ମୁମ୍ବାଇ: ବଲିଉଡ ଅଭିନେତା ସିଦ୍ଧାର୍ଥ ମାଲହୋତ୍ରା ଖୁବଶୀଘ୍ର ଓଟିଟିରେ ଡେବ୍ୟୁ କରିବାକୁ ଯାଉଛନ୍ତି । ନିର୍ଦ୍ଦେଶକ ରୋହିତ ସେଟ୍ଟିଙ୍କ ୱେବ ସିରିଜ ‘ଇଣ୍ଡିଆନ ପୋଲିସ ଫୋର୍ସ’ ମାଧ୍ୟମରେ ଅଭିନେତା ସିଦ୍ଧାର୍ଥ ମାଲହୋତ୍ରା ଓଟିଟି ଡେବ୍ୟୁ କରିବେ । ଏବେ ଏହାର ଶୁଟିଂ ଗୋଆରେ ଚାଲିଛି । ଶୁଟିଂ ସମୟରେ ସିଦ୍ଧାର୍ଥ ଆହତ ହୋଇଥିବା ଜଣାପଡିଛି । କାରଣ ଏହାର କିଛି ଫଟୋ ଓ ଭିଡିଓ ଓ ସୋସିଆଲ ମିଡିଆରେ ଶେୟାର କରି ଆହତ ହୋଇଥିବା ସୂଚନା ଦେଇଛନ୍ତି ।
ଫଟୋରେ ସଦ୍ଧାର୍ଥ ତାଙ୍କ ହାତରେ ଲାଗିଥିବା ଆଘାତକୁ ଦେଖାଉଛନ୍ତି । ଅଭିନେତାଙ୍କ ସହ ନିର୍ଦ୍ଦେଶକ ରୋହିତ ସେଟ୍ଟି ବି ନଜର ଆସିଛନ୍ତି । ଭିଡିଓରେ ସିଦ୍ଧାର୍ଥ ଆକ୍ସନ ସିନ୍ କରୁଥିବା ଦେଖାଯାଇଛି । ଆଉ ଏହି ସମୟରେ ସେ ଆହତ ହୋଇଛନ୍ତି । ଏହି ଭିଡିଓ ପୋଷ୍ଟ କରି ସିଦ୍ଧାର୍ଥ ଲେଖିଛନ୍ତି, ଆକ୍ସନ ହିରୋଙ୍କ ଅସଲ ଝାଳ, ଅସଲ ରକ୍ତ ସହ ସମାନ ହୋଇଥାଏ । ରୋହିତ ସାର୍ ଗୋଆରେ କିଛି ସାନଦାର ଆକ୍ସନ ସିନ ପାଇଁ କ୍ୟାମେରା ସମ୍ଭାଳୁଛନ୍ତି । ପ୍ରଶଂସକମାନେ ଏହି ଫଟୋ ଓ ଭିଡିଓକୁ ଖୁବ୍ ଲାଇକ୍ କରୁଛନ୍ତି । ଏହାସହ ନିଜ ଉପରେ ଧ୍ୟାନ ଦେବାକୁ ସେମାନେ ସିଦ୍ଧାର୍ଥଙ୍କୁ କହୁଛନ୍ତି ।
‘ଷ୍ଟୁଡେଣ୍ଟ ଅଫ ଦ ଇୟର’ରୁ ବଲିଉଡ ଜର୍ନି ଆରମ୍ଭ କରିଥିବା ସିଦ୍ଧାର୍ଥ ଏବେ ସୁଦ୍ଧା କିଛି ହିଟ୍ ମୁଭି ଦର୍ଶକଙ୍କୁ ଭେଟି ଦେଇଛନ୍ତି । ଇଣ୍ଡିଆ ପୋଲିସ ଫୋର୍ସ ୱେବ ସିରିଜ ସହ ସିଦ୍ଧାର୍ଥ ଯୋଦ୍ଧା ଓ ମିଶନ ମଜନୁରେ ନଜର ଆସିବେ । ପ୍ରଶଂସକ ଅଭିନେତାଙ୍କ ଏହି ଫିଲ୍ମକୁ ଉତ୍ସାହର ସହ ଅପେକ୍ଷା ରଖିଛନ୍ତି ।