ଭଞ୍ଜନଗର, ୨୮।୯(ଡି.ଏନ୍.ଏ.): ଗଞ୍ଜାମ ଜିଲା ବଡଗଡ ଥାନା ଅନ୍ତର୍ଗତ ବେଲପଡା ଗ୍ରାମରେ ୨୦୧୨ ମସିହାରେ ଘଟିଥିବା ବହୁଚର୍ଚ୍ଚିତ ସ୍ତ୍ରୀ, ନାବାଳିକା ଝିଅ, ନାବାଳକ ପୁତ୍ର ହତ୍ୟା ମାମଲାର ରାୟ ବୁଧବାର ପ୍ରକାଶ ପାଇଛି। ଭଞ୍ଜନଗର ଏଡିଜେ ଦେବବ୍ରତ ପଟ୍ଟନାୟକ ୨୪ ଜଣ ସାକ୍ଷୀଙ୍କ ବୟାନ ଏବଂ ବିଭିନ୍ନ ପ୍ରମାଣ ପତ୍ରକୁ ଆଧାର କରି ଅଭିଯୁକ୍ତ ସୀମାଞ୍ଚଳ ନାୟକଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ଏଥିସହ ୧୦ ହଜାର ଟଙ୍କା ଜରିମାନା ପକାଇଛନ୍ତି। ଜରିମାନା ଅର୍ଥ ଅନାଦେୟ ଅଧିକ ଏକ ବର୍ଷ କାରାଦଣ୍ଡ ଭୋଗିବାକୁ ଏଡିଜେ ତାଙ୍କ ରାୟରେ ନିର୍ଦ୍ଦେଶ ଦେଇଛନ୍ତି।
ସୂଚନାଯୋଗ୍ୟ, ଅଭିଯୁକ୍ତ ସୀମାଞ୍ଚଳ ଏବଂ ସ୍ତ୍ରୀ ଲକ୍ଷ୍ମୀ ନାୟକ ମଧ୍ୟରେ କୌଣସି କାରଣରୁ ପାରିବାରିକ ବିବାଦ ଲାଗି ରହିଥିଲା। ଏହିଭଳି ପରିସ୍ଥିତିରେ ସୀମାଞ୍ଚଳ ୨୦୧୨ ମସିହା ଫେବୃଆରୀ ମାସ ୧୭ ତାରିଖ ରାତିରେ ତାଙ୍କ ସ୍ତ୍ରୀ ଲକ୍ଷ୍ମୀ (୩୩), ଝିଅ ଶିବାନୀ (୧୨) ଓ ପୁଅ ଦୀପକ (୯)ଙ୍କୁ ଖଣ୍ଡାରେ ହତ୍ୟା କରିଥିଲେ। ସ୍ତ୍ରୀ, ଝିଅ ଓ ପୁଅର ବେକକୁ କାଟିବା ସହ ଝିଅର ବାମ ହାତଟିକୁ କାଟି ଅତ୍ୟନ୍ତ ଅମାନୁଷିକ ଭାବେ ହତ୍ୟା କରିଥିଲେ। ସ୍ତ୍ରୀ ଉପରେ ରାଗ ଶୁଝାଇବାକୁ ଯାଇ ନିରୀହ ଝିଅପୁଅକୁ ମଧ୍ୟ ସୀମାଞ୍ଚଳ ହତ୍ୟା କରିଥିଲେ। ଏହାପରେ ସେ ଘର ସମ୍ମୁଖରେ ବସି କାନ୍ଦିଥିଲେ। ଘଟଣା ପରଦିନ ସକାଳେ ଉକ୍ତ ଗ୍ରାମର ସୁକୁଟା ଗୌଡ ଗାଁ ଦାଣ୍ଡରେ ଯାଉଥିବା ବେଳେ ସୀମାଞ୍ଚଳ ତାଙ୍କୁ ଡାକି ଘଟଣା ସମ୍ପର୍କରେ କହିବା ସହ ମୋତେ ମଧ୍ୟ ହାଣିଦିଅ ବୋଲି କହିଥିଲେ। ଏହି ଘଟଣା ନେଇ ସୁକୁଟା ବଡଗଡ଼ ଥାନାରେ ଅଭିଯୋଗ କରିଥିଲେ। ପୋଲିସ ସେ ସମୟରେ ୧୨/୧୨ ରେ ଏକ ହତ୍ୟା ମାମଲା ରୁଜୁ କରି ଅଭିଯୁକ୍ତ ସୀମାଞ୍ଚଳଙ୍କୁ ଗିରଫ କରିଥିଲେ। ଘଟଣା ପରଠାରୁ ସୀମାଞ୍ଚଳ ଭଞ୍ଜନଗର ସତନ୍ତ୍ର ଉପ କାରାଗାରରେ ବନ୍ଦୀ ଥିବା ବେଳେ ବୁଧବାର ଉକ୍ତ ମାମଲାର ରାୟ ପ୍ରକାଶ ପାଇଛି। ସରକାରଙ୍କ ପକ୍ଷରୁ ବରିଷ୍ଠ ଆଇନଜୀବୀ ଏମ୍ ତାଜ ଆଦେନୀ ଏବଂ ମୁଦାଲାଙ୍କ ପକ୍ଷରୁ ଏସ୍ଡିସି ରମେଶ ଚନ୍ଦ୍ର ପଣ୍ଡା ମକଦ୍ଦମା ପରିଚାଳନା କରୁଥିଲେ।
