ନୂଆଦିଲ୍ଲୀ,୨୯।୧୧: ପଞ୍ଜାବ କଂଗ୍ରେସର ପୂର୍ବତନ ଅଧ୍ୟକ୍ଷ ତଥା ପୂର୍ବତନ କ୍ରିକେଟର ନବଜୋତ ସିଂ ସିଦ୍ଧୁ ଜେଲରୁ ମୁକଳିପାରନ୍ତି। ୧୯୮୮ରେ ହୋଇଥିବା ରୋଡ ରେଜ୍ ମାମଲାରେ ବର୍ତ୍ତମାନ ସେ ପଟିଆଲା ଜେଲରେ ସଜା କାଟୁଛନ୍ତି। ଜେଲରେ ସିଦ୍ଧୁଙ୍କ ଭଲ ସ୍ବଭାବ ଏବଂ ଉତ୍ତମ ଆଚରଣ ପାଇଁ ତାଙ୍କୁ ସାଧାରଣତନ୍ତ୍ର ଦିବସ ଅବସରରେ ମୁକ୍ତି ମିଳିପାରେ। ବର୍ତ୍ତମାନ ଜେଲରେ ସିଦ୍ଧୁ କିରାଣୀ ଭାବେ ଦାୟିତ୍ୱ ତୁଲାଉଛନ୍ତି। ଜେଲ ନିୟମ ଅନୁଯାୟୀ ସେ ଏପର୍ଯ୍ୟନ୍ତ କୌଣସି ଛୁଟି ନେଇନାହାଁନ୍ତି।
ସୂଚନାଯୋଗ୍ୟ, ୩୪ ବର୍ଷ ପୁରୁଣା ଏକ ରୋଡ ରେଜ ମାମଲାରେ ସିଦ୍ଧୁଙ୍କୁ କୋର୍ଟ ଏକ ବର୍ଷ ଜେଲ ଦଣ୍ଡାଦେଶ ଦେଇଥିଲେ। ୬ ମାସ ହେଲା ସେ ସଜା କାଟି ସାରିଲେଣି। ତେବେ ସାଧାରଣତନ୍ତ୍ର ଦିବସ ଅବସରରେ କଏଦୀମାନଙ୍କୁ ମୁକ୍ତ କରିବା ପାଇଁ ଜେଲ ପ୍ରଶାସନ ପକ୍ଷରୁ ଏକ ତାଲିକା ପ୍ରସ୍ତୁତ କରାଯାଇଛି। ଯେଉଁଥିରେ ସିଦ୍ଧୁଙ୍କ ନାଁ ରହିଥିବା ଜଣାପଡ଼ିଛି। ଅନ୍ୟପକ୍ଷେ ସିଦ୍ଧୁ ଜେଲରୁ ମୁକୁଳିବେ ନା ନାହିଁ ସେନେଇ ପଞ୍ଜାବ ସରକାର ନିଷ୍ପତ୍ତି ନେବେ। ସିଦ୍ଧୁ ଜେଲରୁ ମୁକୁଳିବା ପରେ ତାଙ୍କୁ କଂଗ୍ରେସ ଗୁରୁଦାୟୀତ୍ୱ ଦେଇପାରେ ବୋଲି ଚର୍ଚ୍ଚା ହେଉଛି।