ଭୁବନେଶ୍ୱର,୨୮ା୭(ଅନିଲ ଦାସ): ଓଡ଼ିଶାରେ ପ୍ରତିଷ୍ଠା ହେବ ସିଲିକନ୍ କାର୍ବାଇଡ୍ ପ୍ଲାଣ୍ଟ। ଆମେରିକାସ୍ଥିତ ସିଲିକନ୍ ଗ୍ରୁପ୍ ଓଡ଼ିଶାରେ ଏହି ପ୍ଲାଣ୍ଟ ପ୍ରତିଷ୍ଠା କରିବ। ଏଥିପାଇଁ ସିଲିକନ୍ ପାୱାର ଗ୍ରୁପ୍ ୧ ହଜାର କୋଟିର ପୁଞ୍ଜି ନିବେଶ କରିବ। ପ୍ରଥମଥର ପାଇଁ ଓଡ଼ିଶାରେ ଏଭଳି ପ୍ଲାଣ୍ଟ ପ୍ରତିଷ୍ଠା ହେବ। ଏହା ୧୫୦ ଏମ୍ଏମ୍ କ୍ଷମତା ବିଶିଷ୍ଟ ହେବ। ୧୮ରୁ ୨୪ ମାସ ମଧ୍ୟରେ ଏହି ପ୍ଲାଣ୍ଟ କାର୍ଯ୍ୟକ୍ଷମ ହେବ। ଖୁବ୍ଶୀଘ୍ର ସିଲିକନ୍ ପାୱାରର ଏକ ଟିମ୍ ଓଡ଼ିଶା ଗସ୍ତରେ ଆସିବ। ଆମେରିକା ଗସ୍ତରେ ଥିବା ରାଜ୍ୟ ସରକାରଙ୍କ ଏକ ଟିମ୍ ସିଲିକନ୍ ଗ୍ରୁପ୍ ସହ ଏ ନେଇ ଆଲୋଚନା କରିଛି। ସିଲିକନ୍ ଗ୍ରୁପ୍ର ସହବନ୍ଧିତ ଭାରତୀୟ କମ୍ପାନୀ ଆର୍ଆଇଆର୍ ପାଓ୍ବାର ଇଲେକ୍ଟ୍ରୋନିକ୍ସ ଦ୍ୱାରା ଏହି ପୁଞ୍ଜିନିବେଶ କରିବ। ଇଲେକ୍ଟ୍ରୋନିକ୍ସ ଓ ସେମିକଣ୍ଡକ୍ଟର ଶିଳ୍ପ କ୍ଷେତ୍ରରେ ଗତ ୪ ଦଶନ୍ଧି ଧରି ଖ୍ୟାତି ଅର୍ଜନ କରିଥିବା ଗ୍ରୁପ୍ର ପ୍ରମୋଟର ହର୍ଷଦ ମେହେଟ୍ଟା ଏ ନେଇ ଆମେରିକା ଗସ୍ତରେ ଥିବା ଓଡ଼ିଶା ସରକାରଙ୍କ ପ୍ରତିନିଧିମଣ୍ଡଳୀକୁ ଲେଟର ଅଫ୍ ଇଣ୍ଟେଣ୍ଟ (ଏଲ୍ଓଆଇ) ପ୍ରଦାନ କରିଛନ୍ତି।
ହାଇପାଓ୍ବାର ସେମିକଣ୍ଡକ୍ଟର ଡିଭାଇସ ଏବଂ ୟୁଟିଲିଟି ଆପ୍ଲିକେବଲ ସିଷ୍ଟମ୍ର ଡିଜାଇନ, ବିକାଶ ଓ ଉତ୍ପାଦନ ଆଦି କ୍ଷେତ୍ରରେ ଏକ ବୃହତ୍ ବୈଷୟିକ ଜ୍ଞାନକୌଶଳ ବିକାଶ ସଂସ୍ଥା ଭାବେ ୟୁଏସ୍ ସିଲିକନ୍ ପାଓ୍ବାର ଖ୍ୟାତି ଅର୍ଜନ କରିଛି। ରାଜ୍ୟରେ ସେମିକଣ୍ଡକ୍ଟର ଇକୋସିଷ୍ଟମ୍ର ବିକାଶ କରିବା ପାଇଁ ରାଜ୍ୟ ସରକାର ଉଦ୍ୟମ ଜାରି ରଖିଛନ୍ତି। ମେହେଟ୍ଟାଙ୍କ ନେତୃତ୍ୱରେ କମ୍ପାନୀର ଏକ ଟିମ୍ ଆସନ୍ତା ମାସକ ମଧ୍ୟରେ ଓଡ଼ିଶା ଗସ୍ତ କରିବା କାର୍ଯ୍ୟକ୍ରମ ରହିଛି। ରାଜ୍ୟରେ ଶିଳ୍ପ ପ୍ରକଳ୍ପ ପାଇଁ ଥିବା ଅନୁକୂଳ ପରିବେଶ ସହିତ ରାଜ୍ୟ ସରକାରଙ୍କ ପକ୍ଷରୁ ବିଭିନ୍ନ ନୀତି ଜରିଆରେ ଯୋଗାଇ ଦିଆଯାଉଥିବା ପ୍ରୋତ୍ସାହନ ବିଷୟରେ ଓଡ଼ିଶା ଟିମ୍ ସିଲିକନ୍ ଗ୍ରୁପ୍କୁ ଅବଗତ କରାଇଛି। ନିକଟରେ ରାଜ୍ୟ କ୍ୟାବିନେଟରେ ସେମିକଣ୍ଡକ୍ଟର ମାନୁଫାକ୍ଚରିଂ ଆଣ୍ଡ ଫ୍ୟାବଲେସ୍ ପଲିସିକୁ ଅନୁମୋଦନ ଦିଆଯାଇଥିବା ବିଷୟ ମଧ୍ୟ ଟିମ୍ ଆଲୋଚନା ବେଳେ ଉଲ୍ଲେଖ କରିଥିଲା। ଆଲୋଚନା ପରେ କମ୍ପାନୀ ପକ୍ଷରୁ ରାଜ୍ୟରେ ମାନୁଫାକ୍ଚରିଂ ୟୁନିଟ୍ ସ୍ଥାପନ ପାଇଁ ଏଲ୍ଓଆଇ ପ୍ରଦାନ କରାଯାଇଛି। ସିଲିକନ୍ ପାଓ୍ବାର ମିଡିୟମ ଭୋଲ୍ଟେଜ, ସବ୍ସାଇକେଲ ସୁଇଚିଂ ଟେକ୍ନୋଲୋଜି ଆଣ୍ଡ ସଲ୍ୟୁଶନ କ୍ଷେତ୍ରର ଏକ ଯୁଗାନ୍ତକାରୀ କମ୍ପାନୀ। ଏହି କମ୍ପାନୀ ଅନୁବନ୍ଧିତ କମ୍ପାନୀ ଆର୍ଆଇଆର୍ ପାଓ୍ବାର ଇଲେକ୍ଟ୍ରୋନିକ୍ସ ଜରିଆରେ ଭାରତରେ ଏହାର କାରବାର କରୁଛି। ଆର୍ଆଇଆର୍ ଶିଳ୍ପଭିତ୍ତିକ, ଇଲେକ୍ଟ୍ରିକ ୟୁଟିଲିଟି, ରେଲଓ୍ବେ, ପ୍ରତିରକ୍ଷା ଆଦି କ୍ଷେତ୍ରରେ କାର୍ଯ୍ୟ କରୁଛି। ରାଜ୍ୟ ସରକାର ରାଜ୍ୟରେ କଟିଂ-ଏଜ୍ ମାନୁଫାକ୍ଚରିଂ ଓ ସେମିକଣ୍ଡକ୍ଟର ଇକୋସିଷ୍ଟମ୍ ବିକାଶ ପ୍ରତିବଦ୍ଧତା କ୍ଷେତ୍ରରେ ଅହରହ କାର୍ଯ୍ୟ କରୁଛନ୍ତି। ଏହି ପ୍ଲାଣ୍ଟ କାର୍ଯ୍ୟକ୍ଷମ ହେଲେ ରାଜ୍ୟରେ ପର୍ଯ୍ୟାପ୍ତ ନିଯୁକ୍ତି ସୁଯୋଗ ସୃଷ୍ଟିହେବ ବୋଲି ରାଜ୍ୟ ସରକାର ଆଶା ରଖିଛନ୍ତି।
