ଭୁବନେଶ୍ୱର,୨୩ା୮(ସତ୍ୟଜିତ୍ ରାଉତ):ସିମ୍ବକ୍ସ ନେଟ୍ୱର୍କ ମାମଲାରେ କମିଶନରେଟ୍ ପୋଲିସ ବଙ୍ଗୀୟ ଏଜେଣ୍ଟ ରାଜୁ ମଣ୍ଡଳଙ୍କୁ ରିମାଣ୍ଡରେ ଆଣି ଜେରା କରିବାବେଳେ ନୂଆ ନୂଆ ତଥ୍ୟ ମିଳିବାରେ ଲାଗିଛି। ମାଷ୍ଟରମାଇଣ୍ଡ ବାଂଲାଦେଶର ଆଶାଦ୍ଦୁର ଜମାନ୍ଙ୍କ ଫଟୋ ମିଳିଥିବାବେଳେ ତାଙ୍କ ବିଷୟରେ ମଧ୍ୟ ପୋଲିସ ଅଧିକ କିଛି ଜାଣିବାକୁ ପାଇଛି। ଆଶାଦ୍ଦୁର ବାଂଲାଦେଶର ଢାକାରେ ରହି ସିମ୍ବକ୍ସ ସେଟ୍ଅପ୍କୁ ସ୍ମାର୍ଟ ସୁଇଚ୍ ଜରିଆରେ ଅପରେଟ୍ କରୁଥିଲେ ବୋଲି ପୋଲିସ କମିଶନର ସଞ୍ଜୀବ ପଣ୍ଡା ଗୁରୁବାର ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି।
କମିଶନରଙ୍କ ସୂଚନା ଅନୁଯାୟୀ, ଆଶାଦ୍ଦୁର ଢାକାରେ ‘ଆଇକନ୍ ଟେକ୍ନୋଲୋଜି’ ନାଁରେ ଏକ ସଫ୍ଟୱୟାର କମ୍ପାନୀ କରିଛନ୍ତି। ସେ ଭୁବନେଶ୍ୱର ଓ ରାଞ୍ଚତ୍ରେ ଥିବା ସିମ୍ବକ୍ସ ସେଟ୍ଅପ୍ରେ ଦୁଇଟି ସ୍ମାର୍ଟ ସୁଇଚ୍ ଲଗାଇଥିଲେ। ଏହି ସ୍ମାର୍ଟ ସୁଇଚ୍ ଜରିଆରେ ଆଶାଦ୍ଦୁର ସିମ୍ବକ୍ସକୁ ଢାକାରୁ ଅପରେଟ୍ କରିପାରୁଥିଲେ। ଜାତୀୟ ତଦନ୍ତକାରୀ ସଂସ୍ଥା (ଏନ୍ଆଇଏ) ଓ ଗୃହ ମନ୍ତ୍ରଣାଳୟର ଡିପାର୍ଟମେଣ୍ଟ୍ ଅଫ୍ ଟେଲିକମ୍ୟୁନିକେଶନ୍ସ(ଡିଓଟି) ଟିମ୍ ରାଜୁଙ୍କୁ ଜେରା କରି ବହୁ ତଥ୍ୟ ପାଇଛି। ଅନ୍ୟପଟେ ସିମ୍ବକ୍ସ ସମେତ ଜବତ ହୋଇଥିବା କିଛି ସିମ୍ର କଲ୍ ଡିଟେଲ୍ସ ରିପୋର୍ଟ (ସିଡିଆର୍) ଆସିଥିବାବେଳେ ଏହାକୁ କମିଶନରେଟ ପୋଲିସ ଟିମ୍ ଯାଞ୍ଚ କରୁଛି। ଏଥିସହ ସିମ୍ଗୁଡିକରୁ କଲ୍ ଯାଇଥିବା ଲୋକମାନଙ୍କ ତଥ୍ୟ ହାସଲ କରାଯାଉଛି। ତେବେ ରାଜୁଙ୍କ ୫ ଦିନିଆ ରିମାଣ୍ଡ ଅବଧି ସରୁଥିବା ବେଳେ ତାଙ୍କୁ ପୁଣି ଥରେ ଦ୍ୱିତୀୟ ପର୍ଯ୍ୟାୟରେ ମଧ୍ୟ ରିମାଣ୍ଡରେ ଅଣାଯିବ। ୭ ଦିନିଆ ରିମାଣ୍ଡରେ ଆଣିବାକୁ କୋର୍ଟରେ ଆବେଦନ କରାଯିବ ବୋଲି କମିଶନର ପଣ୍ଡା କହିଛନ୍ତି। ତେବେ ଆଶାଦ୍ଦୁରଙ୍କ ଫଟୋ ଦେଖାଇ ଘର ମାଲିକ, ପଡ଼ୋଶୀଙ୍କୁ ପଚରାଉଚରା କରାଯାଇ ପ୍ରମାଣ ଯୋଗାଡ଼ କରାଯିବା ସହ ଇଣ୍ଟରପୋଲ୍ ସହାୟତାରେ ରାଜୁଙ୍କୁ ଗିରଫ କରାଯିବ ବୋଲି କମିଶନର ପଣ୍ଡା କହିଛନ୍ତି। ଉଲ୍ଲେଖ୍ୟ ଯୋଗ୍ୟ, ଗୋଇନ୍ଦା ସୂଚନା ଆଧାରରେ କମିଶନରେଟ୍ ପୋଲିସ ଲକ୍ଷ୍ମୀସାଗର ଥାନା ଅନ୍ତର୍ଗତ ମଙ୍ଗରାଜ ପଏଣ୍ଟ ନିକଟ ମହାଦେବ ନଗରସ୍ଥିତ କୋଠା (ଖାନ୍ ମଞ୍ଜିଲ୍)ରେ ଚଢ଼ାଉ କରିଥିଲା। ଗତ ୧୬ ତାରିଖରେ ରାଜୁଙ୍କୁ ଗିରଫ କରିବା ସହ ୭ଟି ସିମ୍ବକ୍ସ, ୫୦୦ରୁ ଊର୍ଦ୍ଧ୍ୱ ସିମ୍ ଆଦି ଜବତ କରିଥିଲା। ପରେ କଟକ ଏବଂ ରାଞ୍ଚତ୍ରେ ଏହି ନେଟ୍ୱର୍କର ଗୁମର ଖୋଲିବା ଆରମ୍ଭ ହୋଇଥିଲା।