ବମ୍ବେ: ଭେଟେରାନ ଅଭିନେତ୍ରୀ ସିମି ଗେରଓ୍ବୋଲଙ୍କୁ ‘ଦ ଲେଡି ଇନ୍ ହ୍ବାଇଟ୍’ ବୋଲି କୁହାଯାଏ। ଆଜି ବି ତାଙ୍କ ମୁହଁର ଚମକ ପୂର୍ବଭଳି ରହିଛି। ଏଥିପାଇଁ ତ ପ୍ରଶଂସକମାନେ ସିମିଙ୍କୁ ଏଭରଗ୍ରୀନ ବୋଲି କହିବାକୁ ପଛାଉ ନାହାନ୍ତି। ନିକଟରେ ଏକ ସାକ୍ଷାତକାରରେ ସିମି ନିଜ ଜୀବନର କିଛି ଅଜଣା କଥା ଉପରୁ ପରଦା ଉଠାଇଛନ୍ତି।
ସିମିଙ୍କୁ ଯେତେବେଳେ ୧୭ ବର୍ଷ ବୟସ ହୋଇଥିଲା, ସେ ପଡୋଶୀ ଜାମନଗରର ମହାରାଜାଙ୍କୁ ଭଲପାଇ ବସିଥିଲେ। ଘାତ ପ୍ରତିଘାତ ଯୋଗୁ ଉଭୟଙ୍କ ପ୍ରେମ ମାତ୍ର ତିନି ବର୍ଷ ଯାଏ ଚାଲିଥିଲା। ଏହି ସମୟରେ ସେ ପଶୁପକ୍ଷୀଙ୍କ ଦୁନିଆ ଦେଖିଥିଲେ। ଖେଳ ଏବଂ ଖାଇବା ବିଷୟରେ ବହୁତ କଥା ଜାଣିଥିଲେ। ଏବେ ପଛକୁ ଚାହିଁ ସ୍ମୃତିଗୁଡ଼ିକୁ ମନେ ପକାଇଲେ ହସ ଲାଗୁଛି। କାହା ଉପରେ ମାଲିକାନା ଜାହିର କଲେ ସମ୍ପର୍କ ଖରାପ ହୁଏ ବୋଲି ବୁଝି ସାରିଛନ୍ତି ସେ।
ମହାରାଜାଙ୍କ ସହ ସମ୍ପର୍କ ଛିନ୍ନ ହେବା ପରେ ସିମି ଦିଲ୍ଲୀର ରବିମୋହନଙ୍କୁ ବିବାହ କରିଥିଲେ। ଏହି ବିବାହ ୩ ବର୍ଷ ଚାଲିଥିଲା। ଉଭୟ ଅନେକ ଦିନ ଧରି ଅଲଗା ରହିବା ପରେ ଛାଡ଼ପତ୍ର ନେଇ ଅଲଗା ହୋଇଥିଲେ। ମାତ୍ର ସେମାନଙ୍କ ମନରେ ପରସ୍ପର ପାଇଁ ତିକ୍ତତା ନ ଥିବା ସିମି କୁହନ୍ତି।
ପ୍ରେମ, ବିବାହରେ ବିଫଳ ହୋଇଥିବା ସିମିଙ୍କ ଜୀବନର ବଡ଼ ଦୁଃଖ ହେଉଛି ତାଙ୍କର କୌଣସି ସନ୍ତାନ ନାହିଁ। ଏକଦା ସେ ଅନାଥାଶ୍ରମରୁ ଜଣେ ଝିଅକୁ ପୋଷ୍ୟ ସନ୍ତାନ ଭାବେ ଗ୍ରହଣ କରିବାକୁ ଚାହିଁଥିଲେ। ବିଜୟା ନାମରେ ଝିଅଟିଏ ତାଙ୍କୁ ମିଳିଥିଲା। ମାତ୍ର ପୋଷ୍ୟ ସନ୍ତାନ ଭାବେ ଗ୍ରହଣ କରିବା ପୂର୍ବରୁ ଖବରକାଗଜରେ ଫଟୋ ଦେବାକୁ ପଡ଼ୁଥିଲା। ସିମି ସେହିପରି କରିଥିଲେ। ତିନି ମାସ ଧରି କେହି ଶିଶୁଟି ଉପରେ ଅଧିକାର ଜଣାଇ ନ ଥିଲେ। ଯେତେବେଳେ ସିମି ଶିଶୁଟିକୁ ଗ୍ରହଣ କରିବାକୁ ଗଲେ, ସେତେବେଳେ ହଠାତ ଶିଶୁଟିର ପିତାମାତା ପହଞ୍ଚିଯାଇଥିଲେ। ଏହା ତାଙ୍କୁ ଦୁଃଖ ଦେଇଥିଲା ବୋଲି ସିମି କୁହନ୍ତି।