ନୂଆଦିଲ୍ଲୀ,୧୬।୫ : କର୍ନାଟକରେ ହୋଇଥିବା ଅପମାନଜନକ ପରାଜୟରେ ଅସନ୍ତୁଷ୍ଟ ହୋଇ ଭାଜପା ଏହାର ସମସ୍ତ ଏମପିଙ୍କ ରିପୋର୍ଟ କାର୍ଡ ମାଗିଛି। ସମସ୍ତ ରାଜ୍ୟ ସଭାପତିଙ୍କୁ ଏକ ମାସ ମଧ୍ୟରେ ସମସ୍ତ ଏମପିଙ୍କ ଲୋକସଭା ନିର୍ବାଚନମଣ୍ଡଳୀରେ କରାଯାଇଥିବା କାର୍ଯ୍ୟର ସମୀକ୍ଷା କରିବା ସହ ଦଳର କେନ୍ଦ୍ରୀୟ ୟୁନିଟରେ ଏକ ରିପୋର୍ଟ ଦାଖଲ କରିବାକୁ ପଡିବ ବୋଲି ହାଇକମାଣ୍ଡ ନିର୍ଦ୍ଦେଶ ଦେଇଛନ୍ତି।
ଏମପିମାନଙ୍କ ରିପୋର୍ଟ କାର୍ଡ ସେମାନଙ୍କ ଲୋକସଭା ନିର୍ବାଚନମଣ୍ଡଳୀରେ କେନ୍ଦ୍ର ସରକାର କରିଥିବା କଲ୍ୟାଣ କାର୍ଯ୍ୟର ସ୍ଥିତି, ଜନସାଧାରଣଙ୍କ ମଧ୍ୟରେ ଏମପିଙ୍କ ଲୋକପ୍ରିୟତା, ନିର୍ବାଚନମଣ୍ଡଳୀରେ ବିତାଇଥିବା ସମୟ ଏବଂ ସୋସିଆଲ ମିଡିଆରେ ସେମାନଙ୍କର ସକ୍ରିୟତା ଆଧାରରେ ପ୍ରସ୍ତୁତ କରାଯିବ। ୨୦୨୪ରେ ଟିକେଟ ବଣ୍ଟନ ପାଇଁ ଏହା ଏକ ବଡ଼ ଆଧାର ହୋଇପାରେ ବୋଲି ଚର୍ଚ୍ଚା ହେଉଛି। ଏହା କର୍ନାଟକ ଫଳାଫଳର ସାଇଡ ଇଫେକ୍ଟ ଥିବା ରାଜନୈତିକ ସମୀକ୍ଷକ ମତପୋଷଣ କରିଛନ୍ତି। ଏହାପୂର୍ବରୁ ଏମପି ଏବଂ ମନ୍ତ୍ରୀମାନଙ୍କ ଠାରୁ ନିଜ ନିଜ କ୍ଷେତ୍ରରେ କରାଯାଇଥିବା କାର୍ଯ୍ୟ ବିଷୟରେ ସୂଚନା ମଗାଯାଇଥିଲା।
ଭାଜପା ପକ୍ଷରୁ ମେ ୩୦ ରୁ ଜୁନ ୩୦ ମଧ୍ୟରେ ଏକ ମାସ ପର୍ଯ୍ୟନ୍ତ ଚାଲିବାକୁ ଥିବା ‘ବିଶେଷ ଜନସମ୍ପର୍କ ଅଭିଯାନ’ ଅନ୍ତର୍ଗତ ଦେଶର ୩୯୬ ଲୋକସଭା ନିର୍ବାଚନମଣ୍ଡଳୀରେ ଜନସାଧାରଣଙ୍କ ସହିତ ଯୋଗାଯୋଗ କରାଯିବ। ଏହି ସମୟରେ ଏମପିଙ୍କ କ୍ଷେତ୍ରରେ କରାଯାଇଥିବା କାର୍ଯ୍ୟ ସମ୍ପର୍କରେ ସୂଚନା ରାଜ୍ୟର ଦଳ ସଂଗ୍ରହ କରିବେ। ଲୋକସଭା ନିର୍ବାଚନମଣ୍ଡଳୀରେ ଯେଉଁଠାରେ ଦଳର ସ୍ଥିତି ଦୁର୍ବଳ, ଆସନ୍ତା ଏକ ବର୍ଷ ମଧ୍ୟରେ ସେସବୁ ଉପରେ ବିଶେଷ ଧ୍ୟାନ ଦିଆଯିବ। ଦଳ ଏପରି ୭୦ ଟି ଲୋକସଭା ନିର୍ବାଚନମଣ୍ଡଳୀ ଚିହ୍ନଟ କରିଛି ଯେଉଁଠାରେ ଦଳ ଅଳ୍ପ ବ୍ୟବଧାନରେ ଜିତିଛି। ଏହି ସମସ୍ତ ଲୋକସଭା ନିର୍ବାଚନମଣ୍ଡଳୀରେ ସ୍ବତନ୍ତ୍ର କାର୍ଯ୍ୟ କରାଯିବ ଏବଂ ଜନସାଧାରଣଙ୍କ ସହ ଯୋଗାଯୋଗ ସ୍ଥାପନ କରାଯିବ।