ଅନୁଗୋଳ ଅଫିସ୍, ୬ା୭: କରୋନା ସଂକ୍ରମଣ ରୋକିବା ପାଇଁ ଅନୁଗୋଳ ଜିଲା ପ୍ରଶାସନ ପକ୍ଷରୁ ଚଳିତମାସରୁ ପ୍ରତି ଶନିବାର ଓ ରବିବାରକୁ ଶଟ୍ଡାଉନ ଘୋଷଣା କରାଯାଇଛି। କଟକଣା ଉଲ୍ଲଂଘନ କଲେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ଚେତାବନୀ ଦିଆଯାଇଛି। ହେଲେ ରବିବାର ଅନୁଗୋଳ ସହର ଉପକଣ୍ଠର ଅନେକ ସ୍ଥାନରେ ଲୋକେ ଏହି କଟକଣାକୁ ମାନି ନ ଥିବା ଦେଖାଯାଇଛି। ଛେଳିଆପଡ଼ାରେ ରାସ୍ତା ଉପରେ ପରିବା ବିକ୍ରି ବେଳେ ପ୍ରବଳ ଗହଳି ହୋଇଥିଲା। ସେହିପରି ଖୋଲାଥିବା ଏକ ଚା’ ଦୋକାନକୁ ପୋଲିସ ସିଲ୍ କରିଥିଲା।
ଅନୁଗୋଳ ଜିଲାରେ କରୋନା ପଜିଟିଭ୍ ସଂଖ୍ୟା ୧୦୦ ପାର ହୋଇସାରିଲାଣି। ପ୍ରତିଦିନ ସଂକ୍ରମିତଙ୍କ ସମ୍ପର୍କରେ ତଥ୍ୟ ମିଳୁଥିବାରୁ ଆଗାମୀ ଦିନରେ ସଂଖ୍ୟା ଆହୁରି ବୃଦ୍ଧି ପାଇବ ବୋଲି ଆକଳନ କରାଯାଉଛି। ବିଶେଷକରି ଶିଳ୍ପସଂସ୍ଥାଗୁଡ଼ିକରୁ ଅଧିକ ସଂକ୍ରମିତ ବାହାରୁଥିବାରୁ ଏହା ଏବେ ପ୍ରଶାସନର ଚିନ୍ତାର କାରଣ ହୋଇଛି। ତେଣୁ ସ୍ଥିତି ନିୟନ୍ତ୍ରଣ ପାଇଁ ପ୍ରତି ସପ୍ତାହର ଶନିବାର ଓ ରବିବାର ୨ ଦିନ ଜିଲାକୁ ଶଟ୍ଡାଉନ୍ ରଖାଯିବାକୁ ପ୍ରଶାସନ ଘୋଷଣା କରିଥିଲେ ବି ଏହାକୁ ଠିକ୍ ଭାବେ ପାଳନ କରାଯାଉ ନାହିଁ। କଟକଣା ଲଗାଇବା ସହ ପ୍ରଶାସନ ଯେତିକି କଠୋର ହେଉଛି, ଲୋକମାନେ ସେତେ ଗଳା ବାଟ ଖୋଜୁଥିବା ଦେଖାଯାଉଛି। ରବିବାର ଶଟ୍ଡାଉନ ପାଇଁ ସହର ରାସ୍ତା ଖଁା ଖଁା ଥିଲା। ହେଲେ ଉପକଣ୍ଠ ଅଞ୍ଚଳର ସାହି, ଗଁା ରାସ୍ତାରେ ଲୋକମାନେ ଖଟି କରୁଥିବା ଦେଖାଯାଇଥିଲା। ଛେଳିଆପଡ଼ା ଛକରେ ପନିପରିବା ବିକ୍ରି ହେଉଥିବା ବେଳେ ଚା’ ଓ ଜଳଖିଆ ଦୋକାନ ଖୋଲା ରହିଥିଲା। ଏ ନେଇ ଖବର ମିଳିବା ପରେ ପୋଲିସ ପହଞ୍ଚି ଲୋକଙ୍କୁ ଘଉଡ଼ାଇଥିଲା। ପରେ ଏସ୍ପି ଜଗମୋହନ ମୀନା ଚା’ ଦୋକାନକୁ ସିଲ୍ କରିଥିଲେ। ସେହିପରି ଜରାସିଂହା ଅଞ୍ଚଳର କେତେଜଣ ଯୁବକ ଭୋଜି କରିବାକୁ ବାହାରିଥିଲେ। ଏହି ସମୟରେ ପୋଲିସ ପହଞ୍ଚତ୍ବାରୁ ସେମାନେ ଦୌଡ଼ି ପଳାଇଥିଲେ। ପୋଲିସ ସେଠାରୁ ଗ୍ୟାସ୍ ସିଲିଣ୍ଡର, ହାଣ୍ଡି ଡେକିଚି ଆଦି ଜବତ କରି ଥାନାକୁ ଆଣିଥିଲା।