ସାକ୍ଷୀଗୋପାଳ,୧୧ ।୧୧ (ଡି.ଏନ୍.ଏ/ସ୍ବ.ପ୍ର.): ଶାନ୍ତି, ମୈତ୍ରୀ, ଏକତା ଓ ସ୍ବଚ୍ଛତା ବାର୍ତ୍ତା ନେଇ ସଚେତନତା ଅଭିଯାନ ଚଳାଇଥିବା ପୁରୀ ଜିଲା ଡେଲାଙ୍ଗ ଗାନ୍ଧୀପୀଠ ରେବୋଇ ଗ୍ରାମର ମୋହନ ମହାପାତ୍ର ଓରଫ ସାଇରାମ ବାବା ସିଲଭର ଗାନ୍ଧୀ ଭାବେ ପରିଚିତ। ସେ ସିଲଭର ଗାନ୍ଧୀ ଭାବେ ଓଡ଼ିଶାର ବିଭିନ୍ନ ସ୍ଥାନ ବୁଲି ବିଭିନ୍ନ ସଚେତନତା ଅଭିଯାନ ଚଳାଇଛନ୍ତି। ଏହି ପରିପ୍ରେକ୍ଷୀରେ ସେ ଶୁକ୍ରବାର ପୂର୍ବାହ୍ନରେ ମହାମହିମ ରାଷ୍ଟ୍ରପତିଙ୍କୁ ରାଜଭନରେ ଭେଟିବାର କାର୍ଯ୍ୟକ୍ରମ ରଖିଛନ୍ତି। ଏଥିପାଇଁ ଗୁରୁବାର ସନ୍ଧ୍ୟାରେ ଏହି ସାମାଜିକ କର୍ମୀ ସାକ୍ଷୀଗୋପାଳ ମନ୍ଦିରଠାରୁ ଯାତ୍ରା ଆରମ୍ଭ କରିଛନ୍ତି। ଓଡ଼ିଆ ଝିଅ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ସୁସ୍ଥ ନିରାମୟ ଜୀବନ ପାଇଁ ସେ ସାକ୍ଷୀଗୋପାଳ ଠାକୁରଙ୍କ ନିକଟରେ ପ୍ରାର୍ଥନା କରିଥିଲେ। ଐତିହ୍ୟ ସମ୍ପର୍ଣ୍ଣ ସତ୍ୟବାଦୀ ବକୁଳବନ, ପର୍ଯ୍ୟଟନ କ୍ଷେତ୍ର ସାକ୍ଷୀଗୋପାଳ ମନ୍ଦିରର ବିକାଶ ନିମନ୍ତେ ସେ ରାଷ୍ଟ୍ରପତିଙ୍କୁ ନିବେଦନ କରିବେ ବୋଲି କହିଛନ୍ତି। ଏହି ଯାତ୍ରା ପାଇଁ ସାକ୍ଷୀଗୋପାଳ ମନ୍ଦିର ସେବାୟତ ଓ ସ୍ଥାନୀୟ ବ୍ୟକ୍ତିମାନେ ସିଲଭର ଗାନ୍ଧୀଙ୍କୁ ସ୍ବାଗତ ଜଣାଇବା ସହ ତାଙ୍କ ଯାତ୍ରା ସଫଳ କାମନାକରି ଠାକୁରଙ୍କ ବାନାଟିଏ ପ୍ରଦାନ କରିଥିଲେ।
