ନୂଆଦିଲ୍ଲୀ,୨୫।୪ : ମଦ ନୀତି ଦୁର୍ନୀତି ମାମଲାରେ ସିବିଆଇ ମଙ୍ଗଳବାର ରାଉସ ଆଭେନ୍ୟୁ କୋର୍ଟରେ ଏକ ସପ୍ଲିମେଣ୍ଟାରୀ ଚାର୍ଜଶିଟ ଦାଖଲ କରିଛି। ଯେଉଁଥିରେ ପ୍ରଥମ ଥର ପାଇଁ ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ତଥା ଆମ ଆଦମୀ ପାର୍ଟି (ଏଏପି) ନେତା ମନୀଷ ସିସୋଡିଆଙ୍କ ନାମ ଅନ୍ତର୍ଭୁକ୍ତ ହୋଇଛି। ଏହା ସହିତ ବୁଚି ବାବୁ, ଅମାନଦୀପ ସିଂ ଢଲ ଏବଂ ଅର୍ଜୁନ ପାଣ୍ଡେଙ୍କ ବିରୋଧରେ ସପ୍ଲିମେଣ୍ଟାରୀ ଚାର୍ଜଶିଟ ଦାଖଲ କରାଯାଇଛି। ଚାର୍ଜସିଟ ସମ୍ପର୍କରେ ଜଣାଇବା ପାଇଁ କୋର୍ଟ ମେ ୧୨ ପୂର୍ବାହ୍ନ ୧୦ଟା ୩୦ ସମୟ ସ୍ଥିର କରିଛନ୍ତି।
ମଦ ନୀତିରେ ହୋଇଥିବା ଅନିୟମିତତାକୁ ସିବିଆଇ ଯାଞ୍ଚ କରୁଛି ଯେଉଁଥି ପାଇଁ କେନ୍ଦ୍ରୀୟ ଅନୁସନ୍ଧାନ ଏଜେନ୍ସି ଫେବୃଆରୀ ୨୬ରେ ସିସୋଡିଆଙ୍କୁ ଗିରଫ କରିଥିଲା। ଏକ୍ସାଇଜ ନୀତି ସହ ଜଡିତ ମନି ଲଣ୍ଡରିଂ ମାମଲାରେ ଇଡି ସିସୋଡିଆଙ୍କୁ ମଧ୍ୟ ପଚରାଉଚରା କରୁଛି। ମଦ ନୀତି ଦୁର୍ନୀତିର ମୁଖ୍ୟ ଅଭିଯୁକ୍ତ ସିସୋଡିଆ ବୋଲି ସିବିଆଇ କହିଛି।
ଅଭିଯୋଗ ହୋଇଛି, ଦିଲ୍ଲୀ ସରକାରଙ୍କ ୨୦୨୧-୨୨ ର ଏକ୍ସାଇଜ ପଲିସିରେ ମଦ ବ୍ୟବସାୟୀଙ୍କୁ ଲାଇସେନ୍ସ ପ୍ରଦାନ କରାଯାଇଛି। ଯାହାଦ୍ୱାରା କିଛି ଡିଲର ଉପକୃତ ହୋଇଥିଲେ। ଡିଲରଶିପ୍ ପାଇ ଁବ୍ୟାପକ ଲାଞ୍ଚ କାରବାର ହୋଇଥିବା ଅଭିଯୋଗ ହୋଇଥିଲା। ପରେ ଏହି ନୀତିକୁ ରଦ୍ଦ କରାଯାଇଥିଲା।