ଭଦ୍ରକ,୩ା୪(ସନାତନ ରାଉତ): ଭଦ୍ରକ ବିଧାନସଭା କ୍ଷେତ୍ର ଲାଗି ଏଥର ନୂଆଁମୁହଁକୁ ଭରସା କରିଛି ଭାଜପା। ଜିଲାର ଜଣାଶୁଣା ସାମାଜିକ ସଙ୍ଗଠନ ଶହୀଦ ଭଗତ ସେନାର ଆବାହକ ସୀତାଂଶୁ ଶେଖର ମହାପାତ୍ର ଭାଜପାର ବିଧାୟକ ପ୍ରାର୍ଥୀ ଭାବେ ନିର୍ବାଚନ ଲଢ଼ିବେ। ଗତ ଜାନୁୟାରୀରେ ସୀତାଂଶୁ ଭାଜପାରେ ସାମିଲ ହେବା ପରେ ତାଙ୍କୁ ଟିକେଟ ମିଳିବ ବୋଲି ଚର୍ଚ୍ଚା ହେଉଥିଲା। ଆଗାମୀ ନିର୍ବାଚନରେ ଭଦ୍ରକ ବିଧାନସଭା ଆସନରେ ସୀତାଂଶୁ ଓ ବିଜେଡିର ଭେଟେରାନ ନେତା ପ୍ରଫୁଲ୍ଲ ସାମଲଙ୍କ ମଧ୍ୟରେ କଡ଼ା ଟକ୍କର ହେବ ବୋଲି ରାଜନୈତିକ ମହଲରେ ଚର୍ଚ୍ଚା ଆରମ୍ଭ ହୋଇଛି।
ବିଧାୟକ ସଞ୍ଜୀବ ମଲ୍ଲିକଙ୍କୁ ବିଜେଡି ଭଣ୍ଡାରିପୋଖରୀ ବିଧାନସଭା ଆସନ ପାଇଁ ପ୍ରାର୍ଥୀ କରିଥିବା ବେଳେ ପ୍ରଫୁଲ୍ଲଙ୍କୁ ଭଦ୍ରକ ବିଧାନସଭା କ୍ଷେତ୍ର ଲାଗି ପ୍ରାର୍ଥୀ କରାଯାଇଛିି। ପ୍ରଫୁଲ୍ଲ ପୂର୍ବରୁ ଭଦ୍ରକ ବିଧାନସଭା ଆସନରୁ ବିଧାୟକ ଭାବେ ନିର୍ବାଚିତ ହୋଇଥିବା ବେଳେ ଏହା ତାଙ୍କର ପୁରୁଣା କ୍ଷେତ୍ର। ସମସ୍ତ ଦଳୀୟ ଅସନ୍ତୋଷର ଅନ୍ତଃ ଘଟାଇ ପ୍ରଫୁଲ୍ଲ ସମସ୍ତଙ୍କୁ ଏକତ୍ର କରି ନିର୍ବାଚନ ଲଢ଼ିବାକୁ ରଣନୀତି କରୁଥିବା ଦେଖାଯାଉଛି।
ସୀତାଂଶୁ ଶହୀଦ ଭଗତସେନା ସଙ୍ଗଠନ ଜରିଆରେ ଗରିବ, ଅସହାୟଙ୍କୁ ସେବା ଯୋଗାଇ ଭଦ୍ରକବାସୀଙ୍କ ପ୍ରିୟଭାଜନ ହୋଇଥିବା ଲୋକେ କୁହାକୁହି ହେଉଛନ୍ତି। କଂଗ୍ରେସ ପକ୍ଷରୁ ଏହି ଆସନ ପାଇଁ ପ୍ରାର୍ଥୀ ଘୋଷଣା ହୋଇ ନ ଥିବାବେଳେ ବିଜେଡି ଓ ଭାଜପା ମଧ୍ୟରେ କଡ଼ା ଟକ୍କର ହେବ ବୋଲି ଆଲୋଚନା ହେଉଛି। ସୀତାଂଶୁଙ୍କୁ ବିଧାୟକ ପ୍ରାର୍ଥୀ ଘୋଷଣା ପରେ ଶହୀଦ ଭଗତ ସେନା ସହ ଯୁବ ସମର୍ଥକମାନଙ୍କ ମଧ୍ୟରେ ଉତ୍ସାହ ଦେଖାଦେଇଛି। ଦଳ ତାଙ୍କ ଉପରେ ଆସ୍ଥା ପ୍ରକଟ କରି ଟିକେଟ ଦେଇଥିବାରୁ ସୀତାଂଶୁ ପ୍ରଧାନମନ୍ତ୍ରୀ ଓ ରାଜ୍ୟ ସଭାପତିଙ୍କୁ ଧନ୍ୟବାଦ ଜଣାଇବା ସହ ଭଦ୍ରକବାସୀ ତାଙ୍କ ପାଇଁ ନିର୍ବାଚନ ଲଢ଼ିବେ ବୋଲି କହିଛନ୍ତି।