ଆବୁଧାବି, ୨୨।୧୦- ପେସ୍ ବୋଲର ମହମ୍ମଦ ସିରାଜଙ୍କ ଘାତକ ବୋଲିଂ ସହାୟତାରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି) ଇଣ୍ଡିଆନ ପ୍ରିମିୟର ଲିଗ୍ର ବୁଧବାର ଅନୁଷ୍ଠିତ ମ୍ୟାଚରେ ଦମ୍ଦାର ବିଜୟ ହାସଲ କରିଛି। ବିରାଟ କୋହଲିଙ୍କ ନେତୃତ୍ୱାଧୀନ ଦଳ କୋଲକାତା ନାଇଟ ରାଇଡର୍ସକୁ ୮ ଉଇକେଟରେ ପରାସ୍ତ କରିଛି। ଆରସିବି ବୋଲରଙ୍କୁ ମୁକାବିଲା କରି ନ ପାରି କୋଲକାତା ୨୦ ଓଭରରେ ୮ ଉଇକେଟ ହରାଇ ମାତ୍ର ୮୪ ରନ କରିଥିଲା। ଜବାବରେ ଆରସିବି ୧୩.୩ ଓଭରରେ ୨ ଉଇକେଟ ହରାଇ ବିଜୟ ଲକ୍ଷ୍ୟ ହାସଲ କରି ନେଇଥିଲା। ଆରସିବି ୧୦ ମ୍ୟାଚରୁ ୭ମ ବିଜୟ ସହ ପଏଣ୍ଟ ଟେବୁଲର ଦ୍ୱିତୀୟ ସ୍ଥାନକୁ ଉନ୍ନୀତ ହୋଇଛି। ଟେବୁଲ ଟପ୍ପର ଦିଲ୍ଲୀ କ୍ୟାପିଟାଲ୍ସ ସମାନ ୧୪ ପଏଣ୍ଟ ପାଇଥିଲେ ହେଁ ଉନ୍ନତ ରନ୍ ହାରରେ ଉପରେ ରହିଛି। ଅନ୍ୟପକ୍ଷରେ କୋଲକାତା ୧୦ ମ୍ୟାଚରୁ ୫ମ ପରାଜୟ ସହ ୪ର୍ଥ ସ୍ଥାନରେ ଅପରିବର୍ତ୍ତିତ ରହିଛି।
ଟସ୍ ଜିତି କୋଲକାତା ଅଧିନାୟକ ଇଅନ ମୋର୍ଗାନ ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲେ। ମାତ୍ର ଏହା ପରୋକ୍ଷରେ ଆର୍ସିବିକୁ ଫାଇଦା ଦେଇଥିଲା। ମ୍ୟାଚରେ ଘାତକ ବୋଲିଂ କରିଥିଲେ ମହମ୍ମଦ ସିରାଜ। ଶାହାବାଜ ଅହମ୍ମଦଙ୍କ ସ୍ଥାନରେ ଦଳରେ ସୁଯୋଗ ପାଇଥିବା ସିରାଜ ନିଜ ପ୍ରଥମ ଦୁଇ ଓଭରରେ କୌଣସି ରନ ନ ଦେଇ ୩ଟି ଉଇକେଟ ନେଇ କୋଲକାତାକୁ ବ୍ୟାକ୍ଫୁଟ୍କୁ ଠେଲି ଦେଇଥିଲେ। ଆଇପିଏଲ୍ ଇତିହାସରେ କ୍ରମାଗତ ୨ଟି ମେଡେନ ନେବାରେ ସେ ପ୍ରଥମ ବୋଲର ହୋଇଥିଲେ। ସେ ନିଜ ପ୍ରଥମ ଓଭରର ତୃତୀୟ ବଲ୍ରେ ରାହୁଲ ତ୍ରିପାଠୀ(୧) ଓ ୪ର୍ଥ ବଲ୍ରେ ନୀତୀଶ ରାଣା(୦)ଙ୍କୁ ଆଉଟ କରି ହ୍ୟାଟ୍ରିକ ସୁଯୋଗ ସୃଷ୍ଟି କରିଥିଲେ। ଟମ୍ ବାଣ୍ଟନ ହ୍ୟାଟ୍ରିକ ହେବାକୁ ଦେଇ ନ ଥିଲେ ହେଁ ଏହା ଏକ ଡବଲ ଉଇକେଟ ମେଡେନ ଓଭର ଥିଲା। ଏହାପରେ ସିରାଜ ନିଜ ଦ୍ୱିତୀୟ ଓଭରର ୩ୟ ବଲ୍ରେ ବାଣ୍ଟନ(୧୦)ଙ୍କୁ ପ୍ୟାଭିଲିୟନ ଫେରାଇ ଆର୍ସିବି ଶିବିରରେ ଉତ୍ସାହ ଖେଳାଇ ଦେଇଥିଲେ। ଏହା ମଧ୍ୟ ଉଇକେଟ ମେଡେନ ଓଭର ଥିଲା। ନବଦୀପ ସଇନି ନିଜ ପ୍ରଥମ ଓଭରରେ ସାମାନ୍ୟ ମହଙ୍ଗା ହୋଇ ୧୦ ରନ ବ୍ୟୟ କରିଥିଲେ ହେଁ ଇନ୍ଫର୍ମ ଓପନର ଶୁମବନ ଗିଲ୍(୧)ଙ୍କୁ ଆଉଟ କରି କୋଲକାତାକୁ ବିପଦରେ ପକାଇଥିଲେ। ଫଳରେ ୪ ଓଭର ଶେଷ ବେଳକୁ କୋଲକାତା ସ୍କୋର ୧୪/୪ ହୋଇ ଯାଇଥିଲା। ସିରାଜ ନିଜ ୩ୟ ଓଭରରେ ମାତ୍ର ୨ ରନ ବ୍ୟୟ କରିଥିଲେ। ଫଳରେ ପାଓ୍ବାରପ୍ଲେ ୬ ଓଭର ବେଳକୁ କୋଲକାତା ମାତ୍ର ୧୭ ରନ ସ୍କୋର କରିଥିଲା। ଚଳିତ ଆଇପିଏଲର କୌଣସି ପାଓ୍ବାରପ୍ଲେରେ ଏହା ସର୍ବନିମ୍ନ ସ୍କୋର। ଦଳର ବିପର୍ଯ୍ୟୟ ସମୟରେ ବିଦାୟୀ ଅଧିନାୟକ ଦୀନେଶ କାର୍ତ୍ତିକ ଓ ଅଧିନାୟକ ଇଅନ ମୋର୍ଗାନଙ୍କ ଉପରେ ଚାପ ବଢ଼ିଥିଲା। ଦୁହେଁ ସତର୍କତାର ସହିତ ଇନିଂସ ସଜାଡ଼ିବାକୁ ଉଦ୍ୟମ କରିଥିଲେ। ମାତ୍ର ଆରସିବି ଅଧିନାୟକ ବିରାଟ କୋହଲି ଆକ୍ରମଣାତ୍ମକ ଆଭିମୁଖ୍ୟରେ ନିଜ ମୁଖ୍ୟ ବୋଲରମାନଙ୍କୁ ଲଗାଇଥିଲେ। ତାହା କାମ ଦେଇଥିଲା। ତାରକା ସ୍ପିନର ୟୁଜବେନ୍ଦ୍ର ଚହଲ ନିଜ ପ୍ରଥମ ଓଭରର ୪ର୍ଥ ବଲ୍ରେ କାର୍ତ୍ତିକ(୪)ଙ୍କୁ ଏଲବିଡବ୍ଲ୍ୟୁ ଆଉଟ କରି କୋଲକାତା ଶିବିରରେ ନୈରାଶ୍ୟ ଖେଳାଇ ଦେଇଥିଲେ। ୮.୪ ଓଭରରେ କୋଲକାତା ସ୍କୋର ୩୨/୫ ହୋଇଥିଲା। ପରିସ୍ଥିତିକୁ ଦୃଷ୍ଟିରେ ରଖି ପ୍ୟାଟ୍ କୁମିନ୍ସ ସ୍ବାଭାବିକ ବ୍ୟାଟିଂ ନ କରି ଧିମା ଖେଳିଥିଲେ। ମାତ୍ର ସେ ୧୭ ବଲ୍ରୁ ୪ ରନ କରିଥିବାବେଳେ ଚହଲଙ୍କ ଦ୍ୱିତୀୟ ଶିକାର ବନିଥିଲେ। ୧୫ ଓଭରରେ କୋଲକାତା ସ୍କୋର ୫୦ ଛୁଇଁଥିଲା। ଆଇପିଏଲ ଇତିହାସରେ ଏହା ସବୁଠାରୁ ଧିମା ସ୍କୋର। ପୂର୍ବରୁ ୨୦୦୯ରେ ଡର୍ବାନଠାରେ ଚେନ୍ନାଇ ବିପକ୍ଷରେ ପଞ୍ଜାବ ୧୩.