ପାରଳାଖେମୁଣ୍ଡି, ୬।୫ (ଡି.ଏନ୍.ଏ): ଗଜପତି ଜିଲା ସଦରମହକୁମା ପାରଳାଖେମୁଣ୍ଡି ସହରର ସୀତାସାଗର ପରିତ୍ୟକ୍ତ ଅବସ୍ଥାରେ ଥିବାବେଳେ ଏହାର ପାର୍ଶ୍ୱତଟ ବର୍ତ୍ତମାନ ମଦ୍ୟପମାନଙ୍କ ଏକ ପ୍ରମୁଖ ଆଡ୍ଡାସ୍ଥଳୀ ହୋଇଥିବା ଦେଖିବାକୁ ମିଳୁଛି। ଯେଉଁ ସୀତାସାଗର ଦିନେ ପାରଳାଖେମୁଣ୍ଡି ସହରର ଐତିହ୍ୟ ତଥା ସହର ଉପକଣ୍ଠସ୍ଥ ଜମିଗୁଡିକୁ ଜଳସେଚନ ପାଇଁ ବ୍ୟବହାର ହେଉଥିଲା ବର୍ତ୍ତମାନ ତାହା ପରିତ୍ୟକ୍ତ ଅବସ୍ତାରେ ରହିଛି। ଅନ୍ୟପକ୍ଷରେ ଏହା ସହର ଉପକଣ୍ଠସ୍ଥ ନିକାଞ୍ଚନ ଅଞ୍ଚଳ ହୋଇଥିବାରୁ ସା ପରେ ଏହି ତଟରେ ଥିବା ପାହାଚ ଉପରେ ଅସାମାଜିକ ବ୍ୟକ୍ତିମାନେ ବସି ମଦ୍ୟପାନ କରୁଛନ୍ତି ଏବଂ ସମସ୍ତ ପ୍ରକାର ଅଳିଆ ଆବର୍ଜନା ତଟରେ ଏବଂ ସୀତା ସାଗରରେ ପକାଉଛନ୍ତି। ବାରମ୍ବାର ଦାବି ସତ୍ତେ ଏହି ପୋଖରୀର ପୁନଃରୁଦ୍ଧାର ପାଇଁ କୌଣସି ପଦକ୍ଷେପ ନିଆଯାଉନାହିଁ। ମହାରାଜାଙ୍କ ଅମଳରେ ଏହି ପୁରାତନ ବଡ ପୋଖରୀ ପାରଳାଖେମୁଣ୍ଡି ସହରର ବହୁ ଐତିହ୍ୟ ବହନ କରୁଥିଲା। ୨୦୦୭ରେ ଏହି ପୋଖରୀ ସଫେଇ କାର୍ଯ୍ୟ ହେବା ପରେ ୨୦୧୨ ପର୍ଯ୍ୟନ୍ତ ଏହା କିଛିଟା କାର୍ଯ୍ୟକ୍ଷମ ହେଉଥିଲା। ପାରଳାଖେମୁଣ୍ଡିସ୍ଥିତ ମତ୍ସଜୀବୀ ସମବାୟ ସମିତି ପ୍ରତି ବର୍ଷ ନିୟମ ଅନୁଯାୟୀ ଏହି ପୋଖରୀ ଲିଜ୍ ନେଉଛି । ମାତ୍ର ଏହି ପୋଖରୀରୁ କୌଣସି ମାଛ ଉତ୍ପାଦନ ହେଇପାରୁ ନାହିଁ କିମ୍ବା ଏହି ପୋଖରୀ ସ୍ଥାନୀୟ ଅଞ୍ଚଳରେ କୌଣସି କାର୍ଯ୍ୟରେ ଆସିପାରୁ ନାହିଁ । ଏଥିପାଇଁ ବାରମ୍ବାର ମତ୍ସଜୀବୀମାନେ ପ୍ରଶାସନ ନିକଟରେ ଅଭିଯୋଗ ଜଣାଇଛନ୍ତି। ମତ୍ସଜୀବୀମାନେ ଏ ସମ୍ପର୍କରେ ରାଜ୍ୟସ୍ତରରେ ମଧ୍ୟ ଅଭିଯୋଗ ପୂର୍ବରୁ ଆଣୁଥିବାର ସୂଚନା ରହିଛି । ମାତ୍ର ଏହାର କୌଣସି ସୁଫଳ ମିଳିନାହିଁ । ଅନ୍ୟପକ୍ଷରେ ଏହି ସୀତାସାଗର ପୁନଃଉଦ୍ଧାର ନହେବା ଯୋଗୁଁ ଆବର୍ଜନା ଏବଂ ମାଟି ଦ୍ୱାରା ଏହା ଚାରିକଡରୁ ପୋତି ହୋଇ ଏହା ଧିରେ ଧିରେ ସଙ୍କୁଚିତ ହେବାରେ ଲାଗିଛି। ତେଣୁ ପ୍ରଶାସନ ଏହାର ପୁନରୁଦ୍ଧାର ନିମନ୍ତେ ତୁରନ୍ତ ଦୃଷ୍ଟି ହେବାକୁ
ବୁଦ୍ଧିଜୀବୀ ମହଲରେ ଦାବି ହେଉଛି।