ଭୁବନେଶ୍ୱର,୨୮।୨(ବ୍ୟୁରୋ): ରସିକିଆ ନକଲି ଡାକ୍ତର ରମେଶଚନ୍ଦ୍ର ସ୍ବାଇଁଙ୍କ ପ୍ରତାରଣା ଓ ଠକେଇ ସାମ୍ରାଜ୍ୟକୁ ଭେଦ କରିପାରୁନି କମିଶନରେଟ ପୋଲିସ। ଶୁକ୍ରବାରଠାରୁ ଦ୍ୱିତୀୟଥର ରିମାଣ୍ଡରେ ଆଣି ମାରାଥନ ଜେରା କରିଥିଲେ ମଧ୍ୟ ସେପରି ଅଧିକ କିଛି ତଥ୍ୟ ପାଇପାରି ନାହିଁ ପୋଲିସ। ଇତିମଧ୍ୟରେ ରବିବାର ତିନିଦିନିଆ ରିମାଣ୍ଡର ଅବଧି ଶେଷ ହୋଇଛି। ତାଙ୍କ ବୟାନ ଆଧାରରେ କେବଳ ପୂର୍ବରୁ ଠାବ ହୋଇଥିବା ଢେଙ୍କାନାଳ ଜିଲା କାମାକ୍ଷାନଗର ଓ କଟକ ଜିଲାର ନରସିଂହପୁରସ୍ଥିତ କ୍ଲିନିକ୍ ସଂକ୍ରାନ୍ତରେ ଅଧିକ ଛାନ୍ଭିନ୍ କରାଯାଇଛି। ଶନିବାର ସ୍ବତନ୍ତ୍ର ମହିଳା ତଦନ୍ତକାରୀ ଟିମ୍ ରମେଶଙ୍କ ଢେଙ୍କାନାଳ ଜିଲା କାମାକ୍ଷାନଗରସ୍ଥିତ ଘରେ ଥିବା କ୍ଲିନିକ ଓ ସେଠାରେ ରହିଥିବା ଭୂତଳ ଗୁପ୍ତ କୋଠାରି ସମେତ କଟକ ଜିଲା ନରସିଂହପୁରରେ ରହିଥିବା କ୍ଲିନିକରେ ଚଢ଼ାଉ କରି ଯାଞ୍ଚ କରିଥିଲା। ଏଥିସହ କର୍ମଚାରୀ ଓ ବାହାର ଲୋକଙ୍କୁ ପଚରାଉଚରା କରି ବୟାନ ରେକର୍ଡ କରିଥିଲା। ତେବେ ଠକେଇ ଟଙ୍କାର ସିଂହ ଭାଗ କଟକ ଖୁଣ୍ଟୁଣିସ୍ଥିତ ଫାର୍ମ ହାଉସ୍ରେ ରମେଶ ଖର୍ଚ୍ଚ କରିଥିବା ପଚରାଉଚରାବେଳେ ସେ ପୋଲିସକୁ କହିଛନ୍ତି। ତାଙ୍କ କଥାରେ ତାଳମେଳ ରହୁ ନ ଥିବାରୁ ପୋଲିସ ଏହାକୁ ସହଜରେ ବିଶ୍ୱାସ କରିପାରୁନି। ରବିବାର ତାଙ୍କର ୩ଦିନିଆ ରିମାଣ୍ଡ ସରିଛି। ସେ ଜଣେ ପେସାଦାର ଠକ ଓ ପ୍ରତାରକ ହୋଇଥିବାରୁ ବର୍ଷ ବର୍ଷ ଧରି ଲୋକଙ୍କଠାରୁ ଠକେଇ କରି ଆଣିଥିବା କୋଟି କୋଟି ଟଙ୍କା କେଉଁଠି ବିନିଯୋଗ କରିଛନ୍ତି, ତାହାର ସଂପୂର୍ଣ୍ଣ ତଥ୍ୟ ହାସଲ ଲାଗି ପୁଣିଥରେ ୫ ଦିନିଆ ରିମାଣ୍ଡରେ ଆଣିବାକୁ କମିଶନରେଟ ପୋଲିସ ଯୋଜନା