ଶ୍ୟାମ ପ୍ରକାଶ ସେନାପତି। ଜନ୍ମ ୭ ଜୁଲାଇ ୧୯୭୦ମସିହାରେ। ପିତା-ଡାକ୍ତର ବଂଶୀଧର ସେନାପତି, ମା’ ବିଷ୍ଣୁପ୍ରିୟା ସେନାପତି, ଘର ପୁରୀ ବଡ଼ଦାଣ୍ଡ ସେନାପତି ଭବନ। ସ୍କୁଲ ବୟସରୁ ଶ୍ୟାମପ୍ରକାଶ ଏଯାଏ ସାଇତି ରଖିଛନ୍ତି ଅନେକ ସେଲିବ୍ରିଟି, ରାଜନେତା, କବି, ଲେଖକ ଆଦି ଯଶ୍ୱସୀ ବ୍ୟକ୍ତିଙ୍କ ବିରଳ ଫଟୋ। ପୁଣି ଦେଶ ବିଦେଶର ପ୍ରଚଳିତ ଅନେକ ନୋଟ ଓ ମୁଦ୍ରା ମଧ୍ୟ। ଭାରତ ସରକାରଙ୍କ ସଙ୍ଗୀତ ନାଟକ ବିଭାଗ, ପୂର୍ବାଞ୍ଚଳ ସାଂସ୍କୃତିକ କେନ୍ଦ୍ର ଏବଂ ରାଜ୍ୟ ସରକାରଙ୍କ ସଂସ୍କୃତି ଓ ପର୍ଯ୍ୟଟନ ବିଭାଗ ଦ୍ୱାରା ସଂଯୋଜକଭାବେ ଓଡ଼ିଶା ଓ ଓଡ଼ିଶା ବାହାରେ ଅନେକ ସାଂସ୍କୃତିକ କାର୍ଯ୍ୟକ୍ରମରେ ଯୋଗଦାନ କରିଥିବା ଶ୍ୟାମପ୍ରକାଶଙ୍କର ଲେଖାଲେଖିରେ ରହିଛି ବେଶ୍ ରୁଚି। ଅନେକ ପତ୍ରପତ୍ରିକାରେ ତାଙ୍କର ବହୁ ଲେଖା ପ୍ରକାଶିତ ହେବା ସହ ତାଙ୍କର ଅନେକ କବିତା ସଂକଳନ ମଧ୍ୟ ପ୍ରକାଶ ପାଇଛି। ରାଜ୍ୟସ୍ତରୀୟ ଶିଶୁସାହିତ୍ୟ ପୁରସ୍କାର (୧୯୮୩), ଇନ୍ଦିରା ଯୁବ ମେମୋରିଆଲ ସାଂସ୍କୃତିକ ସେବା ସଂସଦ ପୁରସ୍କାର, ଶ୍ରୀକ୍ଷେତ୍ର ସମ୍ମାନ, ନାଗପୁରରୁ ସଂସ୍କାର ଭାରତୀ ସମ୍ମାନ, ନୀଳଚକ୍ର ସେବା ସାଂସ୍କୃତିକ ଅନୁଷ୍ଠାନରୁ ଯୁବପ୍ରତିଭା ସମ୍ମାନ, କୋଣାର୍କ ସାହିତ୍ୟ ଉତ୍ସବ ସଂଗଠନ ସମ୍ମାନ, ବରଗଡ଼ ଧନୁଯାତ୍ରା ମହୋତ୍ସବ କମିଟି ସମ୍ମାନ, କଲିକତାଠାରେ ଆୟୋଜିତ ଆନ୍ତଃ ରାଜ୍ୟ ସାଂସ୍କୃତିକ ବିନିମୟ କାର୍ଯ୍ୟକ୍ରମ ଆଦିରୁ ମିଳିଛି ତାଙ୍କୁ ବହୁ ପୁରସ୍କାର ଓ ସମ୍ମାନ। ପୁରୀରେ ହେଉଥିବା ବିଭିନ୍ନ ସାହିତ୍ୟ ଓ ସାଂସ୍କୃତିକ କାର୍ଯ୍ୟକ୍ରମରେ ଯୋଗ ଦେବା ସହ କାର୍ଯ୍ୟକ୍ରମକୁ ସୂଚାରୁରୂପେ ସମ୍ପାଦନା କରିବାର ଦାୟିତ୍ୱ ବି ସେ ନେଇଥାନ୍ତି। ତେବେ ପୁରୀକୁ ଯେବେ ଯେଉଁ ବିଶିଷ୍ଟ ବ୍ୟକ୍ତିମାନେ ଆସନ୍ତି ସେମାନଙ୍କ ସହିତ ଫଟୋଉଠାଇବା ସହ ତାହାକୁ ସାଇତି ରଖିବାରେ ସେ ପାଆନ୍ତି ଅପାର ଆନନ୍ଦ। ଯେଉଁମାନଙ୍କ ଭିତରେ ପୁରୀ ଗଜପତି, ଜଗତ୍ଗୁରୁ ଶଙ୍କରାଚାର୍ଯ୍ୟଙ୍କଠାରୁ ଆରମ୍ଭ କରି ଅମିତାଭ ବଚ୍ଚନ, ରାଜେଶ ଖାନ୍ନା, ବାବା ରାମଦେବ, ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀଙ୍କ ପରି ଶତାଧିକ ବିଶିଷ୍ଟ ବ୍ୟକ୍ତିବିଶେଷ ରହିଛନ୍ତି। କେବଳ ସେତିକି ନୁହେଁ ବିଭିନ୍ନ ସୁରକ୍ଷା କାର୍ଯ୍ୟପାଇଁ ପ୍ରକୃତି ବନ୍ଧୁ ପୁରସ୍କାର ସମେତ ବିଭିନ୍ନ ଅନୁଷ୍ଠାନରୁ ତାଙ୍କୁ ମିଳିଛି ଶତାଧିକ ପୁରସ୍କାର ଓ ସମ୍ମାନ; ଯେଉଁଥିରେ ରଘୁରାଜପୁର ବସନ୍ତ ଉତ୍ସବ ସମ୍ମାନ, ରାଜ୍ୟପାଳଙ୍କଠାରୁ ଯୁବପ୍ରତିଭା ପୁରସ୍କାର ହେଉଛି ଅନ୍ୟତମ। ଏବେ ସେ ପୁରୀର ବିଭିନ୍ନ ସାଂସ୍କୃତିକ ଅନୁଷ୍ଠାନର ଜଣେ ଆଗଧାଡ଼ିର କାର୍ଯ୍ୟକର୍ତ୍ତା ଭାବେ କାର୍ଯ୍ୟ କରୁଛନ୍ତି।
-ବନବିହାରୀ ବେହେରା
