କଟକ ଅଫିସ,୧୯ା୧୦: ମାଟ୍ରିକ ପରୀକ୍ଷା ଚାଲିଥିଲା। ଦୁଇଟି ବିଷୟର ପରୀକ୍ଷା ବାକି ଥିବାବେଳେ ହଠାତ୍ ଅସୁସ୍ଥ ହୋଇ ପଡ଼ିଥିଲେ ମୋନାଲିସା। ଦେହ, ହାତ ଥରିବାକୁ ଲାଗିଲା। ପରୀକ୍ଷା ବାହାନାରେ ଝିଅ ଏଭଳି ଆଚରଣ କରୁଛି ବୋଲି ପରିବାର ଲୋକେ ଚିନ୍ତା କରିଥିଲେ। ମାତ୍ର ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରିବାରୁ ଏହା ରୁବେଲା ଏବଂ ସୁବାକ୍ବୁଟ ସ୍କିଲରୋଜିଙ୍ଗ ପାନେନସେଫାଲାଇଟିସ(ଏସ୍ଏସ୍ପିଇ) ରୋଗ ବୋଲି ଡାକ୍ତର କହିଥିଲେ। ଏହା ଏକ ମସ୍ତିଷ୍କ ରୋଗ। ଯାହା କେବଳ ମେଡିସିନ ଦ୍ୱାରା ହିଁ ଭଲ ହେବ। ୨୦୧୭ ମାର୍ଚ୍ଚରୁ ଏହି ରୋଗରେ ଆକ୍ରାନ୍ତ ହୋଇ ଝିଅ ଶଯ୍ୟାଶାୟୀ ଥିବାବେଳେ ଆର୍ଥିକ ଦୁରବସ୍ଥା ଯୋଗୁ ପରିବାର ଲୋକେ ଚିକିତ୍ସା ଯୋଗାଇ ପାରୁନାହାନ୍ତି।
ମଙ୍ଗଳାବାଗ ଥୋରିଆସାହିର ତ୍ରିଲୋଚନ ସେଠୀ ଓ ସଞ୍ଜୁକ୍ତା ସେଠୀଙ୍କ ଏକମାତ୍ର ଝିଅ ମୋନାଲିସା ପିଲାଟି ବେଳୁ ଅଲିଅଳିରେ ବଢ଼ିଥିଲେ। ତ୍ରିଲୋଚନ ବକ୍ସିବଜାରର ଗୋଟିଏ ଦୋକାନରେ କାର୍ଯ୍ୟ କରନ୍ତି। ମାସକୁ ଆୟ ପାଖାପାଖି ୧୫ ହଜାର ଟଙ୍କା। ଏହି ଟଙ୍କାରେ ୩ ପ୍ରାଣୀ କୁଟୁମ୍ବଙ୍କୁ ନେଇ ଚଳିବାକୁ ପଡେ। ହେଲେ ୨୦୧୭ରୁ ଦୁଃଖର କଳାବାଦଲ ଯେପରି ତାଙ୍କ ସଂସାର ଉପରେ ମାଡ଼ି ବସିଛି। ମୋନାଲିସା ପିଲାଟି ବେଳୁ ଭଲ ପାଠ ପଢୁଥିଲେ ବୋଲି ତ୍ରିଲୋଚନ କହିଛନ୍ତି। ମାଟ୍ରିକ ପରୀକ୍ଷା ପାଇଁ ପ୍ରସ୍ତୁତି ମଧ୍ୟ ଜୋରଦାର ଚଳାଇଥିଲେ। ହେଲେ ପରୀକ୍ଷା ମଝିରୁ ତାଙ୍କର ଦେହ ଖରାପ ହୋଇଗଲା। ସାଢେ ୩ ବର୍ଷ ଭିତରେ ଲକ୍ଷାଧିକ ଟଙ୍କା ଖର୍ଚ୍ଚ ସରିଲାଣି, ହେଲେ ଝିଅର ସ୍ବାସ୍ଥ୍ୟାବସ୍ଥାରେ ଉନ୍ନତି ପରିଲକ୍ଷିତ ହେଉନାହିଁ। ଓଡ଼ିଶାର ବହୁ ପ୍ରତିଷ୍ଠିତ ମେଡିକାଲକୁ ଯାଇ ଏ ନେଇ ଡାକ୍ତରଙ୍କ ସହିତ ଆଲୋଚନା କରିଥିଲେ ମଧ୍ୟ କୌଣସି ସୁଫଳ ମିଳିଲା ନାହିଁ। ତ୍ରିଲୋଚନ ନିଜର ଜଣେ ସମ୍ପର୍କୀୟଙ୍କୁ ଠାରୁ ଜାଣିବାକୁ ପାଇଲେ କି ରାଞ୍ଚିର ନିଦାନ ସେବା ସଦନ ମେଡିକାଲରେ ଏଭଳି ଲକ୍ଷଣ ଥିବା ରୋଗୀଙ୍କ ଚିକିତ୍ସା କରାଯାଉଛି। ସେ ଝିଅକୁ ନେଇ ଉକ୍ତ ମେଡିକାଲକୁ ଯାଇଥିଲେ ଓ ଡାକ୍ତରଙ୍କ ସହ ଚିକିତ୍ସା ସମ୍ପର୍କରେ ପରାମର୍ଶ କରିଥିଲେ। କିଛିଦିନ ମେଡିସିନ ଖାଇବା ପରେ ସ୍ବାସ୍ଥ୍ୟବସ୍ଥାରେ ଅଳ୍ପମାତ୍ରାରେ ସୁଧାର ଆସିଲା। ହେଲେ ପ୍ରତିମାସରେ ମେଡିସିନ ବାବଦକୁ ଟଙ୍କା ଖର୍ଚ୍ଚ କରିବା ତ୍ରିଲୋଚନଙ୍କ ପକ୍ଷରେ କଷ୍ଟକର ହୋଇପଡିଲା। ମୋନାଲିସା ଏବେ ଦିନରାତି ଗୋଟିଏ ଶଯ୍ୟାରେ ପଡ଼ି ରହୁଛନ୍ତି। ନା କିଛି କହୁଛନ୍ତି ନା କରୁଛନ୍ତି। କେବଳ ଶାରୀରିକ ପୀଡ଼ା ପାଇ ଚିତ୍କାର କରୁଛନ୍ତି। ଯାହା ଏହି ଅଭାବୀ ଦମ୍ପତିଙ୍କୁ ଅସ୍ତବ୍ୟସ୍ତ କରିସାରିଲାଣି। ଲକ୍ଡାଉନ ପରଠାରୁ ରୋଜଗାର କମିଯାଇଛି ବୋଲି ତ୍ରିଲୋଚନ କହିଛନ୍ତି। ଝିଅକୁ ଦୁଇମାସକୁ ଥରେ ରାଞ୍ଚି ମେଡ଼ିକାଲକୁ ନେଇ ଯାଉଛନ୍ତି। ଗୋଟିଏ ଥର ଗଲେ ସମସ୍ତ ବାବଦକୁ ପ୍ରାୟ ୩୨ହଜାର ଖର୍ଚ୍ଚ ହେଉଛି। ଧାରକରଜରେ ଝିଅର ଚିକିତ୍ସା କରାଇବା ସମ୍ଭବ ହେଉନାହିଁ। ଏଭଳି ପରିସ୍ଥିତିରେ ଯଦି କେହି ସହୃଦୟ ବ୍ୟକ୍ତି ସହାୟତାର ହାତ ବଢାନ୍ତି ତା’ ହେଲେ ମୋନାଲିସାଙ୍କ ଉତ୍ତମ ଚିକିତ୍ସା ହୋଇପାରିବ ବୋଲି ତ୍ରିଲୋଚନ କହିଛନ୍ତି।