ନୂଆଦିଲ୍ଲୀ,୧୯।୨ : ଦିଲ୍ଲୀର ଉପମୁଖ୍ୟମନ୍ତ୍ରୀ ମନୀଷ ସିସୋଡିଆ ସିବିଆଇକୁ ଚିଠି ଲେଖି ହାଜର ହେବା ନେଇ ସମୟ ମାଗିଛନ୍ତି। କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ରବିବାର ତାଙ୍କୁ ଦିଲ୍ଲୀ ମଦ ନୀତି ସହ ଜଡିତ ମାମଲାରେ ପଚରାଉଚରା ପାଇଁ ଡାକିଥିଲେ। ଏହା ଉପରେ ଉପମୁଖ୍ୟମନ୍ତ୍ରୀ ସିସୋଡିଆ ବଜେଟ ପ୍ରସ୍ତୁତ କରିବାରେ ବ୍ୟସ୍ତ ଥିବାରୁ ସିବିଆଇଠାରୁ ହାଜର ହେବା ପାଇଁ ଏକ ସପ୍ତାହ ସମୟ ମାଗିଛନ୍ତି।
ସିସୋଡିଆ ସିବିଆଇକୁ ଏକ୍ସାଇଜ ପଲିସି ମାମଲାର ତଦନ୍ତକୁ ଫେବୃଆରୀ ଶେଷ ପର୍ଯ୍ୟନ୍ତ ସ୍ଥଗିତ ରଖିବାକୁ ଅନୁରୋଧ କରିଛନ୍ତି। ସେ କହିଛନ୍ତି ଯେ ମୁଁ ସିବିଆଇକୁ ଅନୁରୋଧ କରୁଛି ଯେ ମୁଁ ବର୍ତ୍ତମାନ ବଜେଟରେ ବ୍ୟସ୍ତ ଅଛି। ଫେବୃଆରୀ ଶେଷରେ କିମ୍ବା ତା’ପରେ ମୋତେ ହାଜର ହେବାକୁ ଡାକନ୍ତୁ। ଦିଲ୍ଲୀର ବଜେଟକୁ ଧ୍ୟାନରେ ରଖି ସେ ପଚରାଉଚରା ତାରିଖ ବଢ଼଼ାଇବାକୁ ସିବିଆଇକୁ ଅନୁରୋଧ କରିଛନ୍ତି। ଫେବୃଆରୀ ଶେଷ ପର୍ଯ୍ୟନ୍ତ ଦିଲ୍ଲୀର ବଜେଟ ପ୍ରସ୍ତୁତିର ବ୍ୟସ୍ତ ରହିବେ। ତେବେ ଏବେ ବଡ ପ୍ରଶ୍ନ ଉଠୁଛି ସେ ସିବିଆଇ ଏହାକୁ ସ୍ବୀକୃତି ଦେବ କି ନାହିଁ।
ମନୀଷ ସିସୋଡିଆ କହିଛନ୍ତି ଯେ ମୁଁ ଫେବୃଆରୀ ୧୮ ରେ ସିବିଆଇ ତରଫରୁ ଏକ ନୋଟିସ ପାଇଥିଲି ଯେ ରବିବାର ସେମାନେ ଏକ୍ସାଇଜ ପଲିସି ଉପରେ ପ୍ରଶ୍ନ କରିବା ପାଇଁ ମୋତେ ଡାକିବାକୁ ଚାହୁଁଛନ୍ତି। ମୁଁ ତାଙ୍କୁ ଅନୁରୋଧ କରିଛି ଯେ ଦିଲ୍ଲୀର ଅର୍ଥମନ୍ତ୍ରୀ ହୋଇଥିବାରୁ ମୋର ପ୍ରତ୍ୟେକ ଦିନ ଗୁରୁତ୍ୱପୂର୍ଣ୍ଣ ଏବଂ ମୁଁ ବଜେଟ ଶେଷ କରିବାରେ ବ୍ୟସ୍ତ ଅଛି। ଫେବୃଆରୀ ଶେଷ ସୁଦ୍ଧା ଏହାକୁ ଅନୁମୋଦନ ପାଇଁ କେନ୍ଦ୍ରକୁ ପଠାଯିବ। ଏହା କେନ୍ଦ୍ରର ଅନୁମୋଦନ ପରେ ହିଁ ଦିଲ୍ଲୀ ବିଧାନସଭାରେ ପାରିତ ହୋଇଥାଏ। ଫେବୃଆରୀ ଶେଷ କିମ୍ବା ତା’ପରେ ଯେ କୌଣସି ସମୟରେ ମୋତେ ଡାକନ୍ତୁ। ଫେବୃଆରୀ ପରେ ମୋତେ ଡାକିବାକୁ ମୁଁ ଅନୁରୋଧ କରିଛି ଏବଂ ମୁଁ ସମସ୍ତ ପ୍ରଶ୍ନର ଉତ୍ତର ଦେବି । ମୁଁ ସବୁବେଳେ ସହଯୋଗ କରିଆସୁଛି ଏବଂ ଏହା ଜାରି ରଖିବି ।