ଚଣ୍ଡିଗଡ଼,୩୧ ।୫: ପଞ୍ଜାବି ଗାୟକ ସିଦ୍ଧୁ ମୁସେୱାଲାଙ୍କ ପରଲୋକ ଏବେ ଖୁବ୍ ଚର୍ଚ୍ଚାର ବିଷୟ ପାଲଟିଛି । ରବିବାର ତାଙ୍କୁ ଅତି ନିର୍ମମ ଭାବେ ହତ୍ୟା କରାଯାଇଥିବା ବେଳେ ସୋମବାର ଡାକ୍ତରଙ୍କ ଏକ ପ୍ୟାନେଲ ମୃତ ଶରୀରର ପୋଷ୍ଟମର୍ଟମ କରିଛନ୍ତି । ଡାକ୍ତରଙ୍କ ରିପୋର୍ଟରେ ଦର୍ଶାଯାଇଛି ଯେ ମୁସେୱାଲାଙ୍କ ଶରୀରେ ୧୯ଟି କ୍ଷତ ରହିଛି । ଏହାସହ ତାଙ୍କ ଶରୀରରୁ ଏକ ଗୁଳି ବି ବାହାରିଛି । ତାଙ୍କ ବାହୁ ଓ ଜଙ୍ଘରେ ଆଘାତ ଲାଗିଛି । ଡାକ୍ତର ପ୍ରାଥମିକ ଯାଞ୍ଚରୁ ଜାଣିପାରିଛନ୍ତି ଯେ ମୁସେୱାଲାଙ୍କ ଶରୀରରେ ଇଣ୍ଟରନାଲ ବ୍ଲିଡିଙ୍ଗ ଯୋଗୁ ତାଙ୍କର ମୃତ୍ୟୁ ହୋଇଛି । ଏହାହିଁ ତାଙ୍କ ମୃତ୍ୟୁର କାରଣ ହୋଇଥାଇପାରେ ବୋଲି କୁହାଯାଉଛି ।
ପୋଷ୍ଟମର୍ଟମ ରିପୋର୍ଟ ଆସିବା ପରେ ମଙ୍ଗଳବାର ସିଦ୍ଧୁଙ୍କ ଶେଷକୃତ୍ୟ ସମ୍ପନ୍ନ କରାଯିବ ବୋଲି ଜଣାପଡିଛି । ତେବେ ତାଙ୍କର ଅନ୍ତିମ ସସ୍କାର ପୈତୃକ ଗ୍ରାମ ମୁସାରେ କରାଯିବ ବୋଲି ସୂଚନା ରହିଛି । ଏହା ପୂର୍ବରୁ ସିଦ୍ଧୁଙ୍କ ଘର, ସିଭିଲ ହସ୍ପିଟାଲରେ କଡା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ଏହାସହ ସିଲ ବନ୍ଦ ଲଫାପାରେ ପୋଷ୍ଟମର୍ଟମ ରିପୋର୍ଟ ପୋଲିସକୁ ଦିଆଯିବ ବୋଲି ଡାକ୍ତର କହିଛନ୍ତି ।
