ଅନୁଗୋଳ ଅଫିସ,୧୬ା୭ ଅନୁଗୋଳ ସହରରୁ ହଟାଯିବ ଜବରଦଖଲ। ବିଶେଷକରି ବର୍ଷା ଜଳ ନିଷ୍କାସନ ପଥରେ ଥିବା ସମସ୍ତ ଅବରୋଧକୁ ଉଚ୍ଛେଦ କରାଯିବ। ସହରକୁ ବର୍ଷାଦିନେ ଜଳବନ୍ଦୀରୁ ମୁକ୍ତ କରିବା ଦିଗରେ ସମସ୍ତ କାର୍ଯ୍ୟ କରାଯିବ ବୋଲି ଗତ ପୌର ନିର୍ବାଚନ ବେଳେ ପ୍ରାର୍ଥୀମାନେ ପୌରାଞ୍ଚଳବାସୀଙ୍କୁ ପ୍ରତିଶ୍ରୁତି ଦେଇଥିଲେ। ହେଲେ ନିର୍ବାଚିତ ହେବାର ୩ ମାସ ପରେ ବି ଉକ୍ତ ପ୍ରତିଶ୍ରୁତି ପୂରଣ ଦିଗରେ ସେପରି ବଳିଷ୍ଠ ପଦକ୍ଷେପ ନିଆଯାଇ ନାହିଁ। ଏପରି କି ପୌର ପରିଷଦର ୨ଟି ବୈଠକରେ ଏ ନେଇ ପ୍ରସ୍ତାବ ଲିପିବଦ୍ଧ ହୋଇଥିଲେ ମଧ୍ୟ କାର୍ଯ୍ୟ ଆରମ୍ଭ ହୋଇପାରୁ ନାହିଁ। ବର୍ଷା ଋତୁ ଆସିଯାଇଥିବା ବେଳେ ନିର୍ବାଚିତ ପ୍ରତିନିଧିମାନେ ନୀରବଦ୍ରଷ୍ଟା ସାଜିବାକୁ ନେଇ ସହରବାସିନ୍ଦାଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
ଅନୁଗୋଳ ପୌରାଞ୍ଚଳରେ ଜବରଦଖଲ ସହରବାସିନ୍ଦାଙ୍କ ପାଇଁ ବଡ଼ ସମସ୍ୟା ସୃଷ୍ଟି କରୁଛି। ରାସ୍ତାଠାରୁ ଆରମ୍ଭ କରି ଡ୍ରେନ୍ଗୁଡ଼ିକୁ ଅକ୍ତିଆର କରାଯାଇଥିବାରୁ ଯାତାୟାତ ଓ ବର୍ଷା ଜଳ ନିଷ୍କାସନରେ ପ୍ରତିବନ୍ଧକ ଦେଖାଦେଉଛି। ଏହି କାରଣରୁ ହରିମହୁରୀ ଛକ, ବଜାରଛକ, ଗାନ୍ଧୀମାର୍ଗ, ବଜାର ଛକରୁ ମେଡିକାଲ ଛକ, ଅମଲାପଡ଼ା ମାର୍କେଟ କମ୍ପ୍ଲେକ୍ସ, ଶିମିଳିପଡ଼ା, ବଣିଆବାହାଳ, ସୌଭାଗ୍ୟନଗର, ତାମ୍ରିତ କଲୋନୀ କାଳୀ ମନ୍ଦିର ନିକଟ, ହେମସୁରପଡ଼ା ଶୁକୁଆସାହି ଆଦି ଅଞ୍ଚଳରେ ବର୍ଷା ହେଲେ ଲୋକମାନଙ୍କୁ ନାକେଦମ୍ ହେବାକୁ ପଡ଼ୁଛି। ସେହିପରି ବଣିଆବାହାଳ, ହାତୀଶାଳପଡ଼ା, ରାଧାରମଣପଡ଼ା କାଠଗୋଲା ସାହି, ଡିଆସିଛକ, ଶିମିଳିପଡ଼ା ଆଦି