ନୂଆଦିଲ୍ଲୀ: କୋଭିଡ୍-୧୯ ଭାକ୍ସିନ ଏବଂ ଏଥି ସଂକ୍ରାନ୍ତ ବିଭିନ୍ନ ଔଷଧ ଉପରେ ଲାଗୁଥିବା ଟିକସକୁ ନେଇ ଗତ କିଛିଦିନ ହେବ ବେଶ୍ ଆଲୋଚନା ଜାରି ରହିଛି। କରୋନା ସଙ୍କଟ ସମୟରେ ଭାକ୍ସିନ ଉପରେ ଟିକସ ହ୍ରାସ ହେଉ ବୋଲି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ କେନ୍ଦ୍ର ସରକାରଙ୍କୁ ନିବେଦନ କରିଥିଲେ। ଏହି ପ୍ରସଙ୍ଗ ଉପରେ ଅର୍ଥମନ୍ତ୍ରୀ ନିର୍ମଳା ସୀତାରାମନ ରବିବାର ସ୍ପଷ୍ଟୀକରଣ ଦେଇଛନ୍ତି। ମମତା ବାନାର୍ଜୀଙ୍କ ପ୍ରଶ୍ନର ଉତ୍ତରକୁ ସୀତାରାମନ ୧୬ ଟୁଇଟ ଜରିଆରେ ଦେଇଛନ୍ତି। ସେ ସ୍ପଷ୍ଟଭାବେ କହିଛନ୍ତି, କୋଭିଡ ଭାକ୍ସିନ ଉପରେ ନୂ୍ୟନତମ ୫% ଏବଂ ଅକ୍ସିଜେନ କନ୍ସେନଟ୍ରେଟର ଏବଂ ଔଷଧ ଉପରେ ୧୨% ଟିକସ ଜରୁରୀ। ସରକାରଙ୍କ ଏଭଳି ନିଷ୍ପତ୍ତି ଦ୍ୱାରା ଏହି ସାମଗ୍ରୀଗୁଡ଼ିକର ଦାମ କମ୍ ରଖିବାରେ ସହାୟକ ହେଉଛି।
ସୀତାରାମନ ପୁଣି କହିଛନ୍ତି, ଭାକ୍ସିନ ଏବଂ ଔଷଧ ଉପରେ ସାମାନ୍ୟ ଟିକସ ଯୋଗୁ କମ୍ପାନୀଗୁଡ଼ିକୁ ଇନ୍ପୁଟ ଟାକ୍ସ କ୍ରେଡିଟ ମିଳୁଛି। ଏହା ଦ୍ୱାରା ଦାମ୍ କମ୍ ରଖିବାରେ ସହାୟକ ହେଉଛି। ଏଭଳି ମେଡିସିନ ଏବଂ ଜୀବନରକ୍ଷାକାରୀ ଉପକରଣ ଉପରେ ସରକାର ଯଦି ସମ୍ପୂର୍ଣ୍ଣ ଟିକସ ଉଠାଇ ଦିଅନ୍ତି କମ୍ପାନୀଗୁଡ଼ିକ ସେମାନଙ୍କ ପ୍ରଡକ୍ଟ ପ୍ରସ୍ତୁତି ଲାଗି ବ୍ୟବହାର ହେଉଥିବା କଞ୍ଚାମାଲ ଏବଂ ଅନ୍ୟ ସାମଗ୍ରୀ ଉପରେ ପ୍ରଦାନ କରୁଥିବା ଜିଏସ୍ଟିରେ ଇନ୍ପୁଟ ଟାକ୍ସ କ୍ରେଡିଟ ଲାଭ ଉଠାଇପାରିବେ ନାହିଁ। କମ୍ପାନୀଗୁଡ଼ିକ କଞ୍ଚାମାଲ ଉପରେ ଦେଉଥିବା ଟିକସ ବୋଝ ଲୋକଙ୍କ ଉପରେ ସିଧାସଳଖ ଲଦିଦେବେ। ଫଳରେ ମେଡିସିନ ଦାମ୍ ମହଙ୍ଗା ହୋଇଯିବ ବୋଲି ସୀତାରାମନ ମତ ପ୍ରକାଶ କରିଛନ୍ତି।
ସେ ଏହା ମଧ୍ୟ କହିଛନ୍ତି ଯେ, କୋଭିଡ୍-୧୯ ମେଡିସିନ ଆମଦାନୀ ଉପରେ ପୂର୍ବରୁ ଟିକସ ହ୍ରାସ କରାଯାଇଛି। ଏ ସଂକ୍ରାନ୍ତ ଔଷଧୀୟ ସଂକ୍ରାନ୍ତ ସାମଗ୍ରୀ ଉପରେ ଲାଗୁଥିବା ସମନ୍ବିତ ସାମଗ୍ରୀ ଓ ସେବା ଟିକସ(ଆଇଜିଏସ୍ଟି)ର ପ୍ରାୟ ୭୦% ରାଜ୍ୟଗୁଡିକୁ ମିଳୁଛି। ମମତା ବାନାର୍ଜୀ ଟିକସ କମାଇବା ନେଇ ପ୍ରଧାନମନ୍ତ୍ରୀଙ୍କୁ ଚିଠି ଲେଖିଥିବା ବେଳେ ଏହି ସମୟରେ ଅର୍ଥମନ୍ତ୍ରୀଙ୍କ ଏଭଳି ପ୍ରତିକ୍ରିୟା ଆସିଛି। କରୋନା ମେଡିସିନ ଏବଂ ଉପକରଣ ଆମଦାନୀ ଉପରେ ଟିକସ କମାଇବା ଉପରେ ଚିଠିରେ ଦାବି ହୋଇଛି।