ଲଣ୍ଡନ୍,୧୬ା୩: ଅଲ ଇଂଲଣ୍ଡ ଓପନ ବ୍ୟାଡମିଣ୍ଟନର ପ୍ରଥମ ରାଉଣ୍ଡରୁ ବିଦାୟ ନେଇଛନ୍ତି ଭାରତର ପି ଭି ସିନ୍ଧୁ। ଦୁଇ ଦୁଇ ଥର ଅଲିମ୍ପିକ୍ସ ପଦକ ବିଜୟିନୀ ସିନ୍ଧୁ ପ୍ରଥମ ରାଉଣ୍ଡରେ ଚୀନ୍ର ଝାଙ୍ଗ ୟି ମାନଙ୍କ ନିକଟରୁ ପରାଜିତ ହୋଇଛନ୍ତି। ବୁଧବାର ବର୍ମିଂହାମରେ ଅନୁଷ୍ଠିତ ମ୍ୟାଚରେ ସିନ୍ଧୁ ୧୭-୨୧ ଓ ୧୧-୨୧ରେ ପରାଜିତ ହୋଇଥିଲେ। ମ୍ୟାଚ୍ଟି ମାତ୍ର ୩୯ ମିନିଟ ଧରି ଚାଲିଥିଲା।
୨୦୨୩ ସିନ୍ଧୁଙ୍କ ପାଇଁ ଏତେଟା ଉଲ୍ଲେଖନୀୟ ରହିନାହିଁ। ଆହତ ସମସ୍ୟାରୁ ପ୍ରତ୍ୟାବର୍ତ୍ତନ ପରେ ମାଲେସିଆ ଓପନର ପ୍ରଥମ ରାଉଣ୍ଡରୁ ବିଦାୟ ନେଇଥିବା ବେଳେ କୋଚ୍ ପାର୍କ ଟାଏ ସାଙ୍ଗଙ୍କ ଠାରୁ ଅଲଗା ମଧ୍ୟ ହୋଇଥିଲେ। ବୁଧବାର ପ୍ରଥମ ରାଉଣ୍ଡରେ ସିନ୍ଧୁ ସାମାନ୍ୟ ସଂଘର୍ଷ କରିଥିଲେ। ମାତ୍ର ଦ୍ୱିତୀୟ ରାଉଣ୍ଡରେ ଝାଙ୍ଗ ସମ୍ପୂର୍ଣ୍ଣ ପ୍ରାଧାନ୍ୟ ବିସ୍ତାର କରି ଖେଳିବା ସହିତ ଏକପାଖିଆ ଭାବରେ ମ୍ୟାଚ ଜିତି ନେଇଥିଲେ। ବୁଧବାର ମହିଳା ଡବଲ୍ସ ଯୋଡି ଟ୍ରିସା ଜୋଲି ଓ ଗାୟତ୍ରୀ ଗୋପୀଚାନ୍ଦ ପ୍ରଥମ ରାଉଣ୍ଡ ମ୍ୟାଚ୍ ଜିତିବାରେ ସଫଳ ହୋଇଛନ୍ତି।
ଜୋଲ-ଗୋପୀଚାନ୍ଦ ସପ୍ତମ ସିଡ୍ ଥାଇଲାଣ୍ଡର ଜଙ୍ଗକୋଲଫାନ କିଟିଥାରାକୁଲ ଓ ରାଓ୍ବିଣ୍ଡା ପ୍ରଜୋଗଞ୍ଜାଇଙ୍କୁ ୨୧-୧୮ ଓ ୨୧-୧୪ ସେଟରେ ପରାସ୍ତ କରିଛନ୍ତି। ଥାଇଲାଣ୍ଡ ଯୋଡିଙ୍କ ବିପକ୍ଷରେ ନିଜର ପଞ୍ଚମ ମ୍ୟାଚ ଖେଳୁଥିବା ବେଳେ ଉଭୟ ପ୍ରଥମ ବିଜୟ ହାସଲ କରିଛନ୍ତି। ଅନ୍ୟପକ୍ଷରେ ମଙ୍ଗଳବାର ଭାରତୀୟ ଖେଳାଳି ଏଚ୍ ଏସ୍ ପ୍ରଣୟ ଓ ଲକ୍ଷ୍ୟ ସେନ୍ ନିଜର ପ୍ରଥମ ରାଉଣ୍ଡ ମ୍ୟାଚରେ ବିଜୟ ହାସଲ କରିଛନ୍ତି।
