କଣିହାଁ,୬।୨,(ଡି.ଏନ.ଏ.): ଅନୁଗୋଳ ଜିଲା କଣିହାଁ ବନାଞ୍ଚଳ ତରଫରୁ କୁଟୁରା ଶିକାର ଅଭିଯୋଗରେ ୧୨ ଜଣଙ୍କୁ ଗିରଫ କରି ଶନିବାର ରାତିରେ କୋର୍ଟଚାଲାଣ କରାଯାଇଛି। ରେଞ୍ଜ ଅଫିସର ନୀଳମଣି ଦେହୁରୀଙ୍କ ସୂଚନାରୁ ଜଣାଯାଏ ରେଙ୍ଗାଳି ଫରେଷ୍ଟ ସେକ୍ସନର ବିରୁପାଳ ସଂରକ୍ଷିତ ଜଙ୍ଗଲରେ ଶନିବାର କିଛି ଦୁର୍ବୃତ୍ତ କୁକୁର ସହାୟତାରେ ଏକ କୁଟୁରାକୁ ଶିକାର କରିଥିଲେ । ବନାଞ୍ଚଳ ବିଭାଗର ପାଟ୍ରୋଲିଂ ଟିମ ଖବର ପାଇ ଜଙ୍ଗଲ ଭିତରେ ଚଢ଼ାଉ କରି ମୃତ କୁଟୁରାକୁ ଉଦ୍ଧାର କରିବା ସହିତ ୧୨ଜଣଙ୍କୁ ଗିରଫ କରାଯାଇଥିଲା। ଗିରଫ ଶିକାରୀମାନେ ପାଳଲହଡା ଉପଖଣ୍ଡ ଖମାର ଥାନା ଝାରକିଲିଣ୍ଡା ଗ୍ରାମର ୧୧ ଜଣ ହୋଇଥିବା ବେଳେ ପିଟା ଗ୍ରାମର ଜଣେ ବ୍ୟକ୍ତି ଅଟନ୍ତି । ସେମାନଙ୍କଠାରୁ ପାଞ୍ଚଟି ଟାଙ୍ଗିଆ ଜବତ କରାଯାଇଛି । କେସ ନମ୍ବର ୫୫/୨୨ରେ ମାମଲା ରୁଜ୍ଜୁ ହୋଇ ଅଭିଯୁକ୍ତଙ୍କୁ କୋର୍ଟଚାଲାଣ କରାଯାଇଛି । ମୃତ କୁଟୁରାକୁ ବ୍ୟବଚ୍ଛେଦ ପରେ ପୋତି ଦିଆଯାଇଛି ।
