କଲମ୍ବୋ,୨୨।୭: ଶ୍ରୀଲଙ୍କା ବିପକ୍ଷ ସିରିଜରେ ଟିମ ଇଣ୍ଡିଆ ଏକ ଭଲ ଆରମ୍ଭ କରିଛି। ସିରିଜର ପ୍ରଥମ ୨ ମ୍ୟାଚ ଜିତିବା ସହିତ ଦଳ ତିନି ମ୍ୟାଚ ବିଶିଷ୍ଟ ସିରିଜରେ ୨-୦ ଅଗ୍ରଣୀ ହାସଲ କରିଛି। ବରିଷ୍ଠ ଖେଳାଳିମାନେ ଇଂଲଣ୍ଡରେ ଥିବାରୁ ଶିଖର ଧାୱନଙ୍କୁ ଦଳର ନେତୃତ୍ୱ ଦିଆଯାଇଛି। ସିରିଜର ଅନ୍ତିମ ମ୍ୟାଚ ୨୩ ଜୁଲାଇରେ ଖେଳାଯିବ। ଏହା ପରେ ଦୁଇ ଦଳ ମଧ୍ୟରେ ଏକ ତିନି ମ୍ୟାଚ ବିଶିଷ୍ଟ ଟି -୨୦ ସିରିଜ ମଧ୍ୟ ଅନୁଷ୍ଠିତ ହେବ।
ଯଦି ଶିଖର ଧାୱନ ତୃତୀୟ ମ୍ୟାଚ ଜିତନ୍ତି, ତେବେ ଅଧିନାୟକ ଭାବରେ ସେ ପ୍ରଥମ ଦିନିକିଆ ସିରିଜରେ କ୍ଲିନ୍ ସୁଇପ୍ କରିବାର ଏକ ସ୍ବତନ୍ତ୍ର ରେକର୍ଡ ସୃଷ୍ଟି କରିବେ।ଏମଏସ ଧୋନୀ, ବିରାଟ କୋହଲି ଏବଂ ସୌରଭ ଗାଙ୍ଗୁଲି ଦିନିକିଆ ଅଧିନାୟକ ଭାବରେ ଏହା କରିପାରି ନାହାଁନ୍ତି। ଧୋନୀ ଟିମ ଇଣ୍ଡିଆର ସବୁଠାରୁ ସଫଳ ଅଧିନାୟକ। ସେ ଅଧିନାୟକତ୍ୱର ପ୍ରଥମ ସିରିଜରେ ଅଷ୍ଟ୍ରେଲିଆ ବିପକ୍ଷରେ ୨-୪ରେ ପରାଜୟର ସମ୍ମୁଖୀନ ହୋଇଥିଲେ। ପ୍ରଥମ ତିନୋଟି ମ୍ୟାଚରୁ ସେ ଗୋଟିଏ ବି ମ୍ୟାଚ ଜିତିପାରି ନ ଥିଲେ। ସେହିପରି ବିରାଟ କୋହଲି ଜୁନ ୨୦୧୩ ରେ ଶ୍ରୀଲଙ୍କା ବିପକ୍ଷରେ ଅଧିନାୟକ ଭାବରେ ତାଙ୍କର ପ୍ରଥମ ଦିନିକିଆ ଖେଳିଥିଲେ। ଏହି ମ୍ୟାଚ୍ରେ ଶ୍ରୀଲଙ୍କା ୧୬୧ ରନ ବ୍ୟବଧାନରେ ଟିମ ଇଣ୍ଡିଆକୁ ପରାସ୍ତ କରିଛି। ତେବେ ଏହା ପରେ କୋହଲି ପରବର୍ତ୍ତୀ ୮ଟି ମ୍ୟାଚ ଜିତିବାରେ ସଫଳ ହୋଇଥିଲେ। ଅନ୍ୟପକ୍ଷରେ, ସୌରଭ ଗାଙ୍ଗୁଲି ମଧ୍ୟ ଅଧିନାୟକ ଭାବରେ ପ୍ରଥମ ମ୍ୟାଚ ଜିତିପାରି ନ ଥିଲେ।
ଶ୍ରୀଲଙ୍କା ବିପକ୍ଷ ସିରିଜରେ ଶିଖର ଧାୱନ କେବଳ ଅଧିନାୟକ ଭାବେ ଶୀର୍ଷରେ ରହିନାହାଁନ୍ତି, ବରଂ ସେ ଏପର୍ଯ୍ୟନ୍ତ ସର୍ବାଧିକ ରନ ସ୍କୋର କରିଛନ୍ତି। ଧାୱନ ଅର୍ଦ୍ଧଶତକ ସହ ୨ଟି ମ୍ୟାଚରେ ୧୧୫ ରନ ସଂଗ୍ରହ କରିଥିଲେ। ତାଙ୍କ ହାରାହାରି ହେଉଛି ୧୧୫। ସେ ୧୨ଟି ଚୌକା ଓ ଗୋଟିଏ ଛକା ମାରିଛନ୍ତି।
