ନୟାଗଡ଼ ଅଫିସ,୨୦ା୧୨: ପରୀ ହତ୍ୟା ଘଟଣାର ତଦନ୍ତ କରୁଥିବା ବରିଷ୍ଠ ଆଇପିଏସ୍ ଅଧିକାରୀ ଅରୁଣ ବୋଥ୍ରାଙ୍କ ନେତୃତ୍ୱାଧୀନ ସ୍ବତନ୍ତ୍ର ତଦନ୍ତକାରୀ ଦଳ (ଏସ୍ଆଇଟି) ଯଦୁପୁର ଗାଁର ସରୋଜ ସେଠୀଙ୍କ ସମେତ ମା’ ଶୈଳବାଳା ଓ ବଡ଼ଭଉଣୀଙ୍କୁ ଶନିବାର ଭୋର ସମୟରେ ଉଠାଇ ନେଇ ଲାଏ ଡିଟେକ୍ଶନ ଟେଷ୍ଟ କରିଥିବା ଜଣାପଡ଼ିଛି। ସରୋଜଙ୍କୁ ଅଟକ ରଖିଥିବାବେଳେ ତାଙ୍କ ମା’ ଶୈଳବାଳା ଓ ଭଉଣୀଙ୍କୁ ସନ୍ଧ୍ୟାରେ ଏସ୍ଆଇଟି ଛାଡ଼ି ଦେଇଥିଲା।
ସୂଚନାଥାଉ କି, ତଦନ୍ତ ଆରମ୍ଭଠାରୁ ଏସ୍ଆଇଟି ସ୍କାନରରେ ଯଦୁପୁର ଗାଁର ସରୋଜ ସେଠୀ ଓ ତାଙ୍କ ମା’ ଥିଲେ। ସରୋଜ ଯୁକ୍ତ ୩ କଳାରେ ପାଠପଢ଼ୁଥିବାବେଳେ ମା’ ଆଶାକର୍ମୀ ଅଛନ୍ତି। ଏସ୍ଆଇଟି ପକ୍ଷରୁ ସରୋଜଙ୍କୁ ବିଭିନ୍ନ ସମୟରେ ଜେରା କରାଯାଇଥିଲା। ପୂର୍ବରୁ ସରୋଜଙ୍କ ରକ୍ତନମୁନା, ଲାଳ, ମୋବାଇଲ ଫୋନ, ପ୍ୟାଣ୍ଟ ଶାର୍ଟ, ଶେଯ ଓ ଘରର ବିଭିନ୍ନ ଲୋକଙ୍କର ପୋଷାକ ଓ ବିଭିନ୍ନ ଉପକରଣ ଏସ୍ଆଇଟି ନେଇଥିଲା। ବାରମ୍ବାର ଜେରା ପରେ ସରୋଜ ଅତିଷ୍ଠ ହୋଇ ଗଣମାଧ୍ୟମରେ ଏସ୍ଆଇଟି ମୁଖ୍ୟ ଅରୁଣ ବୋଥ୍ରାଙ୍କ ନଁାରେ ଅଭିଯୋଗ କରିଥିଲେ। ଏସ୍ଆଇଟି ମୁଖ୍ୟ ତାଙ୍କୁ ଫସାଇବାକୁ ଯୋଜନା କରିଥିବା ସେ କହିଥିଲେ। ହତ୍ୟାକାରୀ ଭାବେ ଦୋଷ ସ୍ବୀକାର କରିବା ପାଇଁ ବୋଥ୍ରା ଧମକଚମକ ଦେବା ସହ ୫ ଲକ୍ଷ ଟଙ୍କାର ଲୋଭ ଦେଖାଇଥିଲେ ବୋଲି ସରୋଜ ଗତ ରବିବାର ଅଭିଯୋଗ କରିଥିଲେ। ଏସ୍ଆଇଟି ପକ୍ଷରୁ ଗତ ବୁଧବାର ହାଇକୋର୍ଟରେ ତଦନ୍ତର ଷ୍ଟାଟସ୍ ରିପୋର୍ଟ ବନ୍ଦ ଲଫାପାରେ ଦାଖଲ କରାଯାଇଥିଲା। ପରୀକୁ ବଳାତ୍କାର ପରେ ହତ୍ୟା କରାଯାଇଥିବା ଏବଂ ହତ୍ୟାକାରୀ ଯଦୁପୁରର ବୋଲି ଉକ୍ତ ରିପୋର୍ଟରେ ଦର୍ଶାଯାଇଥିବା ଏକ ଅସମର୍ଥିତ ସୂତ୍ରରୁ ଜଣାପଡ଼ିଥିଲା।
ଏପରିସ୍ଥଳେ ଶନିବାର ଭୋରରୁ ଏସ୍ଆଇଟି ଅଧିକାରୀମାନେ ସରୋଜଙ୍କ ପରିବାରର ୩ଜଣଙ୍କୁ ଉଠାଇନେବା ପରେ ସେମାନେ ପରୀ ହତ୍ୟାକାଣ୍ଡରେ ସମ୍ପୃକ୍ତି ଥିବା ନେଇ ଚର୍ଚ୍ଚା ଚାଲିଛି। କିନ୍ତୁ ଏସ୍ଆଇଟି ପକ୍ଷରୁ କିଛି କୁହାଯାଇନି। ଗଁା ସଭାପତି ଜୟକୃଷ୍ଣ ପରିଡ଼ା କହିଛନ୍ତି, ପରୀ ହତ୍ୟାକାରୀ ଧରାପଡ଼ୁ। ତାକୁ ଫାଶୀ ଦିଆଯାଉ। କିନ୍ତୁ ଏସ୍ଆଇଟି ପ୍ରମାଣ ଆଧାରରେ ହତ୍ୟାକାରୀକୁ ଚିହ୍ନଟ କରୁ। ପ୍ରମାଣ ନ ଥାଇ କେବଳ କହିଦେଲେ ଆମେ ମାନିବୁ ନାହିଁ। ସରୋଜ ଦୋଷୀ ଏକଥା ଜଣାପଡୁ ନାହାନ୍ତି। କାରଣ ତାଙ୍କର ବ୍ୟବହାର ଭଲ ଥିଲା। ଆଇନଜୀବୀ ଅମିୟ ପଟ୍ଟନାୟକ କୁହନ୍ତି, ପରୀ ହତ୍ୟାକାଣ୍ଡ ପରି ସମ୍ବେଦନଶୀଳ ଘଟଣାରେ ଏସ୍ଆଇଟି ନିରପେକ୍ଷ ହୋଇ କାମ କରିବା ଦରକାର। ଅଟକ ବ୍ୟକ୍ତିମାନେ ଯେ ଦୋଷୀ କହିହେବ ନାହିଁ। ଏସ୍ଆଇଟି ପ୍ରକୃତ ହତ୍ୟାକାରୀଙ୍କୁ ଧରିବା ପାଇଁ ଅଟକ ନାଟକ ଯେ ରଚୁ ନ ଥିବ ତାହା କହି ହେବ ନାହିିଁ। ପ୍ରକୃତ ହତ୍ୟାକାରୀକୁ ଚିହ୍ନଟ କରାଯିବା ଦରକାର। ନଚେତ ବିବାଦୀୟ ପରିସ୍ଥିତି ସୃଷ୍ଟି ହୋଇପାରେ।