ଭୁବନେଶ୍ୱର,୨୯।୮(ବ୍ୟୁରୋ): ଆଉ ଗୋଟିଏ ଦିନ ରାଜ୍ୟରେ ଅଗଷ୍ଟ ମାସର କରୋନା ଗାଇଡ଼ଲାଇନ ଶେଷ ହେବ। ସେପ୍ଟେମ୍ବର ମାସରେ ରାଜ୍ୟ ସରକାର କ’ଣ ପଦକ୍ଷେପ ନେବେ ତାହା ଏବେ ସମସ୍ତଙ୍କ ନଜର। ଯଦିଓ ଏବେ ସାଧାରଣ ଲୋକଙ୍କ ପାଇଁ ଯିବା ଆସିବା ଠାରୁ ଫିଲ୍ମ ହଲ୍, ମଲ୍, ମାର୍କେଟ୍ ସବୁ ଖୋଲଛି, ତଥାପି ନାଇଟ୍ କର୍ଫ୍ୟୁ ଓ ସଟ୍ଡାଉନ କଟକଣା ବଳବତ୍ତର ରହିଛି।
ବର୍ତ୍ତମାନ କେବଳ ଭୁବନେଶ୍ୱର, କଟକ ଓ ପୁରୀରେ ଶନିବାର ଏବଂ ରବିବାର ଶଟ୍ଡାଉନ୍ ଜାରି ରହିଛି। ସେପ୍ଟେମ୍ବର କିମ୍ବା ଅକ୍ଟୋବରରେ ତୃତୀୟ ଲହର ଆସିବ ବୋଲି ଆକଳନ କରାଯାଉଥିବା ବେଳେ ରାଜ୍ୟରେ ସଂକ୍ରମଣ ସଂଖ୍ୟାକୁ ଦେଖି ସରକାର ସେପ୍ଟେମ୍ବର ଗାଇଡ଼ଲାଇନ ଜାରି କରିପାରନ୍ତି ବୋଲି ଆଶା କରାଯାଉଛି।
ଅଗଷ୍ଟ ୨୦ରୁ ରାଜ୍ୟରେ ଦୈନିକ ସଂକ୍ରମଣ ଏକ ହଜାର ତଳକୁ ରହିଛି। କିନ୍ତୁ ଖୋର୍ଦ୍ଧା ଜିଲା ସକ୍ରିୟ ରୋଗୀ ସଂଖ୍ୟାରେ ଏବେ ବି ରେଡ୍ ଜୋନ୍ରେ ରହିଛି। ରାଜ୍ୟର ସର୍ବାଧିକ ଏବଂ ପ୍ରାୟ ଅଧା ସଂକ୍ରମିତ କେବଳ ଏହି ଜିଲାରେ ରହିଛନ୍ତି। ରାଜ୍ୟରେ ୭,୮୨୦ଜଣ ସକ୍ରିୟ ରୋଗୀ ଥିବା ବେଳେ କେବଳ ଖୋର୍ଦ୍ଧା ଜିଲାରେ ଅଛନ୍ତି ୩,୦୮୦ଜଣ ସକ୍ରିୟ ରୋଗୀ। ଆଉ ରାଜ୍ୟରେ ସଂକ୍ରମଣ ହାର ୧.୨୪% ଥିବା ବେଳେ ଖୋର୍ଦ୍ଧା ଜିଲାରେ ୩.୧% ରହିଛି। ତେଣୁ ଖୋର୍ଦ୍ଧା ଜିଲାରେ କଟକଣାରେ କୌଣସି ପରିବର୍ତ୍ତନ ହୋଇ ନ ପାରେ ବୋଲି ଆଶଙ୍କା କରାଯାଉଛି।
ସବୁଠାରୁ ବଡ଼ କଥା ହେଲା ଖୋର୍ଦ୍ଧା ଜିଲାରେ ଦୈନିକ ଚିହ୍ନଟ ହେଉଥିବା ଆକ୍ରାନ୍ତଙ୍କ ମଧ୍ୟରୁ ଭୁବନେଶ୍ୱରରୁ ପ୍ରାୟ ୮୫% ଆକ୍ରାନ୍ତ ରହୁଛନ୍ତି। ଭୁବନେଶ୍ୱରରେ ଲୋକେ କଟକଣା ମାନୁ ନ ଥିବାରୁ ଏବଂ ରସ୍ତାଘାଟ ଓ ବଜାରରେ ଭିଡ଼ ଜମାଉଥିବାରୁ ସଂଖ୍ୟା ଅଧିକ ରହୁଛି ବୋଲି ସ୍ବାସ୍ଥ୍ୟ ବିଭାଗ କହୁଛି।