ନୂଆଦିଲ୍ଲୀ,୧୦।୧୦: ଦେଶର ପ୍ରମୁଖ କର୍କଟ ଚିକିତ୍ସାଳୟ ବେଦାନ୍ତର ବାଲକୋ ମେଡିକାଲ୍ ସେଣ୍ଟର (ବିଏମ୍ସି) ଏବଂ ଅନୁସନ୍ଧାନ ସଂସ୍ଥା ଅନୁଭା ମଧ୍ୟରେ ଏକ ଦ୍ୱିପାକ୍ଷିକ ବୁଝାମଣା ପତ୍ର ନିକଟରେ ସ୍ବାକ୍ଷରିତ ହୋଇଛି। ସେହି ଅନୁଯାୟୀ ବାଲକୋରେ କର୍କଟ ଜେନୋମିକ୍ସ ବାୟୋ ବ୍ୟାଙ୍କ ପାଇଁ ମିଳିତ ଭାବେ ରଣନୀତିକ ସହଯୋଗ ଘୋଷଣା କରାଯାଇଛି। ବିଶେଷ କରି ଭାରତରେ କର୍କଟ ରୋଗ ଉପରେ ଗବେଷଣାକୁ ଆହୁରି ତ୍ୱରାନ୍ବିତ କରାଇବା ପାଇଁ ଏହି ବୁଝାମଣା ହୋଇଥିବା ଉଭୟ ପକ୍ଷରୁ କୁହାଯାଇଛି।
ଛତିଶଗଡ଼ର ନ୍ୟୁ ରାୟପୁର ବିଏମସି ପରିସରରେ ଅନୁଭାର ସିଇଓ ଡା. ଜୋନାଥନ୍ ପିକର ଏବଂ ବିଏମସି ମେଡିକାଲ ନିର୍ଦ୍ଦେଶକ ଭବନା ସିରୋହିଙ୍କ ଉପସ୍ଥିତିରେ ରାଜିନାମା ସ୍ବାକ୍ଷର କରିଥିଲେ। ଏ ସମ୍ପର୍କରେ ବିଏମସିର ଅଧ୍ୟକ୍ଷ ଜ୍ୟୋତି ଅଗ୍ରୱାଲ କହିଛନ୍ତି, ଭାରତର କର୍କଟ ଯତ୍ନ କେନ୍ଦ୍ର ହେବାରେ ଏହା ଅନ୍ୟତମ ମାଇଲଖୁଣ୍ଟ ସ୍ଥାପନ କରିଛି। ଅନୁଭା ସହ ଆମର ସହଯୋଗ ସର୍ବୋତ୍ତମ ଜ୍ଞାନ, ଟେକ୍ନୋଲୋଜି ଏବଂ ଅନୁସନ୍ଧାନ ଜରିଆରେ ଭାରତୀୟଙ୍କୁ ଠିକ୍ ଔଷଧ ଓ ଚିକିତ୍ସା ଯୋଗାଇବ ବୋଲି ସେ ମତବ୍ୟକ୍ତ କରିଛନ୍ତି।