ନିରାକାରପୁର,୧ା୧୧(ମାନସ ଚନ୍ଦ୍ର ପଟ୍ଟନାୟକ): ଯାତ୍ରୀମାନଙ୍କ ସୁବିଧା ପାଇଁ ରେଳ ବିଭାଗ ଷ୍ଟେଶନ ଉନ୍ନତିକରଣଠାରୁ ଆରମ୍ଭ କରି ଟ୍ରେନ୍ ଭିତରେ ଯାତ୍ରୀ କିଭଳି ସୁରକ୍ଷିତ ଓ ଆରାମରେ ଯାତାୟାତ କରିପାରିବେ, ଟ୍ରେନ୍ଟି ଲାଇନ୍ରେ କିଭଳି ସୁବିଧାରେ ଯାଇପାରିବ ଓ ଦୂରରୁ କେଉଁଠି କ’ଣ ଅଛି ତାହା ବୋର୍ଡ ମାଧ୍ୟମରେ ବିଭିନ୍ନ ସ୍ଥାନରେ ସାଇନ୍ବୋର୍ଡ ଲଗାଯାଇଛି। ଯାହା ଫଳରେ ରେଳ ପାଇଲଟ ଜଣଙ୍କ ଆଗରେ କ’ଣ ଅଛି ଆରାମରେ ଜାଣି ପାରିବେ। ସେଥିପାଇଁ ଅନେକ କର୍ମଚାରୀ ନିୟୋଜିତ ରହିଛନ୍ତି। କିନ୍ତୁ କିଛି ତଳିଆ ଅଧିକାରୀମାନଙ୍କ ଅବହେଳା ଯୋଗୁ କିଛି କିଛି ସମୟରେ ଛୋଟ ବଡ ଟ୍ରେନ୍ ଦୁର୍ଘଟଣା ଘଟି ଜନଜୀବନ ହାନି ହେଉଛି। ଯାହାକି ରେଳ ବିଭାଗ ବହୁ କୋଟି ଟଙ୍କାର କ୍ଷତି ସହୁଛି। ଏଭଳି ଦୃଶ୍ୟ ଖୋର୍ଦ୍ଧା ରେଳ ଡିଭିଜନ ଅଧୀନରେ ଥିବା ନିରାକାରପୁର ଷ୍ଟେସନ ଅଞ୍ଚଳରେ ଦେଖିବାକୁ ମିଳିଛି। ଦୀର୍ଘଦିନ ହେବ ଉକ୍ତ ରେଳ ଧାରଣା କଡ଼ ସଫା ନ ହେବାରୁ ଏହାର କଡ଼ରେ ଲାଗିଥିବା ସାଇନ୍ବୋର୍ଡରେ ବିଭିନ୍ନ ଅନାବନା ଲତା ମାଡି ଯାଇ ବୋର୍ଡ ଗୁଡ଼ିକ ଦେଖାଯାଉ ନ ଥିବା ବେଳେ କିଛି କିଛି ସ୍ଥାନରେ ବଡ଼ବଡ଼ ଗଛ ଉଠି ବିପଦ ସୃଷ୍ଟି କରୁଛି। ରେଳ ବିଭାଗ ଉଚ୍ଚ କର୍ତ୍ତୃପକ୍ଷ ଏହା ଉପରେ ଶୀଘ୍ର ପଦକ୍ଷେପ ନେବା ପାଇଁ ବୁଦ୍ଧିଜୀବୀ ମହଲରୁ ଦାବି ହେଉଛି।