ଚଣ୍ଡିଗଡ଼, ୨୪ ।୧: ଆସନ୍ତା ମାସରେ ହେବାକୁ ଥିବା ପଞ୍ଜାବ ବିଧାନସଭା ନିର୍ବାଚନକୁ ନେଇ ଏବେଠାରୁ ରାଜନୀତି ହେଲାଣି ସରଗରମ । ରବିବାର ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂ କହିଛନ୍ତି ପ୍ରଦେଶ କଂଗ୍ରେସ ଅଧ୍ୟକ୍ଷ ନବଜୋତ ସିଂ ସିଦ୍ଧୁଙ୍କର ବୁଦ୍ଧି ନାହିଁ । ପ୍ରାୟ ୫ ବର୍ଷ ପୂର୍ବେ ସେ ଏହି ଅକ୍ଷମ(ସିଦ୍ଧୁ) ବ୍ୟକ୍ତିଙ୍କୁ ଦଳରେ ସାମିଲ ନ କରିବା ପାଇଁ କହିଥିବା ପ୍ରକାଶ କରିଛନ୍ତି । କ୍ୟାପଟେନ କହିଛନ୍ତି ବର୍ତ୍ତମାନ ରାଜ୍ୟରେ ଅବୈଧ ବାଲି ଖନନ ମାମଲାରେ ମୁଖ୍ୟମନ୍ତ୍ରୀ ଚରଣଜିତ ସିଂ ଚନ୍ନି ଓ ଅନ୍ୟ କେତେଜଣ କଂଗ୍ରେସ ନେତା ସଂଶ୍ଳିଷ୍ଟ ଅଛନ୍ତି । ଏହି ସୂଚନା ମିଳିବା ପରେ ବି ଦଳ ପ୍ରତି ସେମାନଙ୍କର ନିଷ୍ଠା ଭାବନାକୁ ନେଇ କୌଣସି କାର୍ଯ୍ୟାନୁଷ୍ଠାନ ନିଆଯାଇ ନ ଥିଲା ଫଳରେ ସୋନିଆ ଗାନ୍ଧୀଙ୍କ ପକ୍ଷରୁ ଏମାନଙ୍କୁ ସବୁଜ ସଙ୍କେତ ମିଳି ନ ଥିଲା । ଏଥର ପିଏଲ୍ସି, ଭାରତୀୟ ଜନତା ପାର୍ଟି(ଭାଜପା) ଓ ଅନ୍ୟ କିଛି ଦଳ ସହ ମିଶି ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦିତା କରୁଛି ।
କ୍ୟାପଟେନ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବା ପରେ ନିଜର ଏକ ଦଳ ‘ପଞ୍ଜାବ ଲୋକ କଂଗ୍ରେସ(ପିଏଲ୍ସି)’ ଗଠନ କରିଛନ୍ତି । ଆସନ୍ତା ନିର୍ବାଚନ ପାଇଁ ପିଏଲ୍ସି ପ୍ରଥମ ପର୍ଯ୍ୟାୟରେ ୨୨ ଜଣ ପ୍ରାର୍ଥୀଙ୍କ ନାମ ଘୋଷଣା କରିଛି । ସୂଚନାଯୋଗ୍ୟ, ଏହା ପୂର୍ବରୁ ବି ପଟିୟାଲା ରାଜପରିବାରର ଏହି ୭୯ ବର୍ଷୀୟ ରାଜନେତା କ୍ୟାପଟେନ ଅମରିନ୍ଦର ସିଂ କହିଥିଲେ, ସେ କେବେ ସିଦ୍ଧୁଙ୍କୁ ନିର୍ବାଚନରେ ବିଜୟି କରିଦେବେ ନାହିଁ,କାରଣ ସେ ସମ୍ପୂର୍ଣ୍ଣ ଭାବରେ ଅକ୍ଷମ ।