ରଖିଛି। ତେବେ ଆଗକୁ ରମେଶଙ୍କ ସହ ଏହି ଠକେଇ ମାମଲାରେ ଗିରଫ ହୋଇ ଜେଲ୍ ଯାଇଥିବା ଭଉଣୀ ରଶ୍ମିତାଙ୍କୁ ମଧ୍ୟ ରିମାଣ୍ଡରେ ଆଣି ସାମ୍ନାସାମ୍ନି ଜେରା କରି ଅଧିକ ତଥ୍ୟ ହାସଲ କରାଯିବ। ଏଥିସହ ରମେଶଙ୍କ ନାଁରେ ରାଜ୍ୟ ବାହାରେ କେଉଁସବୁ ବ୍ୟାଙ୍କ୍ରେ ଆକାଉଣ୍ଟ ରହିଛି, ସେଥିରେ କେତେ ଟଙ୍କା ରହିଛି ଓ ପୂରା ଆର୍ଥିକ କାରବାର ସମ୍ପର୍କରେ ତଥ୍ୟ ପାଇବା ପାଇଁ ରିର୍ଜଭ ବ୍ୟାଙ୍କକୁ ଅନୁରୋଧ କରାଯାଇଛି ବୋଲି ତଦନ୍ତକାରୀ ଟିମ୍ର ମୁଖ୍ୟ ଏସିପି ସଞ୍ଜୀବ ଶତପଥୀ ରବିବାର ସୂଚନା ଦେଇଛନ୍ତି।
ସୂଚନାଯୋଗ୍ୟ, ରମେଶ ନିଜକୁ କେନ୍ଦ୍ର ସ୍ବାସ୍ଥ୍ୟ ବିଭାଗର ଉପନିର୍ଦ୍ଦେଶକ କହି ବିଭିନ୍ନ ମାଟ୍ରିମୋନିଆଲ ଓ ସୋସିଆଲ୍ ସାଇଟ୍ରୁ ଉଚ୍ଚଶିକ୍ଷିତା ମହିଳାଙ୍କୁ ଫସାଇ ବିବାହ କରୁଥିଲେ। ପରେ ସେମାନଙ୍କଠାରୁ ଟଙ୍କା, ସୁନା ଓ ସମ୍ପତ୍ତି ଲୁଟୁଥିଲେ। ଏଥିରେ ତାଙ୍କୁ ଭଉଣୀ ରଶ୍ମିତା ଓ ଭିଣୋଇ ଗଣେଶ୍ୱର ବେହୁରା ସହଯୋଗ କରୁଥିଲେ। ତେବେ ରମେଶଙ୍କ ଦ୍ୱାରା ପ୍ରତାରଣାର ଶିକାର ହୋଇଥିବା ଦିଲ୍ଲୀର ଜଣେ ମହିଳା ଗତବର୍ଷ ଜୁଲାଇରେ ଭୁବନେଶ୍ୱର ମହିଳା ଥାନାରେ ଅଭିଯୋଗ କରିବା ପରେ ରମେଶଙ୍କ କଳାକାରନାମା ପଦାକୁ ଆସିଥିଲା। ସେ ବିଭିନ୍ନ ରାଜ୍ୟର ୧୪ଜଣଙ୍କୁ ଏପରି ଫସାଇ ବିବାହ କରିବା ସହ ଟଙ୍କା ଓ ସମ୍ପତ୍ତି ଲୁଟିଥିବା ଜଣାପଡିଥିଲା। ଏଥିସହ ଚାକିରି ଓ ଡାକ୍ତରୀ ପାଠରେ ନାମଲେଖା ପାଇଁ ବହୁ ଲକ୍ଷ ଟଙ୍କା ଠକେଇ କରିଥିବା ମଧ୍ୟ ଅଭିଯୋଗ ହୋଇଥିଲା। ତେବେ ଗତ ମଙ୍ଗଳବାର ପୋଲିସ କେନ୍ଦ୍ରାପଡ଼ା ଜିଲା ଈଶ୍ୱରପୁରରେ ଚଢ଼ାଉ କରି ଭଉଣୀ ରଶ୍ମିତାଙ୍କୁ ଗିରଫ କରିଥିବାବେଳେ ଭିଣୋଇ ଗଣେଶ୍ୱର ଖସି ପଳାଇଥିଲେ।