ଖଣ୍ଡପଡ଼ା,୨୯ା୯(ଅଜୟ କୁମାର ମହାରଣା): ପୂର୍ବ ପ୍ରଚଳିତ ଅଙ୍କ(ସୁନିଆ) ପରମ୍ପରା ସମ୍ପ୍ରତି ଲୋପ ପାଇବାକୁ ବସିଲାଣି। ଦିନ ଥିଲା କଂସା ପିତଳ ବାସନ ଶିଳ୍ପ ପାଇଁ ପ୍ରସିଦ୍ଧି ଲାଭ କରିଥିବା କଣ୍ଟିଲୋ ଅଞ୍ଚଳର କଂସା ପିତଳ କାରିଗରମାନେ ଏହି ପବିତ୍ର ଦିନରେ ନୂତନ ସାମଗ୍ରୀମାନ ପ୍ରସ୍ତୁତ କରି ସମବାୟ ସମିତି, ବିଭିନ୍ନ ମହାଜନ ଅବା ସାହୁକାରମାନଙ୍କୁ ଭେଟି ଦେବାର ପ୍ରଥା ଥିଲା। ପରେ ସମସ୍ତ କାରିଗର ଓ ସମବାୟ ସମିତିର କର୍ମକର୍ତ୍ତା ଓ ମହାଜନମାନେ ଏକତ୍ର ହୋଇ ଭୋଜି କରୁଥିଲେ। ମାତ୍ର ସମୟର ପରିବର୍ତ୍ତନ ଧାରାରେ ଏବେ ମହାଜନୀ ଓ ସହୁକାର ପ୍ରଥା ଲୋପ ପାଇବା ସଙ୍ଗେ ସଙ୍ଗେ ଏହି ବାମନ ଜନ୍ମ ଦିନରେ ପୂର୍ବର ପରମ୍ପରା ସମ୍ପୂର୍ଣ୍ଣ ଲୋପ ପାଇଗଲାଣି। ତେବେ ପରମ୍ପରାକୁ ଉଜ୍ଜିବିତ କରିବା ଲକ୍ଷ୍ୟରେ ଗୋପୀନାଥ ଧାତୁ ଗବେଷଣା ପ୍ରତିଷ୍ଠାନ ଭୁବନେଶ୍ୱରର ପ୍ରତିଷ୍ଠାତା, କଂସା ପିତଳ ବାସନ ସଂଗ୍ରାହକ ଓ ଗବେଷକ ସୁଦର୍ଶନ ସାହୁ ଏବେ ପ୍ରୟାସ ଆରମ୍ଭ କରିଛନ୍ତି। କଣ୍ଟିଲୋ ଅଞ୍ଚଳର ସାହୁ ବାମନ ଜନ୍ମ ଦିବସ ତଥା ସୁନିଆ ଉପଲକ୍ଷେ ନିଜ ବାସ ଭବନରେ ଏହି ପର୍ବକୁ ପାରମ୍ପରିକ ରୀତିରେ ପାଳନ କରି ଅଞ୍ଚଳର ୫୦ରୁ ଊର୍ଦ୍ଧ୍ୱ ବିଭିନ୍ନ କାରିଗରମାନଙ୍କୁ ନିମନ୍ତ୍ରଣ କରି ସମ୍ବର୍ଦ୍ଧିତ କରିଥିଲେ। ଏ ଅବସରରେ ପୂର୍ବାହ୍ନରେ କଳସ ସ୍ଥାପନ କରାଯାଇ କାରିଗରମାନଙ୍କୁ ବ୍ରତ ବନ୍ଧନ କରାଯାଇଥିଲା। କଣ୍ଟିଲୋ ଅଞ୍ଚଳର କଂସା ପିତଳ କୃତି କାରିଗର ଅନ୍ତର୍ଯ୍ୟାମୀ ମହାରଣା, ଅଖିଳ କୁମାର ମହାପାତ୍ର, ପ୍ରତାପ କୁମାର ମହାରଣା, ଭୀମସେନ ମହାରଣା, ବାଇଧର ସାହୁ, ଉଦ୍ୟନାଥ ସାହୁ, ପୂର୍ଣ୍ଣଚନ୍ଦ୍ର ସାହୁ, ମିଛୁ ସାହୁ, ନିରଞ୍ଜନ ମହାରଣା, ବିଶିଷ୍ଟ କାଷ୍ଠ କାରିଗର ହରିହର ନାୟକ, କଳାକାର ଲକ୍ଷ୍ମଣ ବାରିକ, ପ୍ରସନ୍ନ କୁମାର ଜେନା ପ୍ରମୁଖ ବ୍ୟକ୍ତି ବିଶେଷଙ୍କୁ ଉପଢୌକନ ଓ ପୁଷ୍ପଗୁଚ୍ଛ ପ୍ରଦାନ କରାଯାଇ ସମ୍ବର୍ଦ୍ଧିତ କରାଯାଇଥିଲା। ଉକ୍ତ କାର୍ଯ୍ୟକ୍ରମରେ ଅବସରପ୍ରାପ୍ତ କେନ୍ଦ୍ରୀୟ ବିଦ୍ୟାଳୟ ଅଧ୍ୟକ୍ଷ ଡ. ରଘୁନାଥ ସାହୁ, କନକଲତା ସାହୁ ପ୍ରମୁଖ ଯୋଗଦେଇ ବୁଡି ଯାଉଥିବା ଏହି ପରମ୍ପରାକୁ ଉଜ୍ଜିବିତ କରିବାର ପ୍ରୟାସ ଆରମ୍ଭ କରିଥିବା ଗବେଷକ ସାହୁ ପ୍ରୋତ୍ସାହିତ କରୁଥିବାରୁ ସାଧୁବାଦ ଜଣାଇଥିଲେ।