ବେଙ୍ଗାଲୁରୁ,୫।୨: କର୍ନାଟକର ପୂର୍ବତନ ମୁଖ୍ୟମନ୍ତ୍ରୀ ତଥା କଂଗ୍ରେସ ନେତା ସିଦ୍ଦରମୈୟା ବିଧାନସଭା ନିର୍ବାଚନ ପୂର୍ବରୁ ଇମୋଶନାଲ୍ କାର୍ଡ ଖେଳିଛନ୍ତି। ଚଳିତ ବିଧାନସଭା ନିର୍ବାଚନ ତାଙ୍କର ଶେଷ ନିର୍ବାଚନ ହେବ। ଅବସର ପରେ ମଧ୍ୟ ସେ ରାଜନୀତିରେ ସକ୍ରିୟ ରହିବେ ବୋଲି ଘୋଷଣା କରିଛନ୍ତି।
କର୍ନାଟକରେ ବିଧାନସଭା ନିର୍ବାଚନ ପାଇଁ ସମସ୍ତ ଦଳ ଲାଗିପଡିଛନ୍ତି। ବିଭିନ୍ନ ଦଳର ନେତାମାନେ ସାଧାରଣ ସଭା କରୁଛନ୍ତି। ଏହି କ୍ରମରେ ସିଦ୍ଦରମୈୟା ବିଦାରରେ ଏକ ରାଲିକୁ ସମ୍ବୋଧିତ କରି କହିଥିଲେ, ଏହି ନିର୍ବାଚନ ତାଙ୍କର ଶେଷ ନିର୍ବାଚନ ହେବ। ନିର୍ବାଚନ ପରେ ମଧ୍ୟ ସେ ରାଜନୀତିରେ ସକ୍ରିୟ ରହିବେ।
୨୦୧୩-୨୦୧୮ର କାର୍ଯ୍ୟକାଳ ବିଷୟରେ ସିଦ୍ଦରମୈୟା କହିଛନ୍ତି,ଜନସାଧାରଣଙ୍କ ଆଶୀର୍ବାଦରେ ତାଙ୍କୁ ପାଞ୍ଚ ବର୍ଷ ପାଇଁ ମୁଖ୍ୟମନ୍ତ୍ରୀ ହେବାର ସୁଯୋଗ ମିଳିଥିଲା। ଦେବରାଜ ଉର୍ସଙ୍କ ପରେ ସିଦ୍ଦରମୈୟା ଦ୍ୱିତୀୟ ମୁଖ୍ୟମନ୍ତ୍ରୀ ଭାବେ ପାଞ୍ଚ ବର୍ଷର କାର୍ଯ୍ୟକାଳ ପୂରଣ କରିଥିଲେ।
ମେ ୨୦୨୩ ପୂର୍ବରୁ କର୍ନାଟକରେ ବିଧାନସଭା ନିର୍ବାଚନ ଅନୁଷ୍ଠିତ ହେବ। ୨୨୪ ସଦସ୍ୟ ବିଶିଷ୍ଟ ରାଜ୍ୟ ସଭାର କାର୍ଯ୍ୟକାଳ ୨୪ ମେ ୨୦୨୩ରେ ଶେଷ ହେବ।