ନୟାଗଡ଼ ଅଫିସ,୧୫।୫: ସିଗ୍ନାଲ ଫେଲ୍ ଯୋଗୁ ଖୋର୍ଦ୍ଧା-ବଲାଙ୍ଗୀର ରେଳପଥରେ ଶନିବାର ରାତିରେ ଭୁବନେଶ୍ୱରରୁ ନୟାଗଡ଼ ଅଭିମୁଖେ ଆସୁଥିବା ମେମୁ ଟ୍ରେନ୍ ପ୍ରାୟ ଅଢ଼େଇ ଘଣ୍ଟା ଧରି ରାଜସୁନାଖଳା ଷ୍ଟେଶନ ଓ ବୋଲଗଡ଼ ରୋଡ ରେଳ ଷ୍ଟେଶନଠାରେ ଅଟକି ରହିଥିଲା। ସେହିପରି ନୂଆଗଁାରୁ ପୁରୀ ଆସୁଥିବା ଟ୍ରେନ୍ ବେଗୁନିଆ ଷ୍ଟେଶନରେ ପ୍ରାୟ ୧ ଘଣ୍ଟା ଧରି ଅଟକିଥିଲା। ସୁନାଖଳାଠାରେ ଟ୍ରେନ୍ ଅଟକିବା ନେଇ ଯାତ୍ରୀ ହୋହଲ୍ଲା କରିବା ସହ ପାଟିତୁଣ୍ଡ କରିଥିଲେ। ଏପରିକି ଉତ୍ତେଜନା ବଢ଼ି ଚାଲିଥିବାବେଳେ ରାଜସୁନାଖଳା ଷ୍ଟେଶନ ନିକଟରେ ଜଣେ ମହିଳା ଅଚେତ ହୋଇପଡ଼ିଥିଲେ। ଯୁକ୍ତିତର୍କ ପରେ ଅଚେତ ମହିଳାଙ୍କୁ ସୁନାଖଳା ସ୍ବାସ୍ଥ୍ୟକେନ୍ଦ୍ରକୁ ପଠାଯାଇଥିଲା। ଅନ୍ୟପକ୍ଷେ ବୋଲଗଡ଼ ରୋଡ ରେଳ ଷ୍ଟେଶନ ସିଗ୍ନାଲ ଦେଉଥିବା କର୍ମଚାରୀ ଶୋଇପଡିଥିବାରୁ ଏପରି ଅବ୍ୟବସ୍ଥା ହୋଇଥିବା ଜଣାପଡ଼ିଥିଲା। ଯାତ୍ରୀମାନେ ବୋଲଗଡ଼ ରୋଡ ରେଳ ଷ୍ଟେଶନକୁ ଯାଇ କର୍ମଚାରୀଙ୍କୁ ନିଦରୁ ଉଠାଇବା ପରେ ଟ୍ରେନ୍ ଯାତ୍ରା ଆରମ୍ଭ କରିଥିଲା। ଯଦିଓ ଶନିବାର ରାତିରେ ଟ୍ରେନ୍ ଯାତ୍ରାର ଅବ୍ୟବସ୍ଥା ନେଇ ରେଳପଥ କର୍ତ୍ତୃପକ୍ଷ ନିଜର ଭୁଲ୍ ସ୍ବୀକାର କରିବାକୁ ରାଜି ନୁହନ୍ତି ତେବେ ସିଗ୍ନାଲ ନ ମିଳିବାରୁ ଯାତ୍ରୀ ହଇରାଣ ହେବା ଘଟଣାର ଠିକ୍ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନେବାକୁ ଦାବି ଉଠିଛି।
