ରାୟଗଡ଼ା(ସ୍ବ.ପ୍ର./ରାୟଗଡ଼ା ଅଫିସ),୧୧ା୨: ରାୟଗଡ଼ା ସହରରେ ଚୋରି, ଲୁଟ୍, ଡକାୟତି ବଢ଼ୁଥିବାବେଳେ ପୋଲିସ ପାଇଁ ଚାଲେଞ୍ଜ ହୋଇଛି। ଟାଉନ ଥାନା ପୋଲିସ ଏହାର ତଦନ୍ତ କରି ୬ଜଣ ଅଭିଯୁକ୍ତଙ୍କୁ ଗିରଫ କରିଛି। ସେମାନେ ହେଲେ କଲ୍ୟାଣସିଂହପୁର ଥାନା ଅଡାବାଡି ଗ୍ରାମର ଯୁଧିଷ୍ଟିର କୌଶଲ୍ୟା, କୋରାପୁଟ ଜିଲା ଲକ୍ଷ୍ମୀପୁର ଥାନା ଅନ୍ତର୍ଗତ ମଣ୍ଡଳଗୁଡ଼ା ଗ୍ରାମର ସୁଦର୍ଶନ କନ୍ଧପାଣି ଓ କାଶୀପୁରର ଶଙ୍କର ନାଏକ। ସୁଦର୍ଶନ ଜଣେ ଇଞ୍ଜିନିୟରିଂ ଛାତ୍ର ବୋଲି ସୂଚନା ମିଳିଛି। ସେହିଭଳି ସୁନା କିଣିଥିବା ୩ ବ୍ୟକ୍ତି ହେଲେ କୋରାପୁଟ ସହର ଟିକରା ସାହିର ମଧୁ ଖରା, ରାୟଗଡ଼ା ସହର ପାଇକ ସାହିର ବାନ୍ଧି ଶଙ୍କର ରାଓ ଏବଂ ଆନ୍ଧ୍ର ପ୍ରଦେଶ ରାଜ୍ୟ ମକୁଭା ଗ୍ରାମର ପି. ସୁର୍ଯ୍ୟ ନାରାୟଣ। ସେମାନଙ୍କ ନିକଟରୁ ୪୯ ଗ୍ରାମ ସୁନା, ୪୮, ୫୦୦ ଟଙ୍କା, ଦୁଇ ବାଇକ୍, ୫ମୋବାଇଲ ଫୋନ୍ ଜବତ କରାଯାଇଛି। ଗିରଫଙ୍କ ମଧ୍ୟରେ ଲୁଟେରା ଏବଂ ଚୋରି ସୁନା, ରୁପା କିଣିଥିବା ବ୍ୟକ୍ତି ରହିଛନ୍ତି। ଅଭିଯୁକ୍ତମାନେ ବିଭିନ୍ନ ଲୁଟ୍ ମାମଲାରେ ସମ୍ପୃକ୍ତ ଥିବା ପୋଲିସ ସୂଚନା ଦେଇଛି।
ଫେବୃୟାରୀ ୧ରେ ସ୍ଥାନୀୟ ଟ୍ରେଜେରୀ ରୋଡ୍ରେ ସଞ୍ଜୁକ୍ତା ବକ୍ସିପାତ୍ର ମାମ୍ନୀ ମହିଳାଙ୍କୁ ଆକ୍ରମଣ କରି ତାଙ୍କ ବେକରୁ ୩୭ ଗ୍ରାମ ଓଜନର ସୁନାଚେନ୍ ଲୁଟି ନେଇଥିଲେ। ସୋମବାର ସ୍ଥାନୀୟ ଇନ୍ଦିରା ନଗରରେ ଜଣେ ମହିଳା ତାଙ୍ଗୁଡୁ ରମାମଣି ନିଜ ଭଉଣୀଙକ ଦୋକାନରେ ବସିଥିବା ସମୟରେ ତାଙ୍କୁ ଆକ୍ରମଣ କରି ପ୍ରାୟ ୭୦ ଗ୍ରାମ ଓଜନର ସୁନାଚେନ୍ ଲୁଟି ନେଇଥିଲେ। ସେହିଭଳି ୨୦୨୨ ଜୁଲାଇ ୧୬ରେ ପି. ଗୌରୀ ନାମ୍ନୀ ମହିଳାଙ୍କୁ ଆକ୍ରମଣ କରି ପ୍ରାୟ ୩୦ ଗ୍ରାମ୍ ଓଜନର ସୁନାଚେନ୍ ଲୁଟ କରିଥିଲେ। ଏହି ୩ ଘଟଣାରେ ଯୁଧିଷ୍ଟିର, ସୁଦର୍ଶନ ଓ ଶଙ୍କରଙ୍କ ସମ୍ପୃକ୍ତି ରହିଥିବା ଜଣାପଡ଼ିଥିଲା। ଦୁର୍ବୃତ୍ତମାନେ ସୁନାଚେନ୍ ଲୁଟ୍ କରି ଆନ୍ଧ୍ର ପ୍ରଦେଶରେ ବିକ୍ରି କରୁଥିବା ପୋଲିସ ତଦନ୍ତରୁ ଜାଣିବାକୁ ପାଇଥିବା ସୂଚନା ମିଳିଛି। ୩ଜଣଙ୍କ ସମ୍ପୃକ୍ତି ଥିବା ଜଣାପଡ଼ିବା ପରେ ପୋଲିସ ବିଭିନ୍ନ ସ୍ଥାନରେ ଚଢ଼ାଉ କରିଥିଲା। ହେଲେ ସଫଳତା ପାଇ ନ ଥିଲା। ଗୁରୁବାର ରାତିରେ ୩ ପୋଲିସ ଟିମ୍ ବିଭିନ୍ନ ସ୍ଥାନରେ ଚଢ଼ାଉ କରି ସମସ୍ତ ଅଭିଯୁକ୍ତଙ୍କୁ ଧରିବାରେ ସଫଳ ହୋଇଥିଲା। ଗିରଫଙ୍କ ସୂଚନାକୁ ଭିତ୍ତିକରି ପୋଲିସ ସୁନା କିଣିଥିବା ବ୍ୟକ୍ତିଙ୍କୁ ଧରିବା ସହ ଚୋରି ସୁନା ଜବତ କରିଥିଲା। ଜବତ ହୋଇଥିବା ସୁନା ଲୁଟ୍ର ଶିକାର ହୋଇଥିବା ବ୍ୟକ୍ତିମାନଙ୍କୁ ହସ୍ତାନ୍ତର କରାଯାଇଛି। ଏସ୍ଆଇ ବିକାଶ ପଟେଲ, ସଞ୍ଜୟ କୁମାର ଛତର ଓ କ୍ଷୀରସିନ୍ଧୁ ସାହୁଙ୍କ ନେତୃତ୍ୱରେ ଗଠିତ ୩ଟିମ୍ ଲୁଟେରାଙ୍କୁ ଧରିଥିଲେ। ସମସ୍ତ ଅଭିଯୁକ୍ତଙ୍କୁ ଶୁକ୍ରବାର କୋର୍ଟ ଚାଲାଣ କରାଯାଇଛି। ସେମାନଙ୍କୁ ପୁଣି ୫ ଦିନିଆ ରିମାଣ୍ଡରେ ଆଣି ପୋଲିସ ଅଧିକ ତଦନ୍ତ କରିବ ବୋଲି ଆଇଆଇସି ରଶ୍ମିରଞ୍ଜନ ପ୍ରଧାନ ସୂଚନା ଦେଇଛନ୍ତି। ଉକ୍ତ ଘଟଣାକୁ ନେଇ ପୋଲିସ ପକ୍ଷରୁ ଆୟୋଜିତ ଖବରଦାତା ସମ୍ମିଳନିରେ ଡିଏସ୍ପି ସୁଦାମ ମଲ୍ଲିକ ଓ ଆଇଆଇସି ରଶ୍ମିରଞ୍ଜନ ପ୍ରଧାନ ସୂଚନା ଦେଇଛନ୍ତି। ତେବେ ଅନ୍ୟ ଲୁଟ୍ ଘଟଣାରେ ପୋଲିସକୁ ଏ ପର୍ଯ୍ୟନ୍ତ ସଫଳତା ମିଳିନାହିଁ।