ଲକ୍ଷ୍ମଣ ରେଖା ଟପିଲେ ସ୍ଥିତି ହେବ ଭୟଙ୍କର, ପାକିସ୍ତାନ-ତାଲିବାନକୁ ଇରାନର ଚେତାବନୀ…

ତେହରାନ,୬।୯: ପଞ୍ଜଶିରରେ ପାକିସ୍ତାନ ସହାୟତାରେ ତାଲିବାନ ପକ୍ଷରୁ ନରସଂହାର ଜାରି ରହିଛି। ଏହାକୁ ନେଇ ଇରାନ ମୁହଁ ଖୋଲିଛି। ଇରାନ କହିଛି ଲକ୍ଷ୍ମଣ ରେଖା ଟପିଲେ ସ୍ଥିତି ଭୟଙ୍କର ହେବ। ଇରାନ କହିଛି ଯେ ପଞ୍ଜଶିରରେ ପାକିସ୍ତାନର ହସ୍ତକ୍ଷେପ ସମ୍ପର୍କରେ ଯାଞ୍ଚ କରାଯାଉଛିି। ରବିବାର ରାତିରେ ପାକିସ୍ତାନ ବାୟୁସେନା ପକ୍ଷରୁ ହୋଇଥିବା ଆକ୍ରମଣକୁ କଡ଼ା ଶବ୍ଦରେ ଇରାନ ନିନ୍ଦା କରିଛି।

ଇରାନର ବୈଦେଶିକ ମନ୍ତ୍ରଣାଳୟର ମୁଖପାତ୍ର ସୟଦ ଖତିବ ଜାଦେହ କହିଛନ୍ତି ଆଫଗାନିସ୍ତାନର ଆଭ୍ୟନ୍ତରୀଣ ପ୍ରସଙ୍ଗରେ ପାକିସ୍ତାନର ହସ୍ତକ୍ଷେପ ଉଚିତ ନୁହେଁ। ଆଫଗାନିସ୍ତାନ ସମସ୍ୟାର ଏକମାତ୍ର ସମାଧାନ ହେଉଛି ଆଭ୍ୟନ୍ତରୀଣ ବୁଝାମଣା। ଅନ୍ତର୍ଜାତୀୟ ନିୟମ ଅନୁଯାୟୀ ଦାୟିତ୍ୱବୋଧକୁ ପାକିସ୍ତାନ ସମେତ ଅନ୍ୟ ଦେଶ ବିଚାର କରାଯିବା ଆବଶ୍ୟକ ବୋଲିି ସେ କହିଛନ୍ତି।

ପଞ୍ଜଶିର ବିଦ୍ରୋହୀମାନେ ଅଭିଯୋଗ କରିଛନ୍ତି ଯେ ପାକିସ୍ତାନୀ ସୈନ୍ୟମାନେ ତାଲିବାନକୁ ବିଜୟରେ ସହାୟତା ଯୋଗାଇ ଦେଇଛନ୍ତି। କେବଳ ଏତିକି ନୁହେଁ ତାଲିବାନ ପାକିସ୍ତାନ ସହାୟତାରେ ନରସଂହାର ଘଟାଇଥିବା ଅଭିଯୋଗ ମଧ୍ୟ ହୋଇଛି।

ତାଲିବାନ-ପାକିସ୍ତାନୀ ଆକ୍ରମଣ ଯୋଗୁ ବିଦ୍ରୋହୀ ନେତା ଅହମ୍ମଦ ମାସୁଦଙ୍କ ପାଇଁ ଅସୁୂବିଧା ସୃଷ୍ଟି ହୋଇଛି। ତାଙ୍କ ପ୍ରବକ୍ତା ଫହିମ ଦସ୍ତି ଏବଂ ବରିଷ୍ଠ କମାଣ୍ଡର ଜେନେରାଲ ସାହିବ ଅବଦୁଲ ୱଦୁଦ ଝୋରଙ୍କୁ ହତ୍ୟା କରାଯାଇଛି। ମାସୁଦ ଏକ ସୁରକ୍ଷିତ ସ୍ଥାନକୁ ଯିବା ପରେ ତାଲିବାନ ସୋମବାର ସକାଳେ ଦାବି କରିଛି ଯେ ସେମାନେ ପଞ୍ଜଶିରଙ୍କୁ ସମ୍ପୂର୍ଣ୍ଣ ଭାବେ କାବୁ କରିଛନ୍ତି।

ମାସୁଦଙ୍କ ଟୁଇଟର ହ୍ୟାଣ୍ଡେଲରୁ ଏକ ଟୁଇଟରେ ପାକିସ୍ତାନ ବିରୋଧରେ ଗୁରୁତର ଅଭିଯୋଗ ହୋଇଛି। ମାସୁଦ କହିଛନ୍ତି ଯେ ତାଲିବାନ ଆମ ସହ ଯୁଦ୍ଧ କରୁନାହିଁ କିନ୍ତୁ ପାକିସ୍ତାନୀ ସେନା ଏବଂ ଆଇଏସଆଇ ହିଁ ସେମାନଙ୍କୁ ଆଗେଇ ନେଉଛି। ତାଲିବାନ ଆମ ସହ ପ୍ରତିଦ୍ୱନ୍ଦ୍ୱିତା କରିବାକୁ ଯଥେଷ୍ଟ ଶକ୍ତିଶାଳୀ ନୁହେଁ କିନ୍ତୁ ପାକିସ୍ତାନୀ ସେନା ସେମାନଙ୍କୁ ସହଯୋଗ କରୁଛି।