କଟକ ଅଫିସ,୧୧ା୨: ଓଡ଼ିଶା ପୋଲିସ ସବ୍ଇନ୍ସପେକ୍ଟର (ଏସ୍ଆଇ) ନିଯୁକ୍ତି ନେଇ ୨୦୨୧ ଜୁନ୍ ୨୨ତାରିଖରେ ପ୍ରକାଶିତ ବିଜ୍ଞପ୍ତି ଉପରେ ଓଡ଼ିଶା ହାଇକୋର୍ଟ ଅନ୍ତରୀଣ ରହିତାଦେଶ ଦେଇଛନ୍ତି। ଅଦାଲତଙ୍କ ଅନ୍ୟାଦେଶ ପର୍ଯ୍ୟନ୍ତ ଏହି ବିଜ୍ଞପ୍ତି ଉପରେ କୌଣସି ପଦକ୍ଷେପ ଗ୍ରହଣ କରାଯାଇପାରିବ ନାହିଁ ବୋଲି କୋର୍ଟ ସ୍ପଷ୍ଟ କରିଛନ୍ତି। ବିଚାରପତି ଶୁଭାଶିଷ ତାଳପତ୍ର ଓ ବିଚାରପତି ସାବିତ୍ରୀ ରଥଙ୍କ ଖଣ୍ଡପୀଠ ଶୁକ୍ରବାର ମାମଲାର ଶୁଣାଣି କରି ନିଯୁକ୍ତି କ୍ଷେତ୍ରରେ ସର୍ବାଧିକ ବୟସ ସୀମା ବୃଦ୍ଧି ସମ୍ପର୍କିତ ୨୦୨୨ ଜାନୁୟାରୀ ୧୫ତାରିଖର ବିଜ୍ଞପ୍ତିକୁ କାହିଁକି ରଦ୍ଦ କରା ନ ଯିବ, ସେନେଇ ଜବାବ ଦେବାକୁ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ମାମଲାର ପରବର୍ତ୍ତୀ ଶୁଣାଣି ମାର୍ଚ୍ଚ ୯ ତାରିଖକୁ ଧାର୍ଯ୍ୟ କରାଯାଇଛି। ମାମଲାର ବିବରଣୀ ଅନୁଯାୟୀ, କୋଭିଡ୍ ଯୋଗୁ ୨୦୨୧, ୨୦୨୨, ୨୦୨୩ରେ ହୋଇପାରି ନ ଥିବା ନିଯୁକ୍ତି ପରୀକ୍ଷା ନିମନ୍ତେ ସରକାର ସର୍ବାଧିକ ବୟସ ସୀମା ୩୨କୁ ବଢ଼ାଇଥିଲେ। ପୁଣି ୧୫।୧।୨୦୨୨ରେ ଆଉ ଏକ ବିଜ୍ଞପ୍ତି ପ୍ରକାଶ କରି କହିଲେ ଯେଉଁ ଆବେଦନକାରଙ୍କ ନିମନ୍ତେ ନିଯୁକ୍ତି ବିଜ୍ଞପ୍ତି ବାହାରିଥିବ ଓ ଆବେଦନର ଶେଷ ତାରିଖ ଥିବ ସେହିମାନଙ୍କ କ୍ଷେତ୍ରରେ ବର୍ଦ୍ଧିତ ସର୍ବାଧିକ ବୟସ ସୀମା ଲାଗୁ ହେବ। ହେଲେ ରାଜ୍ୟ ସରକାରଙ୍କ ଗୃହ ବିଭାଗ ପକ୍ଷରୁ ପୋଲିସ ଏସ୍ଆଇ ନିଯୁକ୍ତି ନିମନ୍ତେ ୨୦୨୧ ଜୁନ୍ ୨୨ ତାରିଖରେ ପ୍ରକାଶିତ ବିଜ୍ଞପ୍ତି ଆବେଦନର ପରୀକ୍ଷା ଏଯାଏ ହୋଇ ନ ଥିବାରୁ ଏହି ବର୍ଦ୍ଧିତ ସର୍ବାଧିକ ବୟସ ସୀମା ନିୟମ ଆବେଦନକାରୀଙ୍କ ପାଇଁ କାହିଁକି ଲାଗୁ କରାନଯିବ ବୋଲି ଆବେଦନରେ ଦର୍ଶାଯାଇଛି। ଆବେଦନକାରୀଙ୍କ ପକ୍ଷରୁ ଆଇନଜୀବୀ ବିପ୍ଲବ ବାହାଲି ମାମଲା ପରିଚାଳନା କରୁଛନ୍ତି।