ଅଞ୍ଚଳରେ ବର୍ଷା ପାଣି ଲୋକଙ୍କ ଘରେ ପଶୁଥିବା ଦେଖିବାକୁ ମିଳୁଛି। ଏହାର ସ୍ଥାୟୀ ପ୍ରତିକାର ପାଇଁ ଦୀର୍ଘବର୍ଷ ହେଲା ଦାବି ଉଠୁଛି। ଏପରି କି ଦୀର୍ଘବର୍ଷ ଧରି ପ୍ରଶାସକଙ୍କ ହାତରେ ଥିବା ପୌର ପରିଷଦ ନିର୍ବାଚିତ ପ୍ରତିନିଧିଙ୍କ ହାତକୁ ଗଲା ପରେ ସମସ୍ୟାର ସମାଧାନ ହୋଇପାରିବ ବୋଲି ସହରବାସୀ ଆଶା କରିଥିଲେ। ନିର୍ବାଚନ ବେଳେ ମଧ୍ୟ ପ୍ରାର୍ଥୀମାନେ ଏପରି ପ୍ରତିଶ୍ରୁତି ଦେଇଥିଲେ। କିନ୍ତୁ ଏ ଦିଗରେ ଏଯାଏ ପଦକ୍ଷେପ ନିଆଯାଇ ନାହିଁ। ପୂର୍ବଭଳି ବହୁ ବ୍ୟବସାୟୀ ଓ ମୁଷ୍ଟିମେୟ ବ୍ୟକ୍ତିଙ୍କ ଅକ୍ତିଆରରେ ଡ୍ରେନ୍ ଅଞ୍ଚଳ ରହିଥିବାରୁ ସହରବାସୀ ସମସ୍ୟାରେ ପଡ଼ୁଛନ୍ତି। ପୌର କର୍ତ୍ତୃପକ୍ଷ କେତେକ ସ୍ଥାନରେ ଉଚ୍ଛେଦ କରୁଥିଲେ ମଧ୍ୟ ତାହା ପୁଣି ଜବରଦଖଲକୁ ଚାଲିଯାଉଛି। ଏ ଦିଗରେ ସ୍ଥାୟୀ ପଦକ୍ଷେପ ନେବାରେ ବିଫଳ ପୌର ପ୍ରଶାସନ କେବଳ ବର୍ଷା ଛାଡ଼ିବା ପରେ ସହରରେ ଜେସିବି ବୁଲାଇ ଡ୍ରେନ୍ ସଫା କରି ଚୁପ୍ ବସିଯାଉଛି। କାଉନସିଲ ଗଠନ ପୂର୍ବରୁ ସହରର ବିଭିନ୍ନ ସ୍ଥାନରେ ଡ୍ରେନ୍ ହେବ ବୋଲି ଟେଣ୍ଡର ବାହାରିଥିଲା। ତେବେ ନିର୍ବାଚନ ପରେ ପୌର କର୍ତ୍ତୃପକ୍ଷ ଓ ନଗରପାଳଙ୍କ ମଧ୍ୟରେ ତାଳମେଳ ଠିକ୍ ନ ରହିବାରୁ ଡ୍ରେନ୍ ନିର୍ମାଣ କାର୍ଯ୍ୟ ଆରମ୍ଭ ହୋଇପାରିଲାନାହିଁ। ସହରରେ ବର୍ଷା ପାଣି ପଶିବା ପରେ ଏହି କାର୍ଯ୍ୟ କରାଯିବ ବୋଲି ମଧ୍ୟ କୁହାଗଲା। କିନ୍ତୁ ସେ ଦିଗରେ ପଦକ୍ଷେପ ଏଯାଏ ନିଆଯାଇ ନାହିଁ। ଓଲଟା ଏହାର ସମାଧାନ ରାସ୍ତା ଖୋଜାଗଲା ବେଳେ ଭୋଟବ୍ୟାଙ୍କ ଖସିଯିବା ଆଶଙ୍କା କରି କେତେଜଣ ନିର୍ବାଚିତ ପ୍ରତିନିଧି ଏଥିରେ ବାଧକ ସାଜୁଥିବା ଚର୍ଚ୍ଚା ହେଉଛି।