୧ ଓଭରରେ ୫୦ ରନ ପୂରଣ କରି ଏହି ଅଲୋଡ଼ା ରେକର୍ଡର ଅଧିକାରୀ ଥିଲା। ପରେ ଆସିଥିଲା ଯୁବ ସ୍ପିନର ଓ୍ବାଶିଂଟନ ସୁନ୍ଦରଙ୍କ ପାଳି। ସେ ମୋର୍ଗାନଙ୍କ ପ୍ରାଇଜ୍ ଉଇକେଟ ହାସଲ କରିଥିଲେ। ସୁନ୍ଦରଙ୍କ ଶର୍ଟ ଅଫ୍ ଲେନ୍ଥ ବଲ୍କୁ ପୁଲ୍ କରିବାକୁ ଯାଇ ମୋର୍ଗାନ ଡିପ୍ ମିଡ୍ ଉଇକେଟରେ ଗୁରକୀରଟ ସିଂଙ୍କୁ କ୍ୟାଚ ଦେଇଥିଲେ। ୩୪ଟି ବଲ୍ ଖେଳିଥିବା ମୋର୍ଗାନ ୩ ଚୌକା ଓ ୧ ଛକା ସହାୟତାରେ ୩୦ ରନ କରିଥିଲେ। ମ୍ୟାଚ ଶେଷରେ ସିରାଜଙ୍କ ବୋଲିଂ ସ୍ପେଲ୍ ଥିଲା ୪-୨-୮-୩। ଦୁଇ ସ୍ପିନର ଚହଲ ୪-୦-୧୫-୨ ଓ ସୁନ୍ଦର ୪-୧-୧୪-୨ ମଧ୍ୟ ବଢ଼ିଆ ସ୍ପେଲ କରିଥିଲେ। ଫଳରେ କୋଲକାତା ଇନିଂସ ୨୦ ଓଭରରେ ୮୪/୮ରେ ସୀମିତ ରହିଥିଲା। ଅନ୍ୟ ଆରସିବି ବୋଲର ମଧ୍ୟରେ ସଇନୀ ଗୋଟିଏ ଉଇକେଟ ନେଇଥିଲେ। ଲୋକି ଫର୍ଗୁସନ ୧୬ ବଲ୍ରୁ ୧୯ ରନରେ ଅପରାଜିତ ରହିଥିଲେ।
୮୫ ରନ ବିଜୟ ଲକ୍ଷ୍ୟନେଇ ପଡ଼ିଆକୁ ଓହ୍ଲାଇଥିବା ଆରସିବି ପକ୍ଷରୁ ଦୁଇ ଓପନର ଦେବଦତ୍ତ ପଡିକାଲ ଓ ଆରୋନ ଫିଞ୍ଚ୍ ଭଲ ଆରମ୍ଭ କରିଥିଲେ। ଓପନିଂ ଯୋଡ଼ିରେ ୩୮ ବଲ୍ରୁ ୪୬ ରନ ଯୋଗ ହେବାପରେ କୋହଲିଙ୍କ ଦଳକୁ ଡବଲ୍ ଝଟ୍କା ଲାଗିଥିଲା। ଫିଞ୍ଚ୍ ୨୧ ବଲ୍ରୁ ୧୬(୨ ଚୌକା) ରନ କରି ଲୋକି ଫର୍ଗୁସନ ବଲ୍ରେ ଆଉଟ ହୋଇଥିବାବେଳେ ଠିକ୍ ପରବର୍ତ୍ତୀ ବଲ୍ରେ ପଡିକାଲ ରନ୍ଆଉଟ ହୋଇ ଯାଇଥିଲେ। ସେ ୧୭ ବଲ୍ରୁ ୨୫(୩ ଚୌକା) ରନ କରିଥିଲେ। ବ୍ୟାଟିଂ କ୍ରମରେ ୩ ନମ୍ବର ସ୍ଥାନରେ ଆସିଥିବା ଗୁରକୀରଟ ସିଂ ମାନ୍ ଓ କୋହଲି ଆଉ କୌଣସି କ୍ଷତି ହେବାକୁ ନ ଦେଇ ଅସମାପ୍ତ ୩ୟ ଉଇକେଟ ଯୋଡ଼ିରେ ୩୯ ରନର ଭାଗୀଦାରି ଗଢ଼ି ଦଳକୁ ବିଜୟୀ କରାଇଥିଲେ। ଗୁରକୀରଟ ୨୧(୨୬ ବଲ, ୪ ଚୌକା) ଓ କୋହଲି ୧୮(୧୭ ବଲ, ୨ ଚୌକା) ରନରେ ଅପରାଜିତ ରହିଥିଲେ।
ସଂକ୍ଷିପ୍ତ ସ୍କୋର
କୋଲକାତା ନାଇଟ ରାଇଡର୍ସ ୨୦ ଓଭରରେ ୮୪/୮(ମୋର୍ଗାନ-୩୦, ସିରାଜ-୩/୮, ଚହଲ-୨/୧୫, ସଇନି-୧/୨୩, ସୁନ୍ଦର-୧/୧୪)। ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ୧୩.୩ ଓଭରରେ ୮୫/୨ (ପଡିକାଲ-୨୫, ଗୁରକୀରଟ-୨୧*, କୋହଲି-୧୮*, ଫର୍ଗୁସନ-୧/୧୭)।
