ମେଲବୋର୍ନ,୧୯।୧୨(ପି.ଟି.): ସିଡ୍ନୀରେ କରୋନା ପ୍ରକୋପ ଜାରି ରହିଛି। ଏହାରେ ଭାରତ ଓ ଅଷ୍ଟ୍ରେଲିଆ ମଧ୍ୟରେ ତୃତୀୟ ଟେଷ୍ଟ ମଧ୍ୟ ଆୟୋଜନ ହେବାର କାର୍ଯ୍ୟକ୍ରମ ରହିଛି। ତେଣୁ ପରିସ୍ଥିତି ଉପରେ କଡ଼ା ନଜର ରଖିଛୁ ବୋଲି କ୍ରିକେଟ ଅଷ୍ଟ୍ରେଲିଆ (ସିଏ) ତରଫରୁ କୁହାଯାଇଛି। ତେବେ ତୃତୀୟ ଟେଷ୍ଟ କୋଭିଡ୍-୧୯ ଦ୍ୱାରା ପ୍ରଭାବିତ ହେବ ନାହିଁ ବୋଲି ସିଏ ତରଫରୁ ସ୍ପଷ୍ଟ କରାଯାଇଛି।
ଶୁକ୍ରବାର ସିଡ୍ନୀର ନର୍ଦ୍ଦର୍ନ ବିଚ୍ରେ କରୋନା ସଂକ୍ରମିତଙ୍କ ସଂଖ୍ୟା ୨୮ରେ ପହଞ୍ଚିଛି। ଫଳରେ ଏଠାରେ ଅଧିକାରୀମାନଙ୍କୁ ସତର୍କ ରହିବାକୁ କୁହାଯାଇଛି। ସିଡ୍ନୀ କ୍ରିକେଟ ଗ୍ରାଉଣ୍ଡରେ ଜାନୁୟାରୀ ୭ରୁ ତୃତୀୟ ଟେଷ୍ଟ ଆରମ୍ଭ ହେବ। ସ୍ଥିତି ନେଇ ଆମର ମେଡିକାଲ ଏକ୍ସପର୍ଟମାନେ ଏକାଧିକ ବୈଠକରେ ଆଲୋଚନା କରିଛନ୍ତି। ଏଥିପାଇଁ ଆମେ ଖେଳାଳିଙ୍କୁ ବାୟୋ ବବଲରେ ରଖିଥିଲୁ ବୋଲି ସିଏ ମଧ୍ୟବର୍ତ୍ତିକାଳୀନ ମୁଖ୍ୟ କାର୍ଯ୍ୟନିର୍ବାହୀ ନିକ୍ ହୋକ୍ଲି କହିଛନ୍ତି। ତେବେ ଏହି ମ୍ୟାଚ ନେଇ କୌଣସି ଆଶଙ୍କା ନାହିଁ ବୋଲି ସେ ସ୍ପଷ୍ଟ କରିଛନ୍ତି। ନିରାପତ୍ତାରେ ଯଦି ଖେଳି ସମ୍ଭବ ତା’ହେଲେ ଏହି ମ୍ୟାଚ ଆୟୋଜନରେ କୌଣସି ଅସୁବିଧା ନାହଁି ବୋଲି ସେ କହିଛନ୍ତି। ଡିସେମ୍ବର ୨୬ରୁ ଦ୍ୱିତୀୟ ଟେଷ୍ଟ ମେଲବୋର୍ନରେ ଆରମ୍ଭ ହେବ।
