକ ଗାନ୍ଧୀପଡ଼ିଆଠାରେ ୩ ଦିନ ଧରି ଚାଲିଥିବା ଯଜ୍ଞର ପୂର୍ଣ୍ଣାହୁତି ଦିଆଯାଇଥିଲା।
ବିଭିନ୍ନ ଗଁାରେ ମୋଟ ୪୨ ମେଢ଼ ପୂଜା ପାଇଥିଲା। ଏଥର ୧୦୮ ଜଣ ମହିଳାଙ୍କୁ ୩ ଭାଗରେ ବିଭକ୍ତ କରି କଳସ ଶୋଭାଯାତ୍ରା ଅନୁଷ୍ଠିତ ହୋଇଥିଲା। ଆର୍ଏନ୍ ବେତରା ଗ୍ରାମଠାରେ ଗୋମାତା ଓ ସାଧୁସନ୍ଥ ପୂଜନ କରାଯାଇଥିଲା। ଆରଡ଼ି ଆଖଣ୍ଡଳମଣି ପୀଠ, ବିରଜା କ୍ଷେତ୍ର ଓ ଭଦ୍ରକାଳୀଙ୍କ ପୀଠରୁ ଆଜ୍ଞାମାଳ ଅଣାଯାଇ ଯଜ୍ଞକର୍ମ ହୋଇଥିଲା। ପ୍ରତ୍ୟେହ ହୁନମାନ ଚାଳିଶା ପାଠ କରାଯାଇଥିଲା। ବୁଧବାର ଯଜ୍ଞର ପୂର୍ଣ୍ଣାହୁତି ସହ ସନ୍ଧ୍ୟାରେ ଜିଲା ବ୍ୟାପୀ ଘରେ ଘରେ ପ୍ରଦୀପ ପ୍ରଜ୍ୱଳନ କରାଯାଇଥିଲା। କରୋନା ପାଇଁ ଚଳିତବର୍ଷ ସଂକୀର୍ତ୍ତନ ଶୋଭଯାତ୍ରା, ମେଢ଼ ପରିକ୍ରମା ବାତିଲ୍ ହୋଇଥିଲା। ଗ୍ରାମରେ ବିଭିନ୍ନ ସଂକୀର୍ତ୍ତନ କମିଟି ପକ୍ଷରୁ କରାଯାଇଥିବା ଶ୍ରୀରାମ ମେଢ଼କୁ ନିରାଡ଼ମ୍ବରରେ ପୂଜା କରାଯାଇଥିଲା। ଆଇନଶୃଙ୍ଖଳାକୁ ଦୃଷ୍ଟିରେ ରଖି ସୁରକ୍ଷା ବ୍ୟବସ୍ଥା କଡ଼ାକଡ଼ି କରିଥିଲା ପୋଲିସ।
ପୂର୍ବତନ ମନ୍ତ୍ରୀ ତଥା ମହାଯଜ୍ଞ ସମିତିର ବରିଷ୍ଠ ଉପଦେଷ୍ଟା ମନମୋହନ ସାମଲ, ସଭାପତି ଆଇନଜୀବୀ ରାୟ ରାମାନନ୍ଦ ମହାପାତ୍ର, କାର୍ଯ୍ୟକାରୀ ସଭାପତି ବ୍ୟୋମକେଶ ସେନାପତି, ସମ୍ପାଦକ ଶରତ ପଢ଼ିଆରୀ, ସଂଯୋଜକ ଗୋବିନ୍ଦ ରାଉତ, ଉପସଭାପତି ଅମ୍ବିକା ଦାସ, ପ୍ରଦୀପ୍ତ ବିଶ୍ୱାଳ, ଯୁଗ୍ମ ସମ୍ପାଦକ ତପନ ମହାନ୍ତି, କୋଷାଧ୍ୟକ୍ଷ ନିରଞ୍ଜନ ସାହୁ, ବିଶ୍ୱ ହିନ୍ଦୁ ପରିଷଦର ଜିଲା ସଭାପତି ବିଜୟ ସିହ୍ନା, ସ୍ବାଧୀନ ସୁନ୍ଦର ଦାସ, ସୂର୍ଯ୍ୟବଂଶୀ ସୂରଜ, ମଦନ ବାରିକ ପ୍ରମୁଖ ମହୋତ୍ସବରେ ଉପସ୍ଥିତ ଥିଲେ।