ବଲାଙ୍ଗୀର ଅଫିସ/ଦେଓଗାଁ,୧୨ା୧: ଆଦିବାସୀଙ୍କ ପ୍ରସିଦ୍ଧ ଶୂଲିଆ ଯାତ୍ରା ଆସନ୍ତା ୧୯ତାରିଖ ପୌଷଶୁକ୍ଳ ପକ୍ଷ ପ୍ରଥମ ମଙ୍ଗଳବାର ବଲାଙ୍ଗୀର ଜିଲା ଖଇରଗୁଡା ବଡଖଳା ଓ କୁମରିଆ ସାନଖଳାଠାରେ ପାରମ୍ପରିକ ରୀତିନୀତିରେ ପାଳନ କରାଯିବ। କୋଭିଡ ମହାମାରୀକୁ ଦୃଷ୍ଟିରେ ରଖି ଶ୍ରଦ୍ଧାଳୁଙ୍କ ସୁରକ୍ଷା ପାଇଁ ଚଳିତବର୍ଷ କେବଳ ପାରମ୍ପରିକ ପୂଜାବିଧି ଓ ବଳି ପକାଯିବ। ମାତ୍ର ମହୋତ୍ସବ ହେବ ନାହିଁ ବୋଲି ମିଳିତ ଶୂଲିଆ ଯାତ୍ରା ପୂଜା କମିଟି ପକ୍ଷରୁ ସୂଚନା ଦିଆଯାଇଛି। ପୂଜା କମିଟି ସଭାପତି ମୟ ପ୍ରଧାନୀଙ୍କ ସଭାପତିତ୍ୱରେ ଖଇରଗଡା ବଡଖଳାଠାରେ ମଙ୍ଗଳବାର ଏକ ବୈଠକ ଅନୁଷ୍ଠିତ ହୋଇଥିଲା। ଏଥିରେ ଶୂଲିଆ ପୂଜାର ମୁଖ୍ୟ ପୂଜକ ସୋମନାଥ ଦେହେରିଆ, ଉତ୍କଳ ଆଦିକନ୍ଧ ସମାଜର ରାଜ୍ୟ ସଭାପତି ଚିନ୍ତାମଣି ଭୋଇ, ସୁଲିଆ ଟ୍ରଷ୍ଟର ମୁଖ୍ୟ ଟ୍ରଷ୍ଟି ବିରଞ୍ଚତ୍ କୁଅଁର, କପୁର୍ଚ୍ଚନ ଭୋଇ, ପ୍ରସନ୍ନ ପ୍ରଧାନୀ, ଅନନ୍ତ ଦେହେରୀ, ଦିଲୀପ କୁଅଁର, ରାଜେନ୍ଦ୍ର ପାଣି, ପପୁ ପାତ୍ର, ଅନନ୍ତ ଚୌହାନ, ପ୍ରଫୁଲ୍ଲ ଦାସ, ସତ୍ୟ କାଲସାଏ, ସୂର୍ଯ୍ୟ ରଣା, ପ୍ରଦୀପ କୁମର ମାଝି ଉପସ୍ଥିତ ଥିଲେ। ସଭାପତି ପଧାନୀ କହିଥିଲେ ଯେ, ପାରମ୍ପରିକ ପୂଜାବିଧି ପାଳନ କରାଯିବ। ୧୮ ତାରିଖ ସୋମବାରଠାରୁ ନିଶିପୂଜା, ମଙ୍ଗଳବାର ଖଇରଗୁଡା ବଡଖଳାରେ ଶୂଲିଆ ବୁଢ଼ାଙ୍କ ପାରମ୍ପରିକ ପୂଜାର୍ଚ୍ଚନା କରାଯିବ। ମାନସିକଧାରୀମାନେ ଯାହା ଅର୍ପଣ କରିବାକୁ ଆଣିବେ ସେସବୁ ଅର୍ପଣ କରାଯିବ। କୁକଡା, ବୁକା, ଗର୍ରା, ପୋଢ଼ ବଳି ପଡିବ ବୋଲି ସେ ସୂଚନା ଦେଇଛନ୍ତି। କୋଭିଡ କଟକଣା ଯୋଗୁଁ ଶ୍ରଦ୍ଧାଳୁମାନେ ଶୃଙ୍ଖଳାର ସହ ଧାଡିବାନ୍ଧି, ସାମାଜିକ ଦୂରତା ରଖି, ମାସ୍କ ପିନ୍ଧି ପୂଜାସ୍ଥଳକୁ ଆସିପାରିବେ। ପୂଜା କମିଟିର ପାରମ୍ପରିକ ବାଜା ସହ ଅନ୍ୟ କୌଣସି ଲୋକେ ସେଠାରୁ ବାଜା ନେଇ ପାରିବେ ନାହିଁ। ପ୍ରଶାସନ ସହ ପୂଜା କମିଟିର ଏଯାଏଁ କୌଣସି ଆଲୋଚନା ହୋଇନାହିଁ। ଶାନ୍ତିଶୃଙ୍ଖଳା ରକ୍ଷା ଓ କୋଭିଡ ଗାଇଡଲାଇନ୍ ପାଳନ ଦିଗରେ ପ୍ରଶାସନର ସହଯୋଗ ନିଆଯିବ ବୋଲି ପଧାନୀ କହିଥିଲେ।