ଭୁବନେଶ୍ୱରରୁ ମେମୁ ଟ୍ରେନ୍ ନୟାଗଡ଼ ଅଭିମୁଖେ ଶନିବାର ରାତିରେ ଆସୁଥିଲା। ରାତି ପ୍ରାୟ ୮ଟାରେ ରାଜସୁନାଖଳା ଷ୍ଟେଶନରେ ସିଗ୍ନାଲ ମିଳୁନି କହି ଟ୍ରେନ୍ ଅଟକିଥିଲା। ରାସ୍ତା କ୍ଲିୟର ହେଲେ ଟ୍ରେନ୍ ଯାତ୍ରା କରିବ ବୋଲି ଯାତ୍ରୀମାନଙ୍କୁ କୁହାଯାଇଥିଲା। ପ୍ରାୟ ୧ ଘଣ୍ଟା ପରେ ଜଣେ ମହିଳା ଯାତ୍ରୀ ଟେନ୍ସନରେ ଅଚେତ ହୋଇପଡ଼ିଥିଲେ। ତାଙ୍କୁ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ପରବର୍ତ୍ତୀ ପର୍ଯ୍ୟାୟରେ ରେଳପଥ କ୍ଲିୟର ହେବାରୁ ପ୍ରାୟ ୯ଟା ୫୦ରେ ସୁନାଖଳା ଷ୍ଟେଶନରୁ ଟ୍ରେନ୍ ଛାଡ଼ିଥିଲା। ତେବେ ବୋଲଗଡ଼ ରୋଡ ରେଳ ଷ୍ଟେଶନ ପୂର୍ବରୁ ପୁଣି ଟ୍ରେନ୍ ଅଟକି ଥିଲା। ଲାଇନ କ୍ଲିୟର ନ ଥିବାରୁ ଟ୍ରେନ୍ ଅଟକିଲା ବୋଲି ପୁଣି କୁହାଗଲା। ରାଜସୁନାଖଳା ପରେ ବୋଲଗଡ଼ରେ ପୁଣି ଏକା ସମସ୍ୟା ଦେଖାଦେବାରୁ ଯାତ୍ରୀ ଉତ୍ତେଜିତ ହୋଇ ହୋହଲ୍ଲା କରିଥିଲେ। ତେବେ କେତେଜଣ ଯୁବକ ଯାତ୍ରୀ ବୋଲଗଡ଼ ରୋଡ ରେଳ ଷ୍ଟେଶନ ନିକଟକୁ ରେଳ ଲାଇନ୍ରେ ଚାଲି ଚାଲି ଯାଇ ପ୍ରକୃତ କାରଣ ଖୋଜିଥିଲେ। ବୋଲଗଡ଼ଠାରେ ସିଗ୍ନାଲ କର୍ମଚାରୀଙ୍କୁ ନିଦରୁ ଉଠାଇବା ପରେ ସିଗ୍ନାଲ କ୍ଲିୟର ହୋଇଥିବା ଅଭିଯୋଗ ହୋଇଥିଲା। ଅନ୍ୟପକ୍ଷେ ବୋଲଗଡ଼ ରୋଡ ରେଳ ଷ୍ଟେଶନ ନିୟୋଜିତ କର୍ମଚାରୀ ଯାତ୍ରୀମାନଙ୍କୁ ଖରାପ ବ୍ୟବହାର ଦେଖାଇଥିବା ଅଭିଯୋଗ ହୋଇଛି। ଏଣୁ ଯାତ୍ରୀମାନେ ଅଧିକ ହୋହଲ୍ଲା ପାଟିତୁଣ୍ଡ କରିଥିଲେ। ସୂଚନା ଅନୁସାରେ, ବୋଲଗଡ଼ଠାରେ ପୁରୁଣା ବଗି ରେଳପଥରେ ରହିଥିବା କାରଣରୁ ସିଗ୍ନାଲ କ୍ଲିୟର ହୋଇପାରି ନ ଥିଲା। ସୁନାଖଳାରେ ନିୟୋଜିତ ସିଗ୍ନାଲ କର୍ମଚାରୀ ବୋଲଗଡ଼ ରୋଡ ରେଳ ଷ୍ଟେଶନକୁ ଆସି ସିଗ୍ନାଲ ଦେବା ପରେ ନୟାଗଡ଼କୁ ଟ୍ରେନ୍ ରାତି ୧୦ଟା ୫୫ ଛାଡ଼ିଥିବା କୁହାଯାଉଛି। ନୟାଗଡ଼ରେ ଟ୍ରେନ ୮ଟା ୪୫ରେ ପହଞ୍ଚତ୍ବା ବଦଳରେ ୧୧ଟା ୫ରେ ପହଞ୍ଚତ୍ଥିଲା।