ନୂଆଦିଲ୍ଲୀ,୭।୩: ଦିଲ୍ଲୀ ମଦ ଦୁର୍ନୀତି ମାମଲାରେ ଗିରଫ ହୋଇ ଜେଲରେ ଥିବା ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆଙ୍କୁ ସିବିଆଇ, ଇଡି ଜେରା କରୁଛି। ଏହି ସମୟରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ମୋଦି ସରକାରଙ୍କୁ ଟାର୍ଗେଟ୍ କରିଛନ୍ତି। ସେ କହିଛନ୍ତି, ମନୀଷ ସିସୋଡିଆ ଦିଲ୍ଲୀର ବିଦ୍ୟାଳୟଗୁଡ଼ିକୁ ପରିବର୍ତ୍ତନ କରି ଗରିବ ପିଲାମାନଙ୍କୁ ଶିକ୍ଷା ପ୍ରଦାନ କରିଥିଲେ, କିନ୍ତୁ ପ୍ରଧାନମନ୍ତ୍ରୀ ମୋଦି ମିଥ୍ୟା ମାମଲା ରୁଜୁ କରି ସିସୋଡିଆଙ୍କୁ ଜେଲ ପଠାଇଛନ୍ତି। ସେ ଆହୁରି ମଧ୍ୟ କହିଛନ୍ତି, ମୁଁ ହୋଲିରେ ପୂରାଦିନ ଦେଶ ପାଇଁ ପ୍ରାର୍ଥନା କରିବି।
କେଜ୍ରିଓ୍ବାଲ ପୁଣି କହିଛନ୍ତି, ସାରା ଦେଶରେ ସରକାରୀ ବିଦ୍ୟାଳୟଗୁଡ଼ିକର ଅବସ୍ଥା ଖରାପ। ତଥାପି ଗରିବ ଲୋକମାନେ ନିଜ ପିଲାଙ୍କୁ ବାଧ୍ୟ ହୋଇ ପଢିବାକୁ ଛାଡୁଛନ୍ତି। ସ୍ବାଧୀନତାର ୭୫ବର୍ଷ ପରେ ଏପରି ଜଣେ ବ୍ୟକ୍ତି ଆସିଲେ, ଯିଏ ସରକାରୀ ବିଦ୍ୟାଳୟଗୁଡ଼ିକୁ ପରିବର୍ତ୍ତନ କରି ଧନୀ ପିଲାଙ୍କ ପରି ଗରିବ ପିଲାମାନଙ୍କୁ ଶିକ୍ଷା ଦେଇଥିଲେ। ମନୀଷ ସିସୋଡିଆ ଦେଶ ପାଇଁ ମଧ୍ୟ ନିଜ ଜୀବନ ଦେଇପାରିବେ ବୋଲି କେଜ୍ରିଓ୍ବାଲ କହିଛନ୍ତି।
