ନୂଆଦିଲ୍ଲୀ,୨୦।୧୨ : ପଶ୍ଚିମବଙ୍ଗରେ ବିରୋଧୀ ଦଳର ନେତା ତଥା ଭାଜପା ବିଧାୟକ ଶୁଭେନ୍ଦୁ ଅଧିକାରୀ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ତୃଣମୂଳ କଂଗ୍ରେସ (ଟିଏମସି) କୁ ଦେଶର ସବୁଠାରୁ ଦୁର୍ନୀତିଗ୍ରସ୍ତ ପାର୍ଟି ବୋଲି କହିଛନ୍ତି। ସେ ମଙ୍ଗଳବାର ଦିଲ୍ଲୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କୁ ଭେଟିଛନ୍ତି। ଶୁଭେନ୍ଦୁ ୩୦-୩୦ ମିନିଟ ପାଇଁ ପ୍ରଧାନମନ୍ତ୍ରୀ ଏବଂ ଶାହାଙ୍କ ସହ ପୃଥକ ଭାବରେ କଥା ହୋଇଥିଲେ। ତେବେ ପ୍ରଧାନମନ୍ତ୍ରୀ ଏବଂ ଶାହାଙ୍କ ସହ ହୋଇଥିବା ବାର୍ତ୍ତାଳାପ ବିଷୟରେ ସେ ଗଣମାଧ୍ୟମକୁ କୌଣସି ସୂଚନା ଦେଇନାହାଁନ୍ତି।
ନ୍ୟୁଜ୍ ଚ୍ୟାନେଲ ସହିତ ଏକ ସ୍ବତନ୍ତ୍ର ବାର୍ତ୍ତାଳାପରେ ଶୁଭେନ୍ଦୁ କହିଛନ୍ତି ଯେ ମୁଁ ଦଳର ଜଣେ ଶୃଙ୍ଖଳିତ କର୍ମୀ। ଆମ ନେତାଙ୍କ ଦର୍ଶନ ହେଲା। ଭେଟ ହେଲା। ତେବେ ଗଣମାଧ୍ୟମ ସାମ୍ନାରେ ସବୁକିଛି କୁହାଯାଇପାରିବ ନାହିଁ। ବିରୋଧୀ ଦଳର ନେତା ହେବାର ମୋର ସାମ୍ବିଧାନିକ ଦାୟିତ୍ୱ ପୂରଣ କରିବାରେ ମମତା ବାନାର୍ଜୀଙ୍କ ପୋଲିସ ମୋତେ ଅଟକାଉଛି। ବାଗୋଡାରେ କୃଷକ ଆତ୍ମହତ୍ୟା କଲେ, ମୁଁ କୃଷକଙ୍କ ଘରକୁ ଯାଉଥିଲି, କିନ୍ତୁ ପୋଲିସ ତାଙ୍କ ଘରକୁ ଯିବା ସମୟରେ ମୋତେ ଅଟକାଇଥିଲା। ମୁଁ ଯେଉଁଆଡେ ଯାଏ ମୋତେ ଅଟକାଇ ଦିଆଯାଉଛି।
ଗତ ଦେଢ ବର୍ଷ ଧରି ମୋ ବିରୋଧରେ କ୍ରମାଗତ ଭାବେ ମାମଲା ରୁଜୁ ହୋଇଛି। ରାଜ୍ୟରେ ଭାଜପା କର୍ମୀଙ୍କୁ ଟାର୍ଗେଟ କରାଯାଉଛି। ମୋତେ ଟାର୍ଗେଟ କରି ମୋ ବିରୋଧରେ ଏଫଆଇଆର୍ ରୁଜୁ କରାଯାଉଛି। ପାର୍ଟି ହାଇ କମାଣ୍ଡକୁ ମୁଁ ସମ୍ପୂର୍ଣ୍ଣ ବିବରଣୀ ଦେଇଛି। ଶୁଭେନ୍ଦୁ କହିଛନ୍ତି, ’ମୁଁ ଜଣେ ସ୍ବଚ୍ଛ ବ୍ୟକ୍ତି। ମୋ ବିରୋଧରେ ପୂର୍ବରୁ କୌ ଣସି ମାମଲା ନ ଥିଲା। ବର୍ତ୍ତମାନ ଦେଖନ୍ତୁ ମୋ ବିରୋଧରେ କେତେ ମାମଲା ହୋଇଛି। ଏପରିକି ଟ୍ରାଫିକ ନିୟମ ଭାଙ୍ଗିବା ମାମଲା ମଧ୍ୟ ପଞ୍ଜିକୃତ ହୋଇଛି। ସେଥି ପାଇଁ ମୁଁ ୧୩ ହଜାର ଟଙ୍କା ଜରିମାନା ଜମା କରିଛି ।
ମମତା ବାନାର୍ଜୀଙ୍କୁ ଟାର୍ଗେଟ କରି ଅଧିକାରୀ କହିଛନ୍ତି, ପଶ୍ଚିମବଙ୍ଗରେ ଆଇନ ଶୃଙ୍ଖଳା ବୋଲି କିଛି ନାହିଁ। ରାଜ୍ୟରେ କେବଳ ଖରାପ ରାଜନୀତି ଚାଲିଛି। ଏଭଳି ଅନ୍ୟ କୌଣସି ରାଜ୍ୟରେ ହେଉ ନାହିଁ। ମମତା ବାନାର୍ଜୀ ଏବଂ ତାଙ୍କ ପୁତୁରା ଅଭିଷେକ ବାନାର୍ଜୀ ଏକାଠି ଦୂଷିତ ରାଜନୀତି କରୁଛନ୍ତି।
ରାଜ୍ୟରେ ହୋଇଥିବା ହିଂସା ସମ୍ପର୍କରେ ଦଳର ଅଧ୍ୟକ୍ଷ ଜେପି ନଡ୍ଡା, କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ , ଉପରାଷ୍ଟ୍ରପତି ଜଗଦୀପ ଧନକରଙ୍କୁ ବୁକଲେଟ ପ୍ରଦାନ କରାଯାଇଛି ବୋଲି ଶୁଭେନ୍ଦୁ କହିଛନ୍ତି। ଏହି ବୁକଲେଟର ନାମ ହେଉଛି ୧୯୫୬। ସେ ନନ୍ଦିଗ୍ରାମରେ ଏହି ସଂଖ୍ୟକ ଭୋଟରେ ମମତା ବାନାର୍ଜୀଙ୍କୁ ପରାଜିତ କରିଥିଲେ। ସେ କହିଛନ୍ତି ଯେ ତାଙ୍କର ଦିଲ୍ଲୀ ଗସ୍ତ ସଫଳ ହୋଇଛି। ସେ ପ୍ରଧାନମନ୍ତ୍ରୀଙ୍କ ଆଶୀର୍ବାଦ ମଧ୍ୟ ପାଇଛନ୍ତି। ଏହା ତାଙ୍କ ପାଇଁ ବହୁତ ଖୁସିର ବିଷୟ ।