ନନ୍ଦପୁର,୧୦ା୪(ଡି.ଏନ୍.ଏ.): କୋରାପୁଟ ଜିଲା ନନ୍ଦପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆସିଥିବା ଏକ୍ସ-ରେ ମେଶିନ ଏଯାଏ କାର୍ଯ୍ୟକ୍ଷମ ହୋଇନାହିଁ। ଏହା ମଧ୍ୟରେ ୬ ବର୍ଷ ବିତିଗଲାଣି। ମେଶିନ ଚଳାଇବା ଲାଗି ନିଯୁକ୍ତି ପାଇଥିବା ରେଡିଓଲୋଜିଷ୍ଟଙ୍କୁ ଜୟପୁର ଜିଲା ଚିକିତ୍ସାଳୟକୁ ଡେପୁଟେଶନରେ ପଠାଯାଇଛି। ଫଳରେ ନନ୍ଦପୁର ଡାକ୍ତରଖାନାକୁ ଚିକିତ୍ସା ଲାଗି ଆସି ରୋଗୀ ନିରାଶ ହୋଇ ଫେରୁଥିବା ଦେଖିବାକୁ ମିଳୁଛି। ନିକଟରେ ନନ୍ଦପୁର ବ୍ଲକରେ ଗୋଟିଏ ଦିନରେ ତିନି ବିଦ୍ୟାଳୟର ୩ ଛାତ୍ରଙ୍କ ହାତ ଓ ଗୋଡ଼ ଭାଙ୍ଗିଯିବା ପରି ଘଟଣା ଘଟିଥିଲା। ସେମାନେ ଚିକିତ୍ସା ଲାଗି ନନ୍ଦପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆସି ଏକ୍ସ-ରେ ମେଶିନ ବନ୍ଦ ଏବଂ ହାଡ଼ଭଙ୍ଗା ଚିକିତ୍ସକ ନ ଥିବାରୁ କୋରାପୁଟ ମେଡିକାଲ କଲେଜ, ସେମିଳିଗୁଡ଼ା ଓ ଆଶାକିରଣ ଚିକିତ୍ସାଳୟକୁ ସ୍ଥାନାନ୍ତର ହୋଇଥିଲେ।
ଏନେଇ ପଟ୍ଟାଙ୍ଗି ବିଧାୟକ ପିତମ ପାଢ଼ୀଙ୍କ ସ୍ବାସ୍ଥ୍ୟ ପ୍ରତିନିଧି ସୁନୀଲ ସାହୁ ସିଡିଏମ୍ଓ ଅରୁଣ ପାଢ଼ୀଙ୍କ ଦୃଷ୍ଟି ଆକର୍ଷଣ କରିଥିଲେ। ନନ୍ଦପୁର ବ୍ଲକ ଏମ୍ପି ପ୍ରତିନିଧି ଗୋପାଳ ମାଟାମ ମଧ୍ୟ ଜୟପୁର ବିଧାୟକ ତାରାପ୍ରସାଦ ବାହିନୀପତିଙ୍କୁ ଅବଗତ କରାଇଥିଲେ। ଶେଷରେ ବିଧାୟକ ବାହିନୀପତି ସିଡିଏମ୍ଓଙ୍କ ସହ ଆଲୋଚନାକରି ଜୟପୁର ଜିଲା ମୁଖ୍ୟ ଚିକିତ୍ସାଳୟରେ କାର୍ଯ୍ୟରତ ରେଡିଓଲୋଜିଷ୍ଟ ବିଜୟ ପାଲଙ୍କୁ ନନ୍ଦପୁରକୁ ଫେରାଇ ଆଣିଛନ୍ତି। ଅନ୍ୟପକ୍ଷରେ ଦୀର୍ଘଦିନ ହେଲା ଏକ୍ସ-ରେ ମେଶିନ କାର୍ଯ୍ୟକ୍ଷମ ନେଇ କୌଣସି ବ୍ୟବସ୍ଥା କରାଯାଇ ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଏକ୍ସ-ରେ ମେଶିନ କାର୍ଯ୍ୟକ୍ଷମ ହୋଇ ନ ଥିବାରୁ ଏଠାରେ ରେଡିଓଲୋଜିଷ୍ଟ କ’ଣ କରିବେ ବୋଲି ପ୍ରଶ୍ନବାଚୀ ସୃଷ୍ଟି ହୋଇଛି। ଏକ୍ସ-ରେ ମେଶିନ କାର୍ଯ୍ୟକ୍ଷମ କରିବା ସହ ତୁରନ୍ତ ନନ୍ଦପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଖାଲି ପଡ଼ିଥିବା ବିଶେଷଜ୍ଞ ଡାକ୍ତର ପଦବୀ ପୂରଣ କରିବାକୁ ଅଞ୍ଚଳବାସୀ ଦାବି କରିଛନ୍ତି। ନନ୍ଦପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧୀନରେ ୨୬ ଉପ ସ୍ବାସ୍ଥ୍ୟକେନ୍ଦ୍ର ରହିଛି। ମାସକୁ ୩୦ରୁ ୪୦ଟି ହାଡ଼ଭଙ୍ଗା ଘଟଣା ଓ ୨୦ରୁ ୨୫ଟି ଦୁର୍ଘଟଣାଜନିତ ଘଟଣା ଘଟୁଛି। ଡାକ୍ତର ଓ ଚିକିତ୍ସା ସୁବିଧା ନ ଥିବା ହେତୁ କେବଳ ଏଠାରେ ପ୍ରାଥମିକ ଚିକିତ୍ସା କରାଯାଇ ରୋଗୀଙ୍କୁ ଏଠାରୁ କୋରାପୁଟ ସ୍ଥାନାନ୍ତର କରାଯାଉଛି। ଏକ୍ସ-ରେ ମେଶିନ କାର୍ଯ୍ୟକ୍ଷମ ଓ ଡାକ୍ତର ନିଯୁକ୍ତି ସମ୍ପର୍କରେ ସିଡିଏମ୍ଓ ପାଢ଼ୀଙ୍କୁ ପଚାରିବାରୁ ଏ ସମ୍ପର୍କରେ ରାଜ୍ୟ ସ୍ବାସ୍ଥ୍ୟ ବିଭାଗକୁ ଅବଗତ କରାଯାଇଥିବା ସେ କହିଛନ୍ତି।