ଲଣ୍ଡନ,୨୨।୪(ପି.ଟି.): ହାଇପ୍ରୋଫାଇଲ ସୁପର ଲିଗ୍ରୁ ୬ଟି ଇଂଲିଶ କ୍ଲବ୍ ଓହରିଯାଇଛନ୍ତି। ଫଳରେ ଆରମ୍ଭ ହେବା ପୂର୍ବରୁ ଏହି ଲିଗ୍ ଏକପ୍ରକାର ବିପର୍ଯ୍ୟୟର ସମ୍ମୁଖୀନ ହୋଇଛି। ଇଂଲିଶ କ୍ଲବ୍ଗୁଡିକ ଓହରିଯିବା ପରେ ସ୍ପାନିଶ ଓ ଇଟାଲୀର କ୍ଲବଗୁଡିକ ଚକିତ ହୋଇଛନ୍ତି।
ଆର୍ସେନାଲ, ଚେଲସି, ଲିଭରପୁଲ, ମାଞ୍ଚେଷ୍ଟର ୟୁନାଇଟେଡ, ମାଞ୍ଚେଷ୍ଟର ସିଟି ଓ ଟୋଟେନହାମ୍ ମଙ୍ଗଳବାର ବିଶ୍ୱର ଏହି ସବୁଠାରୁ ଧନୀ ଲିଗ୍ରୁ ଓହରିଯାଇଥିଲେ। ସମର୍ଥକଙ୍କ ପ୍ରତିକ୍ରିୟା ଓ ବ୍ରିଟିଶ ସରକାରଙ୍କ ସତର୍କତାକୁ ଦୃଷ୍ଟିରେ ରଖି କ୍ଲବ୍ଗୁଡିକ ଏହି ନିଷ୍ପତ୍ତି ନେଇଛନ୍ତି। କ୍ଲବ୍ଗୁଡିକ ଓହରିଯିବା ପରେ ଏହି ଲିଗ୍ର ମାନେ କିଛି ନାହିଁ ବୋଲି କୁହାଯାଇପାରେ। କ୍ଲବ୍ଗୁଡିକର ଏହି ନିଷ୍ପତ୍ତିକୁ ବିଭିନ୍ନ ମହଲରୁ ନିନ୍ଦା କରାଯାଇଛି। ଅବଶ୍ୟ ଏ ନେଇ ଇଟାଲୀୟାନ ଓ ସ୍ପାନିଶ ଦଳଗୁଡିକ କୌଣସି ପ୍ରତିକ୍ରିୟା ପ୍ରକାଶ କରିନାହାନ୍ତି ଓ ମନ୍ତବ୍ୟ ଦେଇନାହାନ୍ତି।