ଦୁବାଇ, ୩ା୧୦: କୋଲକାତା ନାଇଟ୍ ରାଇଡର୍ସ (କେକେଆର୍) ରବିବାର ରାତିରେ ଖେଳାଯାଇଥିବା ମ୍ୟାଚ୍ରେ ସନରାଇଜର୍ସ ହାଇଦ୍ରାବାଦ୍କୁ ୬ ଉଇକେଟରେ ହରାଇ ଦେଇଛି। ଟସ୍ ଛାଡ଼ି ଦେଲେ ପୂରା ମ୍ୟାଚ୍ ଆରମ୍ଭରୁ ଶେଷ ପର୍ଯ୍ୟନ୍ତ କେକେଆର୍ କବଜାରେ ରହିଥିଲା। ପ୍ରଥମେ ବୋଲରମାନେ ହାଇଦ୍ରାବାଦ୍ ବ୍ୟାଟ୍ସମ୍ୟାନଙ୍କୁ ରନ କରିବାକୁ ସୁଯୋଗ ଦେଇ ନ ଥିଲେ। ଆଉ ବାରମ୍ବାର ଉଇକେଟ ପତନ କାରଣରୁ ହାଇଦ୍ରାବାଦ୍ ୮ ଉଇକେଟ ହରାଇ ୧୧୫ ରନ୍ କରିବାକୁ ସକ୍ଷମ ହୋଇଥିଲା। ଟିମ୍ ସୌଦି, ଶିଭମ ମାଭି ଓ ବରୁଣ ଚକ୍ରବର୍ତ୍ତୀ ୨ ଲେଖାଏ ଉଇକେଟ ହାତେଇଥିଲେ। ଜବାବରେ ଶୁବମାନ ଗିଲ (୫୭ ରନ୍, ୧୦ ଚୌକା) ଅର୍ଦ୍ଧଶତକୀୟ ପାଳି ବଳରେ କୋଲକାତା ୧୯.୪ ଓଭରରେ ୪ ଉଇକେଟ କ୍ଷତିରେ ବିଜୟ ଲକ୍ଷ୍ୟ ହାସଲ କରି ନେଇଥିଲା। ତେବେ ଜାସନ ହୋଲ୍ଡର (୨) ଓ ରଶିଦ ଖାନ (୧)ଙ୍କ ଭଲ ବୋଲିଂ କାରଣରୁ ମ୍ୟାଚ୍ ଶେଷ ଓଭର ପର୍ଯ୍ୟନ୍ତ ଯାଇଥିଲା।
ଏହି ବିଜୟ ସହ କେକେଆର ୧୨ ପଏଣ୍ଟ ସହ ଅଙ୍କ ତାଲିକାରେ ୪ର୍ଥ ସ୍ଥାନ ବଜାୟ ରଖିଛି। ଦଳକୁ ପ୍ଲେ-ଅପ୍ରେ ଯାଗା ପାଇବାକୁ ହେଲେ ପରବର୍ତ୍ତୀ ତଥା ଅନ୍ତିମ ମ୍ୟାଚ୍ରେ ବିଜୟ ହାସଲ କରିବାକୁ ପଡ଼ିବ।