ମେଲବୋର୍ନ, ୧୮ା୨(ଏପି)-ଅଷ୍ଟ୍ରେଲିଆନ ଓପନ୍ ଗ୍ରାଣ୍ଡସ୍ଲାମ ଟେନିସ ପୁରୁଷ ସିଙ୍ଗଲର ଏକ ସେମିଫାଇନାଲ ମ୍ୟାଚ ଗ୍ରୀସ୍ର ଷ୍ଟିଫାନସ ସିତ୍ସିପାସ୍ ଓ ରୁଷିଆର ଡାନିଲ ମେଡଭେଡେଭଙ୍କ ମଧ୍ୟରେ ହେବ। ସିତ୍ସିପାସ୍ ବୁଧବାର ଖେଳାଯାଇଥିବା ଏକ କ୍ୱାର୍ଟରଫାଇନାଲରେ ୨୦ ଗ୍ରାଣ୍ଡସ୍ଲାମ ବିଜେତା ରାଫାଲ ନାଡାଲଙ୍କୁ ୩-୬, ୨-୬, ୭-୬ (୪),୬-୪, ୭-୫ ସେଟ୍ରେ ହରାଇ ଦେଇଛନ୍ତି। ମେଡଭେଡେଭ ବୁଧବାର ଅନୁଷ୍ଠିତ ଅନ୍ୟ ଏକ କ୍ୱାର୍ଟରଫାଇନାଲରେ ନିଜ ଦେଶରେ ଆନ୍ଦ୍ରେ ରୁବ୍ଲେଭଙ୍କୁ ୭-୫, ୬-୨, ୬-୩ ସେଟରେ ହରାଇ ଦେଇଛନ୍ତି। ଏଠାରେ ଚତୁର୍ଥ ସିଡ୍ ପ୍ରାପ୍ତ ମେଡଭେଡେଭ ତାଙ୍କ କ୍ୟାରିୟରର ତୃତୀୟ ଗ୍ରାଣ୍ଡସ୍ଲାମ ସେମିଫାଇନାଲ ଖେଳିବାକୁ ଯାଉଛନ୍ତି। ସେ କ୍ରମାଗତ ୧୯ଟି ମ୍ୟାଚରେ ଅପରାଜେୟ ରହିଛନ୍ତି। ମେଡଭେଡେଭ ୨୦୧୯ ୟୁ.ଏସ୍. ଓପନ ଫାଇନାଲରେ ରାଫାଲ ନାଡାଲଙ୍କଠାରୁ ହାରି ରନର୍ସ ଅପ୍ ହୋଇଥିଲେ। ଗତ ବର୍ଷ ନ୍ୟୁୟର୍କ ହାର୍ଡକୋର୍ଟର ଏକ କ୍ୱାର୍ଟରଫାଇନାଲରେ ସେ ରୁବ୍ଲେଭଙ୍କୁ ପରାସ୍ତ କରି ସେମିଫାଇନାଲରେ ପ୍ରବେଶ କରିଥିଲେ। ଏଠାରେ ବୁଧବାର ତାଙ୍କ ବାମ ଗୋଡ଼ରେ ସମସ୍ୟା ଦେଖାଦେଇଥିବାରୁ ମ୍ୟାଚ ଜିତିବା ଲାଗି ତାଙ୍କୁ କଷ୍ଟ କରିବାକୁ ପଡ଼ିଥିଲା ବୋଲି ମେଡଭେଡେଭ କହିଛନ୍ତି। ପୁରୁଷ ସିଙ୍ଗଲ୍ସର ଅନ୍ୟ ସେମିଫାଇନାଲ ବିଶ୍ୱର ନମ୍ବର ଓ୍ବାନ ନୋଭାକ୍ ଜୋକୋଭିଚ୍ ଏବଂ ରୁଷିଆନ କ୍ୱାଲିଫାୟର ୧୧୪ତମ ର଼୍ୟାଙ୍କିଙ୍ଗପ୍ରାପ୍ତ ଅସ୍ଲାନ କାରାତ୍ସେଭଙ୍କ ମଧ୍ୟରେ ହେବ। ୨୭ ବର୍ଷୀୟ କାରାତ୍ସେଭ ପ୍ରଥମ ଥର ଏକ ଗ୍ରାଣ୍ଡସ୍ଳାମ ଟୁର୍ନାମେଣ୍ଟର ମୁଖ୍ୟ ଡ୍ର’ରେ ଖେଳୁଛନ୍ତି। ଗ୍ରାଣ୍ଡସ୍ଳାମ ପଦାର୍ପଣରେ ସେମିଫାଇନାଲକୁ ଉନ୍ନୀତ ହେବାରେ ସେ ହେଉଛନ୍ତି ଏକମାତ୍ର ପୁରୁଷ ପ୍ରଫେସନାଲ ଖେଳାଳି। ଅନ୍ୟପକ୍ଷରେ ମହିଳା ସିଙ୍ଗଲ୍ସରେ ଗୋଟିଏ ସେମିଫାଇନାଲ ସେରେନା ଓ୍ବିଲିୟମ୍ସ ଓ ନାଓମି ଓସାକା ଏବଂ ଅନ୍ୟଟି ଜେନିଫର ବ୍ରାଡି ଓ କାରୋଲିନା ମୁଚୋଭାଙ୍କ ମଧ୍ୟରେ ହେବ। ଆମେରିକାର ବ୍ରାଡି କ୍ୱାର୍ଟରଫାଇନାଲରେ ନିଜ ଦେଶର ଜେସିକା ପେଗୁଲାଙ୍କୁ ୪-୬, ୬-୨, ୬-୧ ସେଟ୍ରେ ହରାଇଦେଇଛନ୍ତି। ସେ ଦ୍ୱିତୀୟ ଥର ଏକ ଗ୍ରାଣ୍ଡସ୍ଲାମ ସେମିଫାଇନାଲ ଖେଳିବେ। ତାଙ୍କ ପ୍ରତିଦ୍ୱନ୍ଦ୍ୱୀ ୨୫ତମ ସିଡ୍ କାରୋଲିନା ନମ୍ବର ୧ ଖେଳାଳି ଆସ୍ଲେ ବାର୍ଟିଙ୍କୁ ହରାଇ ଦେଇଛନ୍ତି। ବ୍ରାଡି ଏହା ପୂର୍ବରୁ ଗତ ସେପ୍ଟେମ୍ବରରେ ୟୁଏସ୍ ଓପନ ସେମିଫାଇନାଲରେ ପ୍ରବେଶ କରିଥିଲେ।
