ଟରେଣ୍ଟୋ,୧୦ା୧୨: କାନାଡାର ସରେ ପ୍ରାନ୍ତରେ ନିଜ ଘରେ ୪୦ ବର୍ଷୀୟା ଶିଖ୍ ମହିଳାଙ୍କୁ ହତ୍ୟା କରାଯାଇଥିଲା। ତେବେ ଏହି ମାମଲାରେ ସ୍ବାମୀଙ୍କୁ ଗିରଫ କରାଯାଇଥିବା କାନାଡା ପୋଲିସ ସୂଚନା ଦେଇଛି। ସ୍ଥାନୀୟ ରିପୋର୍ଟରୁ ପ୍ରକାଶ ଯେ, ବୁଧବାର ବ୍ରିଟିଶ କଲମ୍ବିଆର ସରେ ସ୍ଥିତ ନିଜ ଘରେ ଅଭିଯୁକ୍ତ ସ୍ବାମୀ ହରପ୍ରୀତ କୌରଙ୍କୁ ଅନେକ ଥର ଛୁରିରେ ଭୁସିଥିଲେ।
ରୟାଲ କାନାଡୀୟ ମାଉଣ୍ଟେଡ ପୋଲିସ (ଆରସିଏମ୍ପି କହିଛି, ବୁଧବାର ରାତି ୯.୩୦ ପୂର୍ବରୁ ନ୍ୟୁଟନ ଅଞ୍ଚଳର ଏକ ବାସଭବନରେ ଜଣେ ମହିଳାଙ୍କୁ ଛୁରାମାଡ଼ କରାଯାଇଥିବା ଖବର ପୋଲିସ ପାଇଥିଲା। ଅଧିକାରୀମାନେ ଘଟଣାସ୍ଥଳରେ ପହଞ୍ଚିବା ପରେ ସେମାନେ ଜଣେ ମହିଳାଙ୍କ ଜୀବନ ପ୍ରତି ବିପଦ ଥିବା ଦେଖିବାକୁ ପାଇଥିଲେ। ରିପୋର୍ଟ ଅନୁଯାୟୀ, ଅଧିକାରୀମାନେ ମହିଳାଙ୍କୁ ଡାକ୍ତରଖାନା ନେଇଥିଲେ, ସେଠାରେ ସେ ମୃତ୍ୟୁବରଣ କରିଥିଲେ।
ରିପୋର୍ଟ ଅନୁଯାୟୀ, ଇଣ୍ଟିଗ୍ରେଟେଡ୍ ହୋମସାଇଡ୍ ଇନ୍ଭେଷ୍ଟିଗେଶନ ଟିମ୍ (ଆଇଏଚଆଇଟି)ର ସର୍ଜେଣ୍ଟ ଟିମୋଥି ପିଆରୋଟି ହତ୍ୟାକାଣ୍ଡର ତଦନ୍ତ କରୁଛନ୍ତି। ରିପୋର୍ଟରେ କୁହାଯାଇଛି, ହରପିତ୍ଙ୍କ ସ୍ବାମୀଙ୍କ ଛୁରାମାଡ଼ କରିବା ପରେ ଘଟଣାସ୍ଥଳରୁ ସନ୍ଦେହଜନକ ଭାବେ ଗିରଫ କରାଯାଇଥିଲା। ତେବେ ପରେ ତାଙ୍କୁ ମୁକ୍ତ କରାଯାଇଥିଲା। ହତ୍ୟା ବିଷୟରେ ସୂଚନା ଥିବା ବ୍ୟକ୍ତିଙ୍କୁ ଆଗକୁ ଆସି ସୂଚନା ଦେବାକୁ ପୋଲିସ ନିବେଦନ କରିଛି, ଯାହାଫଳରେ ଏହି ମାମଲାରେ ଅଧିକ ତଥ୍ୟ ସଂଗ୍ରହ କରାଯାଇପାରିବ।
