ନୂଆଦିଲ୍ଲୀ,୧୩।୧୦: ଭାରତ ଏବଂ ପାକିସ୍ତାନ ମଧ୍ୟରେ ହେବାକୁ ଥିବା ବିଶ୍ୱକପ୍ ମ୍ୟାଚ ପୂର୍ବରୁ ଶୁବମନ ଗିଲ୍ ଆଇସିସି ପୁରସ୍କାର ନିଜ ନାଁରେ କରିଛନ୍ତି। ସେପ୍ଟେମ୍ବର ମାସର ଶ୍ରେଷ୍ଠ ପୁରୁଷ କ୍ରିକେଟର ଭାବେ ତାଙ୍କୁ ମନୋନୀତ କରାଯାଇଛି। ସେପ୍ଟେମ୍ବରରେ ଦିନିକିଆ ହାରାହାରି ୮୦ରେ ୪୮୦ ରନ ସ୍କୋର କରି ଏହି ରେକର୍ଡ କରିଛନ୍ତି। ଗିଲ୍ଙ୍କ ବ୍ୟତୀତ ମହମ୍ମଦ ସିରାଜ ଏବଂ ଡେଭିଡ ମାଲାନ ମଧ୍ୟ ଏହି ପୁରସ୍କାର ପାଇବା ପାଇଁ ଦୌଡ଼ରେ ଥିଲେ, କିନ୍ତୁ ଶେଷରେ ଗିଲ୍ ବାଜି ମାରିନେଇଛନ୍ତି। ଏହି ପୁରସ୍କାର ଭାରତ-ପାକିସ୍ତାନ ମ୍ୟାଚ ପୂର୍ବରୁ ତାଙ୍କ ଆତ୍ମବିଶ୍ୱାସ ବଢାଇବ।
ଓପନିଂ ବ୍ୟାଟ୍ସମ୍ୟାନ ଏସିଆ କପରେ ହାରାହାରି ୭୫.୫ରେ ୩୦୨ରନ ସଂଗ୍ରହ କରିଥିଲେ, ଯେଉଁଥିରେ ଫାଇନାଲରେ କରିଥିବା ଅପରାଜିତ ୨୭ ରନ୍ ସାମିଲ ଥିଲା। ଫାଇନାଲରେ ଭାରତ ଶ୍ରୀଲଙ୍କାକୁ ୧୦ ଉଇକେଟ୍ରେ ପରାସ୍ତ କରିଥିଲା। ଏହି ଟୁର୍ନାମେଣ୍ଟରେ ଗିଲ୍ ସର୍ବାଧିକ ରନ ସ୍କୋରର ହୋଇଥିଲେ। ଅଷ୍ଟ୍ରେଲିଆ ବିପକ୍ଷ ଦୁଇଟି ଇନିଂସରେ ୧୭୮ରନ ସ୍କୋର କରି ଗିଲ୍ ମାସର ସର୍ବଶ୍ରେଷ୍ଠ ଭାବରେ ତାଙ୍କର ଦାବିକୁ ଆହୁରି ଦୃଢ କରିଥିଲେ। ଏହା ସହିତ ସେ ବିଶ୍ୱକପ୍ ପାଇଁ ପ୍ରସ୍ତୁତିର ସଙ୍କେତ ମଧ୍ୟ ଦେଇଥିଲେ।