ସିଡ୍ନୀ, ୧୩ା୧୨ (ପି.ଟି.)- ଶନିବାର ଓ୍ବାର୍ମଅପ୍ ମ୍ୟାଚ ପ୍ରଥମ ଦିବସରେ ଅଷ୍ଟ୍ରେଲୀୟ ବୋଲରଙ୍କ ମୁଣ୍ଡରେ ବଲ୍ ବାଜିବା ପରେ ଭାରତୀୟ ଫାଷ୍ଟ ବୋଲର ମହମ୍ମଦ ସିରାଜଙ୍କ ଆଚରଣକୁ ନେଇ ଅଷ୍ଟ୍ରେଲିଆ ଗଣମାଧ୍ୟମରେ ଉଚ୍ଚ ପ୍ରଶଂସା କରାଯାଇଛି। କାମେରନ ଗ୍ରୀନ୍ ନିଜ ବୋଲିଂରେ ଯଶପ୍ରୀତ ବୁମ୍ରାଙ୍କ ଷ୍ଟ୍ରେଟ୍ ଡ୍ରାଇଭ୍ କ୍ୟାଚ ଧରିବାକୁ ଉଦ୍ୟମ କରୁଥିବା ବେଳେ ବଲ୍ ତାଙ୍କ ହାତରୁ ଖସିବାପରେ ଯାଇ ମୁଣ୍ଡରେ ବାଜିଥିଲା। ସେତେବେଳେ ସିରାଜ ନନ୍ ଷ୍ଟ୍ରାଇକର ଏଣ୍ଡ୍ରେ ଥିଲେ। ସେ ତୁରନ୍ତ ତାଙ୍କ ବ୍ୟାଟ୍କୁ ତଳେ ପକାଇ ସହାୟତା ପାଇଁ ଗ୍ରୀନ୍ଙ୍କ ପାଖକୁ ଯାଇଥିଲେ। ବୁମ୍ରା ମଧ୍ୟ ତାଙ୍କ ପଛେ ପଛେ ଘଟଣାସ୍ଥଳକୁ ଯାଇଥିଲେ। ମୁଣ୍ଡରେ ଆଘାତପାଇବା ପରେ ଭାରତ ଓ ଅଷ୍ଟ୍ରେଲିଆ ଏ’ ମଧ୍ୟରେ ଚାଲିଥିବା ୩ଦିନିଆ ପିଙ୍କ୍ ଓ୍ବାର୍ମଅପ୍ ମ୍ୟାଚ୍ରୁ ଗ୍ରୀନ୍ ବାଦ୍ ପଡିିଛନ୍ତି। ନାଇନ୍ ନ୍ୟୁଜ୍ ଅଷ୍ଟ୍ରେଲିଆ ଟୁଇଟ୍ କରି କହିଛି, ଯୁବ ଅଲ୍ରାଉଣ୍ଡର ଗ୍ରୀନ୍ଙ୍କ ମୁଣ୍ଡରେ ବଲ୍ ବାଜିବା ପରେ ତାଙ୍କୁ ସହାୟତା ପାଇଁ ଆଗେଇ ଆସିବା ଦ୍ୱାରା ଭାରତୀୟ କ୍ରିକେଟର ମହମ୍ମଦ ସିରାଜ ତାଙ୍କ ଖେଳୁଆଡ ମନୋବୃତ୍ତିିର ପରିଚୟ ଦେଇଛନ୍ତି। କ୍ରିକେଟ ଡଟ୍ କମ୍ ଡଟ୍ ଏୟୁ ଟୁଇଟ୍ କରି କହିଛି ଯେ, ସିରାଜ ଏହି ସୁଯୋଗରେ ରନ୍ ସଂଗ୍ରହକୁ ଗୁରୁତ୍ୱ ନ ଦେଇ ଗ୍ରୀନ୍ଙ୍କ ଅବସ୍ଥା ଜାଣିବା ପାଇଁ ତାଙ୍କ ନିକଟକୁ ଯାଇଥିଲେ ଏବଂ ସବୁ ଠିକ୍ ହୋଇଯିବ ବୋଲି କହି ତାଙ୍କୁ ଆଶ୍ୱାସନା ଦେଇଥିଲେ।