ମୋରେନା,୫।୫: ମଧ୍ୟ ପ୍ରଦେଶର ମୋରେନାରେ ଜମି ବିବାଦକୁ ନେଇ ୬ ଜଣଙ୍କୁ ଗୁଳି କରିହତ୍ୟା କରାଯାଇଥିବା ଜଣାପଡିଛି। ଏହି ଗୁଳିକାଣ୍ଡରେ ୬ ଜଣଙ୍କ ମୃତ୍ୟୁ ହୋଇଥିବା ବେଳେ ୨ ଗୁରୁତର ହୋଇଛନ୍ତି। ମିଳିଥିବା ସୂଚନା ଅନୁଯାୟୀ, ଜିଲାର ସିଂହୋନିଆ ଥାନା ଅନ୍ତର୍ଗତ ଲେପା ଗାଁରେ ଶୁକ୍ରବାର ସକାଳେ ଧିର ସିଂ ନାମକ ଜଣେ ବ୍ୟକ୍ତି ଗଜେନ୍ଦ୍ର ସିଂଙ୍କ ଘରେ ପୁରୁଣା ଜମି ବିବାଦକୁ ନେଇ ଆକ୍ରମଣ କରିଥିଲେ। ଏହି ଦୁଇ ପରିବାର ମଧ୍ୟରେ ୨୦୧୩ରୁ ବିବାଦ ଲାଗି ରହିଥିଲା। ପୁରୁଣା କଳିକୁ ନେଇ ଧିର ସିଂ ଗଜେନ୍ଦ୍ରଙ୍କ ପରିବାରର ୬ ଜଣଙ୍କୁ ଗୁଳି କରିଥିଲେ। ଏଥିରେ ୩ ମହିଳା ଓ ୩ ପୁରୁଷ ରହିଛନ୍ତି। ଗୁଳି ବାଜିବା ପରେ ଘଟଣାସ୍ଥଳରେ ୨ ମହିଳା ଓ ୩ ପୁରୁଷଙ୍କ ମୃତ୍ୟୁ ହୋଇଥିବା ବେଳେ ହସ୍ପିଟାଲରେ ଅନ୍ୟ ଜଣେ ମହିଳାଙ୍କର ମୃତ୍ୟୁ ହୋଇଥିଲା। ଏବେ ଅନ୍ୟ ୨ ଗୁରୁତର ଆହତଙ୍କର ଚିକିତ୍ସା ଚାଲିଛି। ଏହି ଘଟଣା ପରେ ଗାଁରେ ଉତ୍ତେଜନା ପରିସ୍ଥିତି ଉପୁଜିଥିବା ବେଳେ ପୋଲିସ ମୁତୟନ ହୋଇଛନ୍ତି।